Ad d-naf awal d tiγri i wlejlej ma nerra tilas i weslejlej. Lejlej (délirer) a mmi-s n tmurt, aql-aγ yid-k; slejlej (faire tourmenter…) a win ur nessin yeshetrifen, wiss ma d-tafeḍ ulac ara izedγen ilem-ik…? Mačči d dderz n tewser i d aγbel, d temẓi-ya-nneγ yessaramen ad yiγzif leεmeṛ-is iwakken ad tessimẓi tewser-is. Ad nwuγ, ad γileγ…ili-kem yid-i a tasekla n tmedyezt-iw!
Mi ldiγ taṭwiqt i tlelli
Fell-i ttarraγ timedlin
Nwiγ d awal ad d-yili
Xerṣum d ticeqqufin
Yif-it wakal n tsusmi
Ad ttaγ tmes tiṛwiḥin
Ldiγ tawwurt i usigna
Ur berrik temlel teffeγ-it
Ttwaliγ deg-s tugna
D lexyal werεad yessen-it
Lekwaγeḍ, snat n tmura
Suref-iyi a tamagit!
Akken ldiγ tiṭṭ i wallaγ
Yelwawec wul, d iziεqer
Ur yelli wedγaγ d adγaγ
Am bu lγella d iεiqqer
Гas akken ssendafen-aγ
D tira-nsen i d-negmer…
Ččureγ-ak axnaq a lebγi
Anda akken i teggan tagut
Din tufa-t d amḍiq-nni
Yettu-t yiγil n tatut
D timsirin iγef ur nebni
Гer fuṛaṛ teṛğa tefsut
Ttaččareγ ayyur-iw d ussan
S tṣebḥit war tameddit
Xaqeγ almi ttṛajuγ uḍan
D akud n trusi d target
Yeqqel useggas d iceqfan
Ay amulli-w mmager-it!
Yeččuṛ weswal d nnhati
Uγent axxam s usgunfu
Wi d-yerzan yuγ tannumi
Anda-k a bab n usefru?
D ayen i yi-iğğan d amḥaddi
S ugecrir tayet-is d imru…
Nleqqem amezruy d imaw
Asmi i tettwamḍel tira
Гas yiwen sin i d agraw
Wis kṛaḍ d tidukkla
Yettγiḍ wayen i illan d ayla-w
Akka i tleḥḥu ar ass-a
Leqqmeγ targit d asmekti
Tceqqu-d s tayriwin
Tewwi-yi nnig n unadi
Гer uzermezruy[1] i γ-yeftin
Ay uggadeγ d assaki
Tettẓawan s tucbiḥin
Ad nleqqem ugur d tifrat
D addekwel nuki-d neṭṭes
Ad nunag deffir tafat
Ad nẓer amek i iga yiḍes
Tallest, iγed-is nessegra-t
Lmenṭeq ad d-yaf iles
Sbeddeγ lqedd ur yeknin
Гas akken ttṛuzunt wallen
Yeffeγ uḍar-iw ur yeḥṣin
S trewla ğğan yisafen
Neskaw tudert n tudrin
Ur d-lulen ttunagen
Ad sbeddeγ asekkil-iw
Zdat yiṭij i γ-yecban
Ad yaγ igenni, d itri-w
Tama-s d amğux aberkan[2]…
Ad d-yerr tiṭṭ γer taddart-iw
Iẓri-s d ussnan d adelsan
Asbeddi s tigzi yuklal
Am uxxam yeddem wesγar
D asγar fessus yif uzzal
Temγer yessen-itt kan wemγar!
Ad nleḥḥu ad d-nessekfal
Leğdari yettun aẓar
Rziγ ğğiγ lmut-iw
Srid γer wanda i luleγ
A tumert-iw d abrid-iw
D igenwan ara gezmeγ
Temmut lmut n lxaṭeṛ-iw
Deg teεcuct-iw ad zedleγ
Tirza tessiwzil igli
Ur d as-tuqiε deg yinit
Tafat n lebraq d izli
Ayen tḥemmleḍ γas aweḍ-it
Mačči d teṣmeḍ n tsusmi
Ara k-yekksen timlilit!
Ma nrezzu tebda ddunit
D tuγalin war isem…
D iẓekkwan i d talalit
D iγsan i d-yegran d udem
Mmiẓdet-d ad nemwalit!
Aql-aγ negla-d s usirem.
Moh Laid Deflaoui
[1] Azermezruy: Préhistoire
[2] Amğux aberkan: Le trou noir, voire les galaxies…
