Deg xemsin n yiseggasen ineggura, tezga tettbeddil tsekla taqbaylit. Nnulfant-d tewsatin d timaynutin, ggten deg-sent wudmawen n usnulfu; tiwsatin yellan yakan, am tmacahut d tmedyezt, yella deg-sent ddeqs n usetrer. Tin yernan ɣer wayagi, banen-d aṭas n yimura, tuget deg-sen d ilmeẓyen ; wid-nni meqqren, di tegti, ttkemmilen ttarun. Tineggura-agi, simmal tettnerni tsekla n teqbaylit simmal ttbanent-d tlawin yettarun ; yettimɣur umḍan-nsent. Mačči kan daya, akken yettimɣur umkan-nsent i ttarunt yal tawsit.
Dacu kan, ɣas llant, ɣas yettnerni umḍan-nsen, ɣas gar-asent, llant tid yuran nniɣ yiwen n udlis, ɣas gar-asent, llan tid yuran deg waṭas n tewsatin, atg., mazal-itent ttwaḍerfent deg wannar aseklan. Tin yernan ɣer-s, tuget deg-sent, ur ttwasnent ara. Nnig n wayagi, llant tid amzun ur llint, idlisen-nsent, ur d-tbanen di ssuq, ulac awal la fell-asent la ɣef yidlisen-nsent.
Gar tmedyazin, tella : Ait Ali Toudert, Aknine Mekioussa, Allad Samia, Amellal Dyhia, Amrani Samira, Baghded Laldja, Baya S, Ben Amer Nadya, Ben Gana Chabha, Ben Rabaḥ Tinhinan (Massa Uciḥa), Ben Sidhoum, Rachida, Benamar Nadia, Bouchelil-Chabni Karima, Bouhar Aldjia, Cebbiri Farida, Chaouane Malika, Cirik Samira, Djurdjura Kenza, Fadali Zahra, Harceb Tinhinan, Kaneb Louisa, Khira Tudert, Koudache Lynda, Lidya n Ǧerǧer, Mehdi Samira, Mofredj-Snaoui, Malika, Mohammadi Anissa, Nait Ouyahia Nadira, Nayt ΣebdelƐaziz Unisa, Nna Unisa, Sadallah Houria, Saɛd SilyaSediri Fahima,Taferka Djamila, Taleb Doudja, Tilelli n Miẓrana, Touat Katia, Zitouni Fatima, atg.
Gar tid yuran ungalen d tullisin, tella : Aggaz-Yahiaoui Mina, Akeb Nadia, Anaris Jedjiga, Aoudia Zohra , Belaidi, Jedjiga, Belhadj Baya, Bellal Tilelli, Ben Gana Chabha, Benazouz Naima, Bensidhoum Rachida, Bouhar Aldjia, Cherifi Nacera, Dwala Wezna (Hantour Lynda), Harikenchikh Siham, Hocini-Abdelmalek Samira, Keddache-Chikh Dalila, Khalifi Kaisa, Koudache Lynda, Lagha Zohra, Lwiz Dihya, Maouchi Nawal , Mezouari Aldjia, Oulebsir Fadila, Sahoui Farida, Serik Liza, Silya Mula, Nait Djidji, Takkouche Chahinaz, Tilyuna Su, Touati Massika, Touati Zoulikha, atg.
Llant diɣen tid i d-yelhan s tewsit n tmacahut. Ddeqs deg-sent, yerna aṭas deg-sent ulsent-asen tira i yiḍrisen n tmucuha, tuɣal tedyizt-nsen (poétique) d tamaynut. Gar-asent Nadiya Ǧaber, Tassadit Yahyawi, Sonia Lounis, atg.
Yuwi-d ad tent-nissin, ad nissin ayen urant ; yuwi-d diɣen ɣef yinelmaden n tmaziɣt ad rren ddehn-nsen ɣer yidlisen-nsent, ad xedmen fell-asen tizrawin n yikatayen-nsen.
Muḥend Akli Salḥi
