Yiwen wass, Yuc Ayyur yeẓra yiwen ilemẓi iteddu deg yiḍ abrid abrid n yiwet n taddart. Yettbin-as werraɣ wudem-is. Ayyur yenna d yiman-is: « Ilemẓi-ayi atan sellaw wul-is, yeččur d iɣeblan ».
Yuc Ayyur yeẓra ilemẓi d agujil. Yeẓra imezdaɣ n taddart-is yiwen ur yettmeslay yid-s. Yuc Ayyur iɣaḍ-it ilemẓi, dɣa yerza ɣur-s, yenna-yas: « nekk d yuc Ayyur, yuc n tziri. D nekk i d-yettaken tafat i tmurt, i wakken imezdaɣ-is ẓerren abrid ula deg yiḍ ».
Ilemẓi yessentta allen-is deg wallen n yuc Ayyur, yessusem. Yurc Ayyur yenna-yas: « Ack ẓriɣ a mmi d acu i k-yuɣen. Zriɣ kečč d agujil i telliḍ. Ẓriɣ ɣur-k iɣeblan akked imezdaɣ n taddart. Atan wudem-ik yuɣal d awraɣ, ul-ik yuɣal sellaw. Ihi tura yessefk a d-tessufɣeḍ ayen i k-yerran ul-ik sellaw. Ttru, ttru, a mmi ! Sufeɣ-d imeṭṭawen-ik, ad ires wallaɣ-ik, ad yecreh wul-ik. D acu kan ger tamawt, ur yessefk ara ad tesseɣliḍ imeṭṭawen-ik ɣef tmurt, ad tames. Tamurt yessefk ad tili tezga d tazedgant. D nettat i d-yettaken i wayen akk yeddren deg-s, s wacu i teddren. Ihi seɣli-d imeṭṭawen-ik ɣef yidmaren-iw, a ten-awiɣ ɣer igenni ». Ilemẓi yerfed allen-is ɣur-s, yessusem. Ur yessin ara d acu i d imeṭṭawen. Ur yessin ara amek ara-ten-d yessufeɣ. Imaren-nni imdanen ur ssinen ara d acu i d imeṭṭawen.
Aqcic yenna i yuc Ayyur: « Ur zmireɣ ara ». Dɣa Yuc Ayyur islef i yilemẓi aqerru-is, yessentta allen-is deg wallen-is. Dɣa ilemẓi yergagi drus kan, ɣlin-as-d imeṭṭawen ɣef yidmaren n yuc Ayyur. Yuc Ayyur yeǧǧa-t yettru almi i d-ffɣen akk imeṭṭawen-is. Din din yezmumeg ilemẓi, iḥulfa i wul-is yecrec, yezha! Yuc Ayyur iger-as iɣallen, yenna-yas: « atan imi tettruḍ tura yuɣal wul-ik yecreh. Ihi seg wass-a d asawen atan a k-ḥemmlen akk imezdaɣ n taddart-ik. Ad teddreḍ yid-sen di zzhu. Ur tettu ara d kečč i d amdan amezwaru deg umaḍal i yettrun ». Ilemẓi yenna i Yuc Ayyur s uzmumeg: « tanemmirt a baba Ayyur ». Dɣa yeṭṭef abrid-is s taḍṣa. Anida yemlal amdan yezmumeg-as. Nutni daɣen ttezmumugen-as-d. Yuc Ayyur yessentta allen-is deg ilemẓi, yezmumeg ula d netta, dɣa yuɣal ɣer igenni. Seg wass-nni imdanen ẓerren tiregwa imeṭṭawen n ilemẓi ɣef Yuc Ayyur mara tili tziri. Seg wass-nni zemmren ad ttrun yemdanen, ma ḥulfan s kra iqreḥ-iten. Mara d-fakken imeṭṭawen, ttḥulfayen d wulawen-nsen cerhen, allaɣen-nsen rsen.
Ilemẓiyen, tilemẓiyin n taddart tikwal, tikwal mara tili tziri ttalin ɣer yiwet n tiɣilt yellan sennig n taddart-nsen ceṭṭḥen i yuc Ayyur.
Akli Kebaili,
Frankfurt/Main
