Deg taddart llant-d rebɛa tmeɣriwin deg yiwen wass. Ameddakel-iw yufa-t-id lḥal yerzef-d, yuwi-id kra wussan ad ten-yesɛeddi gar lḥbab d yimawlan, yusan-d seg lɣerba.
Mi t-id-yufa lḥal da, ula d netta yettwaɛreṭ ɣer tmeɣriwin-a. yettwaεreṭ ɣer uquffi, yettwaεreṭ ɣer imensi. Ameddakel-a-inu, mara d-yas, yetthibbi ad iliɣ did-s. Lweqt-nni uquffi yeɣra-iyi-d ad nequffi lwaḥid. Arrac imeẓyanen akk ttnaɣen akken ad ddun did-s. Ttḥibbin ad ddun did-s, axaṭer ssnen-t yettḥibbi zzhu. Ccna n tmeɣriwin ur iḥebbes ara deg tkeṛṛust-is segmi ara ruḥen ad d-awin tislit, alami tekcem axxam-is ajdid. Icennu, iceṭṭeḥ did-sen, yettxelliṣ-asen ula d leḥlawat!
Takeṛṛust mačči d away i tt-id-yuwi did-s seg lɣerba, d lekra i tt-id-yekra da deg tmurt.
Deg yiṭ, yeɣra-iyi ad nruḥ lwaḥid ad nečč imensi, ad d-nezzi i rebɛa yixxamen. Imeɛraṭen n uxxam amezwaru, meḥsub d widak i d imeɛraṭen n yixxamen niṭi.
Nečča, nfuk, nesserbeḥ-asen tmeɣriwin i yimawlan-nsent, mi nbedd ɣur-sen. Učči nečča, tissit neswa, anejmaɛ ɣer uxxam mazal lḥal, alama nedda abrid abrid ad nqesser.
Nuwi-d ameslay ɣef tmeɣriwin gar zik d tura, nerna nemmeslay ɣef tmeɣriwin n wass-n. Nniɣ-as:
– Nniɣ-ak ay ameddakel, rebɛa tmeɣriwin deg yiwet taddart, deg yiwen wass, mačči d ccɣel. Ukan d ṛṛay-iw: ad d-naf axxam ameqqran, ɣas mačči deg taddart, ad nezdi merra medden dinna : tulawin irgazen, lwacul tiqcicin, inebgiwen n yal yiwen, ad ccen merra medden din, ad yeɛmer wurar din… Fiḥel tixessaṛin-a akk, ernu, ad ttruḥum imeɛraṭen seg uxxam ɣer wayeṭ am akken i teṭra ass-a deg tmeɣriwin-a i neḥṭer akka. D acu i tenniṭ?“
Yenna-iyi-d: » ṛṛay-iyi-inek d lɛali-t. D acu kan, awal-a « axxam ameqqran » ur as-d-ttɛawad ara!
