Niqal d abrid ɣer Curfa,Taqerbust, Iwaqquren akked Mcedella. Akken neffeɣ Tazmalt, yeslalew tilifun. D yiwen n umeddakul i yeslan di Tezmalt i d aɣ-tuɣ, dɣa yessawel-aɣ-d : « ma yella, ur teddam ara aṭas deg ubrid, ɣas uɣalet-d. Aqli en panne. Rnu ilaq ad kecmeɣ ass-agi s At Wasif ».
Nuɣal ɣer Tezmalt, newwi-d ameddakul-nneɣ. Neṭṭef abrid. D aɛeddi kan ɣef wakal n Tubiret. Mi nessaweḍ ameddakul-nneɣ ad d-nezzi ɣer Mcedella, Taqerbuzt, Curfa, Iwaqquren..
Ur nɛeṭṭel ara newweḍ ɣer Tikjda. Abrid yexla. Ḥala tisuta , izgaren akked teqraɛtin n lbirra i t-iɛemren. Nenna-yas ad neḥbes cwiṭ tama n tleṭṭaṭ, ur neḥbis ara : ameddakul-nneɣ tuqeɛ deg-s tmellalt iḥar ad yaweḍ s axxam. Newweḍ ɣer bracma yettawin s Ibudraren d At wasif. Neṭṭef abrid n At wasif. Akken nekcem At Tgemmunin, iḍher-aɣ-d MuḥduRemḍan rrif n ubrid amyettrajun afurgu neḥbes ar tama-s, iɛqel-aɣ-d yecmumeḥ:
– Acu i kun-id-yewwin ɣer da ay ibandiyen ?
– D abrid kan a Muḥdu. I keč, acimi tbeddeḍ am point d’exclamation rrif n ubrid lawan-a ?
– Ttrajuɣ win ara yi-siwḍen s At Wasif. Ad nenejmeɛ ass-a akken ad d-naf tifrat i rreḥba n udlis amaziɣ. Aha tura erset-d ad teswem tiqit n lqahwa.
– Ala, iḥar umeddakul-agi-nneɣ. Erkeb-d ad k-nesiweḍ ɣer Larba. Asseggas-s teṭṭerḍeq tefsut a Muḥdu.
– Hatan ihi d lxaṭer-nnwen :
A Tafsut n Imaziɣen2qa
A tin wumi kksen ini
Ǧǧan-am-d sin yiniten/
Yis-ssen ad tkemleḍ tikli
Ɣas bɣan akem-sizwiɣen
Texreb-asen tmuɣli.
Yerkeb, neqeleɛ. Hatan wexxam aqdim n Benḥanafi ur yeɣli, ur yettwarkeḍ am wezger-nni d-yeǧǧan lemtel. Nunef i tkerrust ad « tegrireb » s lɣerḍ-is. Wis d acu-t wefrux-nni di tlemmast n webrid. Neḥbes, ners-d, nqerreb s afrux. D Bururu wis d acui t-ijerḥen. Nerfed-t, nesmar-as cwiṭ n waman ɣef tferet, nessers-it ɣef ifer n tzemmurt, n kemmel abrid-nneɣ. « D ta i d taddart n Atmani », d ɣ-d-yenna Muḥdu. Yewwi-yaɣ-d asefru, yestufa Muḥdu :
Ula d asif yerna-as
Ula d tiregwa wufqent
Dduklent-d akk fell-as
Zzint-as ar d as-kemmlent
D igenni yeḍelq-d i wayla-s
Tilisa yegla yis-sent
Llah llah ay At Wasif
Tura d zik mačči kifkif
Akken ara nekcem taddart, ad aɣ-d-yenni Muḥdu isem-is, n wumi-tt. Rnu s usefru i d aɣ-yettwellih akken ad neɛqel anwa i d mmis n taddart iɣef d-yettmeslay. « Taddart-agi tettwalim akka yiwen seg warraw-is yura asefru-a :
Azel ini-as i Masinisa
Tamurt-is tuki-d ass-a
Arraw-is mlalen dduklen
Deg iẓekwan lejdud ferḥen
Akken i ifuk asefru, inṭeq-d umeddakul-nneɣ d-newwi si Tezmalt : « ih, ini-as aha kan, aṭas i d-tuki tmurt, aṭas i dduklen warraw-is, ass-a »
Yettkemmil
Tahar Ould Amar
