Iḍelli, terza-d tefsut n yImaziɣen. Tufaya-ɣ-d nuki, neduqqes, nbedd ɣef tfednin n yiffasen-nneɣ nettraju-tt di… Facebook. Ala lḥiḍ-nni azegzaw n Mark Zuckerberg i d aɣ-d-ṣaḥen kan. Yuɣal-aɣ am lḥiḍ-nni n umejed yellan di Tel-Aviv (Mur des lamentations). Taggara-agi, ula d win yuɣal yestewḥac, yessawaḍ ɣer Qliɛa, yuɣal-aɣ d lḥiḍ-nni n tugdi i nḥud di yebrir 1980.
Tafsut n yiseggasen-agi d-iḍefren lḥirak lmubarek « jemɛen-tt » seg iberdan, sselsen-as taqendurt n Leqbayel, ran-as abernus ɣef tuyat, ran-tt s ixxamen n yidles , ad tt-id wesfen di tlemmast n yijeqḍuren. Aṭas segneɣ i iferḥen s tqendurt-nni telsa tefsut, qqaren-as : « Dayen tura, steɛrfen s tqendurt-nneɣ, s ubernus-nneɣ akked ijeqḍuren-nneɣ, yeffeɣ leɛtab ɣer tafat ». Ula d isaragen-nni umɛinen yemmalen abrid n tlelli ugin-ten.
Acimi i yugin abrid, ugin asarag umɛin ? Axaṭer, di sin ddan deg ubrid n talwit, recqen ɣer tugdut akked tlelli.
D tidet, tamaziɣt « tunsibt », qqaren-tt di lakul. Rnu, lukan ad asen-nini : «Yak nukni d inselmen, ilaq ihi ad nɣer tamaziɣt s isekkilen n uluɣatu lquran », ad tekcem di lakulat n Lezzayer meṛṛa, ad tt-iɣer ula d llufan yellan di tɛebbut n yemma-s. Ttu kan tilelli d tugdut i tessawal, i tessaram tefsut, ad d-ldint meṛṛa tewwura, ula d tid n Qliɛa. Tamaziɣt yecban tin d tutlayt messusen am novlangue n Big Brother, yif-tt ulac.
Tafsut n tugdut d tlelli meqqret, nukni, ɣas meqqrit, ur tt-newɛi ara. Mačči d dderz i yessaweḍ ar ɣur-s neɣ d ijeqḍuren d-nessekfal i temzikeniyin. Hala leqraya i yessufuɣen. « Widen yeɣran ad mmlen i yimeɣban » i d as-yenna Lwennas.
Ass-a, adlis yettenfufud, yewɣer fell-asen ad as-ren takmamt. Ilaq ihi ad nḥader fell-as, ad t-ncebbeḥ, am tifirellest n tefsut, ad t-ḥemlen widen ara t-yeɣren, ad nadin fell-as, ad yebdu tettaɣ amka di ssuq n tutlayin, ad yeɛjeb tutlayin-nniḍen, ad t-id-ren ɣer tutlayin-nnsen, ad yuɣal d asaru…
D wa i d abriden (d yiwen seg yiberdan). Ihi, win yebɣan Tafsut, yarew-d tifirellest.
Tahar Ould Amar
