Mačči d ayen ur nezmir ad d-nini ara γ-yekksen ayen nra ad t-naru. Tira tezdeγ tal tallit d yal adeg ; tezga gar tudert d tmettant, gar tidet d tilawt…gar tmedyezt d tsekla. Awi-d kan ad nesdukkel awal d umeslay! Ur yeffiγ wul allaγ-is, idim d aẓar n tasa-w skud imru-w d inigi. Tawla yessufγen tesmeḍ, tecba iṭij n tmurt-iw. Tira yeffγen ṣṣwab, ur nwiγ d tasekla…
Ula ara d-rnuγ; ad nessihrew kan teγzi n tewzel n usefru:
Selmadeγ i yiman-iw
Amek ara ad lḥuγ ma lhiγ
Mi sdurruqeγ iman-iw
I d-terza leḥya ur ḥṣiγ
Asefru-inu d agrawliw
Yal ddel ddiγ fell-as
Гerqeγ deg temda n ṛṛwaḥ
Ur rriγ targa i lebγi
Teğğa-yi tegmat n smaḥ
Mi ğğiγ adrar n tziri
Acḥal i iruḥen d lerwaḥ
Akukru yegguni-yi…
Tezga deg-i tmes d asteqsi
Amzun ad tekfu ddunit
Iγes n wakal d inigi
Гas akken ṛṛuḥ yeffeγ-it
Gar yidurar-iw d ifri
D iγes-nni i d talalit
Lmut d afrag n trusi
Mačči d taggara n tudert
Wid yerran tussna d tiγri
Lmut d taqṣiṭ n tudert
Гef waya i yeεreq lewhi
Awal n usteqsi d tudert
Kecmeγ di sḥur n tẓuri
I d-yeldin ul i wallaγ
Deg tama yedkem yimi
Ḥulfaγ i wul-iw d adγaγ
Rfiγ εyiγ di tsusmi
Ziγ tebrek udem-is werraγ…
Moh Laid Deflaoui
