Deg leɛwayed, akniwen ttemcabahen: yiwen lqedd, yiwet ṣṣifa… Ttkemmilen imawlan slusan-asen yiwet lebsa. Qqaren-d: tettaweṭ gar wakniwen alama win yettqerḥen ad yetteqreḥ wayeṭ.
Sin wayetmaten d akniwen ttemyaken ccbiha. Mi meẓẓyit, yemma-tsen teslusu-asen kifkif: isebbaṭen kifkif, iceṭṭiṭen kifkif, tmeccceṭ-asen kifkif…Siwa imawlan-nsen i iεeqqlen aniwi i d wa, aniwi i d wa.
Tteffɣen, ttwassnen deg uzniq.
Ttimɣuren, tettbin-d lεeqliya n yal yiwen ; qqlen medden εeqlen-ten seg umeslay, seg tikli, seg uxezzuṛ. Yiwen d uḥdiq yesεa lbext, medden akk d agla-as; netta, d agla n medden merra: ixeddem lxiṛ, yettɛawan ; yettlaɛi tameṭṭut argaz, aqcic taqcict, amɣar tamɣart ; ijebbu ɣef yimuṭan ama deg sbiṭar neɣ deg yixxamen… Ula d lmal iferreḥ ɣur-s mara t-yemmagger.
Wayeṭ yeqbeḥ, yeḥraret, d agla n yiman-is kan ; ur yettlaεi ḥedd, ur t-id-ttlaεi yiwen ; ur as-tuqiε deg win yuṭnen, ur as-tuqiε deg win iferḥen. Mačči am gma-s maṭi!
Ffɣen seg tmurt-nsen, tuwi-ten leqraya, ɣran deg tesdawit deg Marikan. Qqimen ddeqs ur d-rzifen ad ẓren yimawlan-nsen, imdukal d wakal i ten-d-yessekkren. Asmi id-qqlen, amezwaru-nni seqsan-d akk medden fell-as, ruḥen ɣur-s ɣer uxxam, feṛḥen yes-s.
Wayeṭ, gma-s yiwen ur t-id-yebdir ula s wawal , am akken ulac-it.
Yuhem, iɣaṭ-it lḥal, yusem, yemmeslay-as i yemma-as, yenna-as:
– A yemma, i wacu medden seqsan-d ɣef gma, nekk ur nceṭṭanen ara seg-i ?
Tenna-yas yemma-s :
-Netta, a mmi, yesɛa iles, yettmeslay akk d medden: yettsellik win iḥeṣlen, anezgum n medden d anezgum-is ; widak akk i isellek, ass-a seqsan-d fell-as.
– Ad xedmeɣ akk ayen i ixeddem netta.
– Ur tzemreṭ ara. Mi kun-ssuṭuṭeɣ, yiwen ‘yif i kečč, wayeṭ i netta. Ma d netta i yezwaren ɣer tuṭeṭṭa, ad yeṭṭeṭ azgen, ad ak-yeǧǧ azgen niṭi i kečč. Ma d kečč i yezwaren, ad teṭṭeṭeṭ i sin yiffan, u ad ternuṭ ad yi-txebceṭ…
