Tasekla d anamek ɣef ddunit d tudert d umdan. Nenna-t-id tikkelt yezrin. Nenna-d diɣen : ula d azɣan d anamek. Azɣan-agi, yetteɛrak-t-id umsezɣan akken ad yesseqreb tidmi n win d-yesnulfan aḍris aseklan i unermas-ines (d ameɣri neɣ d amseflid). Meɛna… azɣan mačči d tamsalt-nni : « nekk, akka i ɣriɣ/ttwaliɣ aḍris-agi ».
Azɣan d taɣuri s tiṭ yettanin anamek. Azɣan d tikci n yisallan i yebna bab-nsen s waddud-nni i as-yebded i tɣuri n udlis. Azɣan mačči d tamuɣli, mačči d tin akken « wagi d rray-iw ».
Azɣan aseklan, akken ur yelli d tiyita, ur yelli d acekker. Azɣan d timenna n wamek yeẓli (distinguer) udlis ɣef wiyeḍ. Deg lebni-nni n uẓlay i yettili uzɣan. Azɣan d azeṭṭa n unamek. Mačči d rray.
Azɣan d abrid yettawin s igli uɣur yessewεed/iwehha uḍad n umeɣri amsezɣan ; deg yigli-nni i yerra amur n unamek i yebɣa ad t-id-yini. Amur-nni nniḍen, ad yaf yiwen deg tikli-nni yettawin seg yixef n uḍad ɣer tecwawt n yigli. Azɣan d lebni n unamek. Mačči d rray.
Assaɣ n uzɣan d tsekla, yebded ɣef sin n tgejda. Zemrent ad ilint di snat ; tezmer ad tili kan yiwen.
Tigejdit tamenzut d asenṭeq n unamek yellan deg uḍris. Mi t-id-yemla umsezɣan, yesken-d ayen ibanen d wayen yeffren deg-s, ad d-ibin wazal-is i umdan d tmetti d yidles. Imir, yettuɣal uzɣan d asaka yesεeddayen anamek yersen deg uḍris seg ugemmaḍ ideg yella bab n uḍris ɣer ugemmaḍ n umeɣri. Ma ur yebni unamek-agi s tmuɣli tamesfukelt, ur yettili wayen ara yezrin deg tama ɣer tayeḍ ; ur d-yettban usaka, ur yettili uzɣan.
Tigejdit tis snat d asewεed ɣer wayen iwala umsezɣan « yezleg » (ayen yeffɣen ɣef ubrid akken i t-iwala umsezɣan neɣ/d wat zzman-is) deg unamek yersen deg uḍris. Tamuɣli n umsezɣan, imir, akken tezmer ad tt-id-yessenfali usḥisef (ɣef wayen « izelgen ») i tezmer ad tt-id-yini s uεeggen akken imdanen d tmetti ad zzin fell-as tamuɣli. Ma ulac lebni n unamek s yinaw ibedden ɣef tedmi tamesfukelt, ur yettili uzɣan.
Ma d win/tin issefken ad yexdem azɣan, d tamsalt tayeḍ. Ad d-nmeslay fell-as ddurt i d-iteddun, ma nufa neɣ nestufa…
Muḥend Akli Salḥi
