Ddurt yezrin, nemlal akked Muḥ Usliman ( akka i d as-qqaren i Meksem Slimane). Newwi-d awal ɣef wawal. Iɣimi d Muḥ Usliman d acali seg wawal ɣer wayeḍ. Ahat aṭas seg yimeɣriyen n Tangalt ur tnessin ara. Maca, mebla ccek, teslam i tmedyazt-is mebla ma teẓram belli ines. Atas seg icennayen d-yufraren, i « yeṭṭfen taqacuct » (xersum tqacuct médiatique) i d-yugmen seg wayen d-isefra. Mi t-nesteqsa ɣef aya, yecmumeḥ kan, yenna-k : « wwet, ɛeddi ! » Lḥasun yerra-d ɣef yesteqsiyen d as-nefka s… wawal
Azul ay amedyaz. Ma ulac uɣlif, ad aɣ-d-iniḍ anwa i d keč ?
Nek isemsed-yi nnif
Akken ad iliɣ d nek
Iseḥfa-yi lḥif
Ḥesleɣ deg ulamek
Ayen d-teqqareḍ d awal, d asefru neɣ d tamedyazt ?
Qqareɣ-d awal
Akken d-ttruḥu
Tikwal yessawal
Yečetki
Yettru
Tikwal d tiḥemmal
Ttaraɣ-t d asefru
Tikwal yecba dduḥ
Izuzun-iyi
Am ṣebyan ad iyi-dduḥ
S usirem akked umeni
Mi d-ukiɣ ad iruḥ
Ad uɣaleɣ d nekkini
Ad d-nedfen akk lejruḥ
Ad ḥettbeɣ di cwami
Lunis ?
Yezwar s lqern ar sdat
Isefra-s am tɛekkazt
Yesen nettɛekkiz
Lwennas ?
D itri i iɣum usigna
S wawali yettmuqul
Xas iruḥ
Mazal-it yella
Iteddu-d di lemtul
Ad nuɣal s ayen d-yenna
Yenna-d ddunit d lakul
Si Muḥ Umḥend ?
D lsas usefru
Argaz
D win ibennun
Mačči d win yetthuddun
D win i tent-iferun
Mačči d win itent-idelun
D win itent-iferun
Mačči d win itent-ččudun
D win yesdukkulen tagmat
D wi itent-yettqabalen
Tameṭṭut ?
D nnif
D zerb
D laɛnaya
Zik, di tuddar
Ass-a ?
Tayri ?
D asteɛfu
D ddwa n wul
D raḥa n walaɣ
D laman
Tezeɣzaf leɛmer
Tagmat ?
D afud
D lǧehd akked tilin
D tuyat yedduklen
D latskal, d laman
D ddwa
Taqbaylit ?
Aaaaah taqbaylit
Leqbayel bnan tuddar
Di tmurt taberranit
Tuɣal kan i ubendayer
Akked d uhuzu n tqesrit
Win tt-ixedmen yenger
Win tt-yesxedmen terfed-it
Yesteqa-t Tahar Ould Amar
