Seg umennuɣ ɣer wayeḍ… deg tilawt, seg yir amennuɣ ɣer wayeḍ… seg zik akka.
Nettwali tizerqeqt, ntettu tiṭ ; nettmuqul deg tiṭ, nhemmel udem ; nettwali udem, ntettu tafekka ; mi nḍall ɣef tfekka, ur nfaq d ayla n umdan ; nessalay amdan, nettḍerrif agraw ; nettmekti-d agraw, nseffeḍ aɣref ; nekkat ɣef uɣref, nbeṭṭu-t ɣef yiɣerfan wiyeḍ.
Seg umennuɣ ɣer wayeḍ. Deg tilawt, seg yir amennuɣ ɣer wayeḍ… seg zik akka.
Seg tallit ɣer tayeḍ, aɣref irennu wayeḍ ; aɣref, itettu iman-is, ibeṭṭu d igrawen ; seg yigrawen, yettifrir-d yiwen n ugraw ; ɣef wiyeḍ yesseɣḍal-d nnger. Mi iraε lbaṭel, yettezzem umdan iman-is, yettɣaḍ-it lḥal ; ɣer tnekra, yettɣawal. Mi tefra tnekra, yettmaggar umdan d yiman-is ; ilethay kan d tfekka-s ; d udem-is kan i t-iceɣben ; tudert, yettarra-tt di tiṭ-is ; yettwali kan tizerqeqt n tiṭ-is…
Seg zik akka… seg umennuɣ ɣer wayeḍ… deg tilawt, seg yir amennuɣ ɣer wayeḍ… Seg zik akka : yeḥsel umdan gar rrseḍ d tsegnit ; d netta i d ugug… d aḥebbas…
Neɣ d acu i tenniḍ ?
Muḥand Akli Salḥi
