Tikkwal nettẓeyyir iman-nneγ, neslalay-d timagiwin -ur nelli nneγ-, i γ-iḥettem usehres- akken ad d-naf taṭwiqt ara yessufγen taxenfuct-nneγ taseklant; is ara d-naf annar d ‶ilelli‶ yettawin γer tfelsafit tameṛkantit…inurar, mačči kifkif-iten akk i ttwarwaten. Nettakker-as-d turdas i tsekla akken a nessimγer ccan-nneγ afelsafan asertan ameṛkantan. D akud kan i d aγbel n tidet, wamma tilawt d ṣwab ssnen tameddurt-is.
Tura nnejbaden wakuden; mačči d widak-a ufella neγ wid-a-nni-nniḍen ara γ-yemmlen amek ara nesselḥu tafelsafit n tsekla-nneγ. D awezγi ad nuγal d inurar n termitin n tezrawin-nsen! Nezga d isegbar n umezruy-nneγ, maca uγalen akk fell-aγ d imezrayen. Anda jlan akk yigduden-a n talsa? Wissen ma grant-d tutlayin-nsen? Wiss ma ḥṣan s waya ‶yimussnawen-a-nneγ‶!
D ayen i d aγ-d-yeqqar dγa yiwen umγar γur-neγ, Dda zemni send talalit n ddunit mi ara yefqeε: Siwlet timucuha-nwen, arut amezruy-nwen, ili-kun d arraw n talsa; ḥerrket tiseṭṭwa-nwen a wid yeṭṭsen yettṛajun abeḥri n tmeddit yettun taṣebḥit-is! Syin γer da, neγra cwiṭ, nxemmem nezzeh γef wayen yenna yura Friedrich Nietzsche s wudem alsan deg ″le surhomme″ : Azγan aγunzu zgan gar-aneγ, γas ma ssefriwisen-aγ, maca tettlal-d seg-sen tlelli tafelsafant neγ tfelsafit tilellit; di teswiεin timḥemmqin -anda ara yili war amttuttel bab n tilawt d igenni n ṣṣwab, d tidet n tidet- i nessawal ad yekker wi yenwan yeγlin yekker…awi-d kan ma yessen yiγil ul n wallaγ n tfekka-s yemmuγbnen!
Nesnulfay-d tudert akin i tmettant. I ma tekfa tudert n tmettant, d acu ara d-yegrun? D acu ara d-yeqqimen akin i tfekka yeffeγ yiman neγ akin i yiman teğğa tfekka? Nesteqsa dγa Dda wezγi γef waya: Mačči d taggara n jellu n tfekka d yiman i d aγbel n tγerγert n usteqsi, d iziγer i nerra di tama, yesnuzgum kan γef tfekka d yiman. U dγa γef tsentelt-a i mgaraden wid yessefsayen uzzal semmḍen, Baruch Spinoza d René Descartes…
Ah lemmer dduklen uciweṛ d usteqsi!
Moh Laid Deflaoui
