Reffu akked tismin ɣef tnekkit d tlelliyin nfufden, nfufden, nfufden… alarmi d-snefgen, di tefsut n 1980 : « A bas la répression ! Liberté d’expression ! Tamaziɣt di lakul !…. ». D tulwigit (pacifisme), mačči d tankriṭ, i igan irebbi ireffu-nni n yilmeẓyen n tmurt n leqbayel. Ass-nni, yettwakfel-d « kker a mmis umaziɣ », n yimeddukal n Laimèche. Ass-nni, ɣur tugdut i twehha tmuɣli, Ilul-d usirem anect-it, yettwakes lqid i yiles ….numen ad ifak Rebbi lḥif.
Tifsuyin timezwura d-iḍefren tin n tmanyin ur brint ara i ṭbel deg waman, ččurent iberdan n reffu s talwit, beddent am «ⵣ »deg udem n wudabu i yebɣan ad tent-yer s akufi n Le mois du patrimoine (aggur n tgemmi) akked tqubet n Yawmu lɛilm, ad tent-itettu di Tugdud d tlelliyin. Dɣa,ad asent-d-tugri tutlayt d taḥerfit ara ibeddun s lḥemdu tettfak s lḥemdu. Ɣas ini-d d « lfil-nni wi sin » ara yesnegren tamaziɣt s tmaziɣt. Aya, yebda la d-yettban di tudrin i yeṭṭfen amezir i kra n wayen i d aɣ-yesemxalafen d wiyaḍ : semenyafent « ifṭar ǧamaɛi » ɣef twizi, « qufet ramaḍan » ɣef tdukkli d tegmat, awal n cix n lǧama ɣef win n Ṭamen, lḥiǧab ɣef umendil bu tetbirin, yenna leɛqel d lmeɛqul ɣef « rawahu Lbuxari »…
Acḥal aya, uqbel anfufed n « corona » , Tafsut n tmanyin tuɣal d awal kan, d waqila, d…tanselt (rumeur). Teǧǧa iberdan, tesmar affad-is, reffu-s di internet. Teǧǧa iberdan, saḥen-tt-id tmeɣriwin, isefra akked yifeqlujen deg yixxamen n yidles. Asenjaq-nni ? Cccet, lemer win d-iselen !
Ddurt-a, ad d-nesmekti tafsut tis 44. Ad tt-yekker wahruḥu di…internet. Berbère-tv ur teččuḥu ara, ad as-d-ɛiwed i tikkelt tis 44 i usaru n Tefsut.
Ɣef wayen d-yecqan tafsut, ɣef tirga-s uɣur nessaweḍ ara, ɣef wamek ara yili uzekka, ɣef, ɣef…, ur d-yettili ara wawal, aseggas-a daɣen.
Tahar Ould Amar
