Aḍref , d ammud n yisefra n Muḥend Nayt Σebḍella i d-yeffɣen deg 2003. Deg wammud-a, llan 30 n yisefra, anda yal yiwen ɣef wacu i t-id-yewwi, tuget deg-sen qqnen ɣer tmagit, imi d tamsalt i iceɣben yal Aqbayli, am Muḥend Nayt Ɛebḍella i yellan d ameɣnas, yettwaḥebsen deg Tefsut n 80, gar terbaɛt n 24.
Am wakken d-nenna, yal asefru s wazal-is : wa d tajmilt i tyemmat, wa d asḥissef ɣef lmut-is ; wa ɣef tegrawla d wayen d-txulef, wa ɣef seld timunnent d wayen d-isaren segmi tefra ; wa ɣef tesfuyin n 80 d tberkant, wa ɣef tegmat d teɣdemt… Yeẓḍa-ten-id akken i mseḍfaren yineḍruyen, ahat ɣef waya i as-isemma aḍref, deg-sen ad negzu aṭas n temsal i icudden yakkan s amezruy.
Tayemmat, anwa ur as-nefki azal, anwa ur tt-neḥsib nnig wayen akk yellan, imi am nettat am ubabat, xeddmen nnig tezmert-nsen akken ad rebbin tarwa-nsen, akken ad ten-ssawḍen d irgazen d tilawin ad tteklen fell-asen. Ma ddukklen yimawlan, a rrebḥ a tafat, agrud ad d-yekker wa ad d-yegmu i liser, ma ixus yiwen seg-sen, lixsas ad d-yekker d ugrud-nni.
Tagrawla, aṭas i tesgujjel, aṭas i yeǧǧlen, deg wammud-a n tmedyazt, amedyaz-a yesseken-d d agujil i d-yekker, imi baba-s yeɣli d ccahid, d yemma-s i t-id-isekren, yemma-s d azal-is, aṭas i teɛteb fell-as, tamettant-is teɣza deg-s d cwami:
Iẓri akken yebɣu iru
Ur d-yettarra win yemmuten
Tarwiḥt ur tt-id-ifeddu
Γas ad iru idammen
Yemma ɛzizen ur tt-ntettu
Tedder s wayen i aɣ-texdem
Akken i mseḍfaren yineḍruyen deg umezruy, i mseḍfaren yisefra-ines, yules-aɣ-d ɣef wamek d-kecmen Yiɛraben tamurt, ɣef ddel srewten, s tneslemt d ssif-nni d-wwin :
Semmḥet-iyi ad awen-id-ḥkuɣ
Γef uberrani asmi d-yekcem
Ass-nni d ayen ur tettuɣ
Γef umnar anwa i d-ibedden
… … …
Seg wass-nni yeddem aɛekkaz
Anda i as-yehwa i aɣ-yettarra
Yuɣal di teswiɛt d lbaz
Mbaɛid ala aɣ-d-yettɛassa
… … …
S ddreɛ nuɣal d inselmen
Taɛrabt d tutlayt n lejdud
Deg usefru-ya iwumi yefka azwel Taḥkayt-nneɣ, d yger tiɣri i tarwa n Tmazɣa akken ad akin d yiman-nsen, tiɣri-s yewwi-tt-id s uwadem i d-yesbedd s yisem n Jeddi, imi amzun akken ur ihenna ara anda yella, mi d-yettwali tarwa-s deg wakal-is meḥquret, yessakay deg-sen, yeqqar-asen :
Ur d-neɣli seg yigenni
Ur d-nunag ɣef yileɣman
Meḥsub d nutni i d tarwa n laṣel.
Tagrawla , Agrawliw, d isefra anda i d-yettales ɣef wamek i ttḥaraben mgal Aṛumi. Baba-s, agrawliw yeɣlin ɣef tmurt-is, deg usefru Cfiɣ ɣef wass-nni, yettales-d ɣef tmettant-is, xas meẓẓi, maca cfawat qqiment :
Cfiɣ ɣef wass-nni
Γes tǧeɛleḍ-iyi meẓẓiyeɣ
Cfiɣ tura ɛamayen
…..
Yemma tecfiḍ ɣef wass-nni
Asmi d-neẓra anda meḍlen
Baba ɛzizen ur t-ssineɣ
Tagrawla, d tin d-yeǧǧan cfawat qessiḥen, yakkan ɣef tuǧǧal d tarwa-nsen-t, ass ideg tefra, ggran-d ur sɛin azal. Uzlen yidammen n yirgazen akken ad ɣelten yimcumen,. Deg usefru Arraw n tuǧǧal, yeqqar-as :
Qqaren-aɣ arraw n tuǧǧal
D ibabaten-nneɣ i nečča
Ttun win yečča wakal
Yeɣlin ɣef Lezzayer n wass-a
D lgirra i aɣ-ǧǧan d lfal
D wid yeddan d Fransa
Ar ass-a ḥesben-aɣ d lmal
Σelfen-aɣ melmi i asen-yehwa
Teffeɣ Fransa, isuḍ-d waḍu-nniḍen i tt-yugaren. Ferḥen yemdanen s timunnent, ziɣ i iɛeddan mazal kter. Adabu simmal yettḍeqqir-d tisuqas-is. Nnuɣen ɣef Lezzayer tazzayrit, akken ad afen Lezzayer taɛrabt tineslemt, sbeɛden Timuzɣa-s, neṭṭlen tamagit d yiẓuran-is n tidet.
Agdud ur yeqbil aya, d win yukin s laṣel-is, yekker-d yennuɣ mgal adabu, yessuter tilelli-s, tutlayt-is d wayen akk i icudden ɣer tɣerma-s d yidles-is. Ineḍruyen deffir wiyaḍ, amennuɣ deffir wayeḍ, almi d-bɛezqen di Tefsut n tmanyin. Neẓra akk amek i d-tebda d wacu d-tegla. Amedyaz-a, yekki deg yineḍruyen-a, yettwaḥbes ula d netta gar terbaɛt-nni n 24, dɣa tirmit-is d wayen d-yesɛedda ass-nni, yules-aɣ-tt-id deg usefru Ameḥbus.
Yules-d liḥala n umeḥbus, liḥala-s netta asmi yettwaḥbes d wid akk d wi yettwaṭṭef. Deg usefru-a ad d-nwali ddel, tamḥeqqranit, tteɛssir anda i d-ɛeddan, tisiswa n tyemmatin-nsen ḥerqent ɣef tarwa-nsen-t ur neẓri anda i d-ggran.
Awal-nsen d rregmat
Rnu tiyita
Ad d-sersen imawlan-ik
Ad ak-rẓen lḥerma
Deg sin n yisefra-nniḍen Yebrir akked Ayen, yemmeslay-d ɣef snat n Tefsuyin ; tin n tmanyin (80) akked tin n 2001. Tafsut, d tallit n cbaḥa, n tzegzewt, n yijeǧǧigen yefsan, n tegnewt zegzawen, tigad-a xulfent. Tɛedda Tefsut n Yimaziɣen, nnan dayen yekfa ddel, telḥeq-d tefsut n 2001, tegla-d s tebrek, texleḍ tzegzewt d tezweɣ n yidammen n yilmeẓyen yemxelbaḍen akked lmut wer lebɣi, i yeɣlin s terṣaṣin d-serḥen qebbaḍ lerwaḥ imesbaṭilyen, win yemmuten yemmut, win d-ǧǧan d ameɛḍur ǧǧan-t-id.
Ddel, ulac win t-iḥemmlen, ma d win d-yetturebban fell-as, akken qqaren at zik : «Awer t-yerwu». Akken i llan yirgazen lɛali, i llan yir irgazen, akken fkan yirgazen n tidet iman-nsen d asfel, i d-ǧǧan deffir-nsen at uɛebbuḍ d wid yeznuzuyen nnif-nsen ɣef ciṭ n tedrimt. Nzan yirgazen s wulac, walan lbaṭel ɛemmden, ddren deg-s ur d-cliɛen, tteklen ṭṭfen imukan, ttun akken yella walluy, i tella trusi. Deg usefru A wid yenzan, yeqqar-as :
A wid yuɣen
D acu teswam
A wid yessusmen
S wacu tenzam
Yiwwas ad tseggem
D lmut ad tt-tḍelbem
Ad ken-id-yerr wakal
S wayen i tenzam
Acu kan xas nzan kra, tugett ddren s yiseɣ-nsen, s nnif-nsen, ɛemmden ad yazzl yidim-nsen, awi-d kan ad idiren di tlelli. Deg usefru Afus yumsen idammen, yeqqar-as :
Ayen yettduxxunen ur yettnus
Deg-s ffɣen-d yiṭiwjen
Tilelli teɣleb leḥbus
Kra yella d ticraḍ s yidammen
….
Win yemmuten yugi ammus
D iseɣ yettaǧǧa-d isem
Azref, anwa ur t-nessutur d amur-is, lḥeq anwa ur t-nebɣi ad d-iban ! Agdud aqbayli neɣ amaziɣ s umata, d aya kan i yebɣa, ad d-iban leḥq-is, ad d-binen yizerfan-is d tidet sdergen wid iḥekkmen. Bɣan yal wa ad t-id-yuɣal wayla-s, yal wa ad iɛac di tlelli-s. Deg usefru Izerfan-nneɣ, yeqqar umedyaz :
Tiɣri i d-yekkan si lqaɛa
D tiɣri n yidammen yuzzlen
D izerfan-nneɣ i nebɣa
Ur nebɣi ayla n medden
Lezzayer, mazal-itt teɣreq, wid i as-yebɣan leslak ad t-nɣen neɣ ad t-nfun, kullec deg-s yeḍra-d, mazal a d-iḍerru. S tneslemt sserwaten deg ugdud, nɣan akk deg-sen asirem. Xelqen-d rrebrab, i iqeḍɛen i ugdud kullec, ẓẓan deg-s tuggdi. Asefru Teɣreq, d aglam n liḥala n tmurt yakkan deg tɛecret-nni taberkant :
Teqḍeɛ dayen tikli n yiḍ
Ulamma lewḥuc fukken
Lxuf yeǧǧa-d d ayen isiḍ
Seg wayen walant wallen
Mi ara teẓreḍ aqerru ɣef lḥiḍ
Mebla ṣṣura n bnadem
Agrud yewwa d aqeṭṭiḍ
Imawlan-is mmezlen
Taqcict ḥewsen-tt tettɛeggiḍ
Tefsed tezweǧ d yinselmen
Tatut , Mḥend d Mḥend, Yir tadukli d isefra-nniḍen anda i yesḥassef umedyaz-a ɣef tmeddurt i d-neggra. Nettu irgazen yefkan iman-nsen d asfel, isem-nsen yedda d tatut, nettemqaraɛ gar-aneɣ, nettruẓu ifadden i tegmat d tdukli.
Taqbaylit d Taɣdemt la d-ssawalent ɣer Tagmat, akken ad huddent yir tadukli.
Amud n yisefra-a, d tullsa ɣef yineḍruyen d-tedder Lezzayer d tmurt n Leqbayel, deg-s tiɣri n tegmat d tdukli, deg-s asuɣu ɣer teɣdemt d tlelli, deg-s diɣen asḥissef ɣef yal tagnit d-nedder ama deg tegrawla-nni ama seg timunnent n tmurt ar ass-a.
D ayen d-yedder umedyaz s timmad-is, d tid iwumi i iḥulfa s waṭas, d tid diɣen i as-d-yeǧǧan cwami d cfawat qerriḥen i-d-yewwi d asefru.
