“ Tigusa n tissas”, d ungal wis kraḍ n Racida Ben Sidhum i d-ssufɣent tezrigin Imtidad deg meɣres n useggas-a 2024 s tazwart n Lyazid Werdi. D aḍris icebḥen s uɣanib yufraren i d-yernan azal i tsekla-nneɣ. Tafelwit n tduli d taklut yega unaẓur Frawsen Berri.
Ungal-a n 175 n yisebtar, Racida Ben Sidhum tessekfal-d ayen yelhan d wayen yeǧǧa wakud gar wansayen yellan di tmetti, tessenqed-iten s wudem alqayan d tmuɣli yuẓan ɣer sdat, ama s wayen yellan d tameẓla ama s wayen i iwulmen ad yili, akken ad teqɛed anda tezleg, ad as-d-taf udem yelhan mi akken tetti, ad tefsi tiyerwas i tennḍen ɣef wassaɣen yezdin argaz d tmeṭṭut, s way-s tella taddart i yebnan tudert.
Tigusa n tissas yebḍa ɣef ṭam (08) n yiḥricen i yezdi wassaɣ n usentel agejdan i-d-yettawin ɣef timetti taqbaylit d wayen akk i d-yezdin ɣur-s. Deg-s tarzeft ɣer taddart, d ansay ur yezmir umdan ad t-yekkes; deg-s tamagit d yidles, deg-s tutlayt i d-yewwi ɣef yal yiwen ad yesseḥbiber fell-asen. Deg-s tatut i ikerrfen amdan, deg-s iseɣ i icudden s allaɣ ur s iselsa mellulen; deg-s tikta yugten, awal d ccwal yettaɣen amkan deg wallaɣen. Deg-s awelleh i berru n kra i ikerrfen tameṭṭut i as-itekksen amkan iɣef tnuḍeḥ s tudert-is.
Mennaw d asentel i d-yernan ɣef umezwaru-a (Tarzeft ɣer taddart) iɣef d-newwi s tewzel awal. Seg “Ḍegger aqendur a tislit”, “Zzwaǧ n tmara”, “Ṣaliḥa”, “Tayri nniḍen”, “Tuɣalin”, “08 di meɣres”…armi d aḥric n taggara i wumi tefka azwel “Tiɣri n tmeṭṭut “
Tamarut, tseɣzef asentel-is ɣef tmeṭṭut d umdan s umata wuɣur d-mcubbaken ddeqs n yisental nniḍen, yecban: ccfawat n temẓi, ansayen yelhan d wid yeǧǧa wakud, tayzi gar yilmeɣyen, lefraq d lɣerba, asirem d tayri n tidet, lexdeε d twaṣṣṛa… tettkemmil tesseqad, tettakk-d ifukal d yiwellihen s way-s tra ad tbedd twacult n tidet, ireṣṣan ɣef tayri yeṣfan, imi ɣur-s ma yella-d way-a ad taf tmetti iman-is, ladɣa ma yella tameṭṭut ur iteddu ara leɛtab-is d waḍu n tillay… tettwali dunnit tekkat amdan s yidɣaɣen, teseṛwa-yas ifeddixen, maca netta tra idɣaɣen-nni ad yebnu yis-sen llsisan d tgejdan ireṣṣa, mačči d tarewla ara asen-irewwel akken ad yemneɛ kan iman-is, imi ur weḥd-s i yella…
Aṭas n temsal i yeffren deg ugerruj-a aseklan i d-yernan ccbaḥa i teqbaylit d yidles-is sumata.
Lyazid Werdi
