Muḥya! D bab n yixemmimen aseklan, amezgunan, amedyazan. Ladγa inurar-a akk d tasekla iγef yeẓẓad deg-s s tmuγli tameγradant (universelle). D bab yekkaten akken ad yessufeγ taqbaylit akin i yigenwan mgal wid-a i γ-d-yezzin, i γ-yerran tafat d tilas, d tillas. Iwula dakken war tussna d tẓuri, war taγuzi deg tsekliwin -xerṣum deg umezgun d tmedyezt- d awezγi ad nesnerni timetti-nneγ akken ad taweḍ γer lebγi n tidet n tigzi n tussna-s. Aṭas dγa i yura, i d-yemmeslay γef waya, ama deg umezgun neγ deg tmedyezt yeẓẓan yettwaẓẓan γer tama n tesqilin n tesnagrayt, n tfelseft.
Muḥya s timmad-is d awudem…d argaz lεali. Yewwi-y-aγ-d s wansa nniḍen ayen nγil nessen-it mi γ-t-kksen, yewwi-yaγ anda nniḍen iwakken ahat ad nissin iman n yiman-nneγ: Ira ad aγ-yekkes ccac γef wallen, ad neffeγ i tegnawin-a n tesnektiwin n wesγan d cci aberkan -ladγa tiεuṛṛebt-tisneslemt akked wat tedrimt n yimeṛkantiyen yeğğa wulac deg yilem -yeččan abelγus-nneγ, yeččan tidi n yiẓawaliyen. U dγa Tamacahut n yileγman tessuget nnhati γef tlelli: ″ Tagi, d yiwen welγem kan weḥd-s dagi di Paris…yewweḍ γer tmurt, yenna-yasen i yileγman-nni n din: Ilaq ad tbeddel!…″.
D win iḥemmlen taddart, tamurt γas ulamma temẓi n tudert-is akk yewwi-tt-id di lγerba almi d tamettant-is deg useggas n 2004 di fṛansa. D win i d-yerran, i d-yesmuḥḥeyten γer teqbaylit imeqqranen n umezgun d tmedyezt n umaḍal yecban Molière, Bertolt Brecht, Samuel Beckett, Jacques Prévert, Lu Xun, atg.
I ma nuγal-d kan γer tmacahut-a n yileγman anda yeqqar bab-is: ″…nekkni tura d ileγman inselmen- socialistes…″. Asegbar n uxemmem iwula akin i yimal-nneγ tallit timsebrekt i γ-yettṛajun, i nettṛaju war lebγi mi dγa ffγen annar n tudert wat teftilin n usirem n ṣṣwab. Mačči d tanemla neγ tanemla tayeḍ i d aγbel iγef yerra amezgun-is Muḥya di tceqquft-is n unezgum? Yettwali kan yessawal yettaru; awi-d kan ma d as-d-naf izerfan n tlelli i tlelli-ya-nneγ tameγbunt iγef nettkel! U dγa i yi-yecban nekkini, deg uleclac-a aseklan amedyazan i ssawaleγ ttaruγ: Nettγewwiγ kan nessaram lemmer nessen-ik ay amsaddar, ay ales alsan…a mmi-s n umaḍal-a-nneγ, ay amnay n tsekla-ya-nneγ i γ-d-iṣaḥen! Ah lemmer nεerra-yasent i tugdi d tebγest akken ad tent-tesdari tigzi-nsent…ad as-nṛuḥ kan s ttawil i ddunit-a send ad aγ-teğğ.
Ameskar neγ bab-a n tmussni amsedrar iteddun amek leḥḥun waman yeγγaz ddaw n tγuzi. Yessenṭaq-d ayen yettxemmim d wayen yeffγen axemmem-nneγ akin i lebγi n lebγi-s s teqbaylit. Γas awal wezzil γezzif, asenfali-ines d akemmali. Skud sul-aγ nedder; tamettant-ik d talalit tayeḍ ay iminig…!
Moh Laid Deflaoui
