Tamedyazt n Lewnis At Mangellat d tamesbaɣurt, mačči ala taḥawact-agi n tesnukyest i izemren ad d-yefruri deg-s. Ay-en yugaren tiɣri di tezlitt-agi d tiririt i teɣri, ama mqadwant tektiwin neɣ d tinemgalin, d tlalit n yiseqsiyen n umseflid d imeɣri.
A wid yeqqaren,
I d aɣ-d-yeqqaren
Ma tufam sanga teffeɣ.
A wid ifehmen,
I ɣ-d-isefhamen
D acu i d-yeɣlin fell-aneɣ.
Lḥif i d-ittasen,
Deg-s nessasen,
Yennum abrid ɣer ɣur-neɣ.
Nedder di wissen,
Yexṛeb kra nessen,
Yal lhemm yegla yis-neɣ.
Ad neɛreḍ ad d-nefk cwiṭ si tmussni-nneɣ ɣef usefru n tezlitt-a.
Tikti tamenzut ara d-yasen ɣer lbal n yal amseflid n tezlitt-agi d Tiɣri n umedyaz. Am wakk-nni i ɣ-yessaɣ tannumi, awal-is yessenququl allaɣ, yessawal i takit d umeyyez deg way-nni i tettidir tmetti.
Tizlitt-agi d tasleḍt d wesqerdec n tegnitt iɣer tewweḍ tmetti di tallit n wass-a. Tebna ɣef teɣri. Tiɣri teɛna kan bab-is : “wid yeqqaren”, “wid ifehmen”, “wid iferrun”, “wid yetthuddun”, “wid yettwalin” d “wid iceffun”. D “wiyaḍ”, nitni, i wumi yettmeslay. D awal sseg-s ɣer-sen. Ulamma isental n teɣri ffɣen-d amzun d aseqsi, amedyaz yemla-asen tamuɣli-ines.
S yiwen wawal, amdan di timmad-is d bu-leɛyub, amgired yella kan ger win i izewwiren s asufeɣ-nsen d win izemren ad aten-yekmen neɣ ad aten-iṣeṛṛem s ufus-is sdat wallen n tmetti.
Asefru yebḍa ɣef 8 tiseddaṛin, s wanya swayes i ɣ-yessaɣ tannumi nsell-as di kra n tezlatin yezrin. Yal taseddaṛt n 12 yefyar ḍefren-tt 8 yefyar nniḍen. Ɣef wakk-nni nwala, taseddaṛt tamezwarut yessers deg-s tasemḍit n wawal ɣef lḥif d wexṛab n tmussni. Ma d snat tineggura, d tagrayt n wawal, yemla-d deg-sent “wid yettwalin” d “wid iceffun” wuɣur tezmer ad tili tsarutt n tifrat. Tiseddaṛin nniḍen d asefruri i sin-agi wuguren n tmetti.
Ma nesnetqed asmedyez s timmad-is, ad naf asefru meṛṛa iṛuḥ d tiɣri-aseqsi-ameyyez, d timli war-aḥettem n tektiwin-is. D azuzer s wawalen n yal ass i wid yebɣan ad ẓren… Yal amseflid neɣ imeɣri yezmer ad iḥulfu i yiman-is yeɛna-t wawal-agi. Tamedyazt, s umata, tebna s wafyir, tameɣrut, tiktiwin d tesnukyest. Kra si tunuɣin i nwala d tigi:
– Awudem n wagens n usefru d “nekni”, d analas s yisem-is d aɛeggal di tmetti-agi iɣef yella wawal.
– Tazelɣa n teɣri, iɣef d-nemmeslay iwsawen-agi, i wumi ara nernu aseqsi usrid/arusrid “Ma tufam sanga teffeɣ” d wemyag anaḍ “Mlet-aɣ”.
– Tagaḍert : Anamek di kra yefyar itemmed deg yefyar i ten-yeṭṭafaren :
“Wid yettɣaḍen nnan:
D yir targit i d-aɣ-yeṭṭfen”,
“Wi innumen tthuddu
Ur yelli d abeṛṛani”,…
– Tanɣumnayt:
“Lḥif i d-ittasen,
Deg-s nessasen,
Yennum abrid ɣer ɣur-neɣ”,
“Yeḥbes wallaɣ di tcacit”,…
– Tasezdit n tefyar:
“Ntettu ceffun, ssnen ad ddun…”,
“Ttweṣṣin rennun”.
– Tasnemgelt :
“Ma nṣubb, ma nuli,
Lbaṭel yezwar lḥeqq.”,
“Nettkemmil tikli,
Lebɣi-nneɣ nugi ad at-nelḥeq”,
– Tifyar tuddisin s tesɣunt n tewtilt “ma”, amtawa “ɣas”, akud “mi” d “almi”, iswi “akken”,…
Tamedyazt n Lewnis At Mangellat d tamesbaɣurt, mačči ala taḥawact-agi n tesnukyest i izemren ad d-yefruri deg-s. Ay-en yugaren tiɣri di tezlitt-agi d tiririt i teɣri, ama mqadwant tektiwin neɣ d tinemgalin, d tlalit n yiseqsiyen n umseflid d imeɣri.
