Wissen ma tselleḍ-as i taɣect-nni i d-yettalin seg wanu n yiman-ik mi ara ak-tini :
«Ur tezmireḍ ad trewleḍ ɣef yiman-ik a amdan. Xdem ayen i ak-yehwan, ad teqqimeḍ d kečč ; kreh iman-ik akken tebɣiḍ, ad teqqimeḍ d kečč ; rwel ɣef tmurt-ik, nfu iman-ik seg tmurt-ik, di trewla-k, ad tegluḍ s wayen ɣef trewwleḍ. Acimi ara trewleḍ ihi ? Ɣef wacu ara trewleḍ ? Amkan amaynut mi t-tεefseḍ, ad tfiqeḍ, ɣas ur tebɣiḍ, d iḍarren-ik i k-yuwin ɣer dinna.
Wissen ma tettḥessiseḍ-as s tmeẓẓuɣt yeṣfan mi ara ak-tini :
«Muqqel deg lemri n yiman-ik, anwa ara k-id-iqablen, ma mačči d iman-ik ? Ɣas ad tḥennkeḍ i wudem-ik, ɣas ad as-teḍluḍ tiɣmi n wayeḍ, ad teqqimeḍ d kečč… Tiṭ-nni yellan deg wagens n yiman-ik, ad k-tettwali akken telliḍ, ɣas deg wallen n wiyeḍ ad asent-tbaneḍ d wayeḍ. Tiɣmi n uḥennek, ad k-teffer ɣer wiyeḍ ; ur tezmir ad ak-teffer udem-inek. Ad teqqimeḍ ad d-tettwaliḍ iman-ik d iman-ik seg daxel n yiman-ik. Yehwa-ak kan trewwleḍ ɣef yiman-ik».
Wissen ma ur treffuḍ ara fell-as mi ara ak-tini :
«Mi tegneḍ, d kečč ; d targit-ik kan ara targuḍ. Tirga n wiyeḍ, ur ssinent abrid ɣur-k. Mi ara d-tekkreḍ, ma ur tukiḍ s yiman-ik d kečč, ḥsu-k di targit-ik, telliḍ tettleqqimeḍ nnger-ik».
Wissen ma ad tt-teǧǧeḍ ad ak-tini : «asem deg wiyeḍ, ma tebɣiḍ. Ɛaned-iten, ma tebɣiḍ. Ddu yid-sen, ma tebɣiḍ. Ali mi ara alin… ader mi ara adren… zzi mi ara zzin… nneḍ mi ara nnḍen… Meεna, ur tezmireḍ ad teffɣeḍ seg uglim-ik. Kečč d kečč, akken tebɣuḍ txedmeḍ. Nutni d nutni, bɣu neɣ qqim… nutni d nutni, xdem neɣ qqim. Meqqar : qqim kan d keččini, tḥesseḍ-as i taɣect-nni mi d-tali seg wanu n yiman-ik… ɣas tebbeḥbeḥ…
Neɣ d acu i tenniḍ ?
Muḥend Akli Salḥi
