Uɣaleɣ-d ɣer Umkan n wis d acu-t. Uɣal ttwasneɣ am timbre. Ansi i ɛeddaɣ, ad as-sleɣ i : « Azul a Tangalt ! ». Ddurt-a mmlaleɣ nna Lǧuher. Tban-iyi-d zin-as d agraw kra n yilmeẓyen. Qarbeɣ s agraw. Sliɣ i nna Lǧuher tettmeslay ɣef tsekla. Mazal-tt, ula mi d-tunag ɣer da, teselmad. Uẓaɣ s agraw. Twalayi-d nna Lǧuher, tessusem, neṭqeɣ ɣur-s…
– Azul a Nna Lǧuher !
– Azul a Tangalt. Amek akka tella tmurt ?
– Mazal-itt akken tt-n-teǧǧiḍ. I kem amek telliḍ a Nna Lǧuher ?
– Akken twalaḍ mmlaleɣ-d widak akked tidak ḥemleɣ. Ferḥeɣ dayen kan mi ẓriɣ yemma.
– Mebla cekk tferḥeḍ aṭas. Cfiɣ tenniḍ ɣef yemma-m : « Je la pleure pas parce qu’elle est morte, je la pleure parce qu’elle n’a pas vécu (ur ttruɣ ara axaṭer temmut, ttruɣ axṭer ur teddir ara)
– D tidet a Tangalt, yemma d tlawin n tallit-nni ur ddirent ara.
– Amek i tt-id-tufiḍ.
– Thenna, xas ulamma yella cwiṭ-nni n lweḥc n lfiraq.
– I kem a Nna Lǧuher ?
– Kifkif ula d nek. Jmeɣ-kun daya, wamag deg umkan-agi n wis d acu-t d talwit i iɛumen. Rnu, akken i d am-d-niɣ mlaleɣ-d akk widak ḥemleɣ. Iḍelli kan tuɣ-iyi akked Faḍma n At Mansur.
– A rrezg-im a Nna Lǧuher, ad terwuḍ widak-nni akked tidak-nni iɣef turiḍ.
– D tidet !
– Ma d nukni teǧǧiḍ-aɣ-d lweḥc.
– Ula d nek teǧǧam-iyi-d lweḥc. Lḥasun, ad nuɣal ad nemlil, d tamsalt n lweqt. Siwweḍ-asen slam-iw i widen ḥemleɣ, Ɣnima d wiyaḍ meṛṛa.
– Ad yaweḍ a Nna Lǧuher.
– Ur tettu ara Ali-inu !
– Anwa Ali ?
– Ali Mouzaoui. Ini-as : n’arrête pas de tourner comme un poème.
Tahar Ould Amar
