Igli-nneγ (notre horizon) neγ igli-nni-nneγ (l’autre horizon, le nôtre) zgan ssawalen i tyuga-ya-nneγ talsant (humaniste) tameγradant (univeselle) i s-d-yettaken tudert i ddunit-a : tamedyezt-tasekla. Tasekla d tilelli. Yessefk ad tili d tilellit am tmedyezt akken ad tcali war tilisa deg tegnawin n tilawt (réalité) d uneγlan (fiction) iγef axemmem yezga gar-asen d inigi i tira, d inigi i tmagit.
Akken ttwaliγ, tira taseklant d ul n tudert, d tudert n ddunit. Aneggal (romancier) yessufuγ-d ixemmimen-is d yiḥulfan-is iwakken ad yaf iman-is -ula d wiyeḍ, imeγriyen-is, ahat ad afen iman-nsen deg wayen yura- di tiram is yettidir. Acku, aṭas i yettarun akken ad ttwassnen war ma ẓran d asissen n tmussni i yezwaren ″iqudam n tmussni-nsen″. Nettaru tidet n tsekla, nessenfalay tasekla n tidet. Tamacahut n tsiwelt (narration) d ayen nniḍen: Ur nettaru yara i ucebbeḥ n ccbaḥa, n thuski; nettaru ad d-nini ayen ahat ur zmiren ad d-inin wid iγumm usigna i γ-yecban (écrire pour plaire… c’est se noyer dans l’obnubilation littéraire). Akud yeẓẓuγur adeg-is, ddel yemlal d lḥif-is; sewweq a Lεelğa d azref-im!
Aneggal, γur-i, d amedyaz: Yessawal tamacahut-is, yessenfalay tikta-s, yezzuzur tidmiwin (pensées) s lebγi n tigzi-s (intelligence). Yettaru ayen i s-d-yerzan γer wul n wallaγ-is; ur d as-tuqiε ma yelha-yas i wa neγ d ayen nniḍen war azal i wayeḍ. Ayen i lhan d wayen ur nelhi, lhan i sin skud nettwali ayen ur nelhi deg wayen yelhan. Ula d adlis, xerṣum ungal, akkenni. Yezmer ad yili wedlis γezzif d tullist akken i yezmer ad yili wezzil d ungal.
Mačči d iwudam i d aγbel -xerṣum dγa ad nissin tamagit n tmeddurt-nsen ″taseklant″. Wamma amennuγ yellan gar umeskar (auteur) d uwadem-is (son personage) d tilawt i icudden s aneγlan-is. D iwudam i γ-yessidiren, yewwi-d ad ten-nissin ma nefka-yasen tudert: Yezga meskin uwudem yettnaγ d umeskar-is ameγbun (le romancier se chamaille perpétuellement avec son personnage…). Tudert n lebγi n uneggal, yettaf-itt γer yiwudam-is. Iwudam d tilleli…
Neggel (romancer) a win a tin yettarun; senfalit iḥussan-nwen s tira n tutlayt-nwen:
Smedyez siwel tasekla;
Aẓar, tussna-s d tamussni
Ur teffiγ tikli i trewla
Mi ffγent tlisa i yigli
Suγ ay ul sendef tirga!
Yeččuṛ weswal n nnhati…
Moh Laid Deflaoui
