Assaɣ n tsekla-nneɣ d wakud, seg wakken yeqqen mliḥ ɣer yizri, nuɣal nessekcam ayen yezrin deg usnulfu-nneɣ aseklan. Iḍerru wayagi, di tuget, mebla ma nfaq ; nenwa negla-d s umaynut, netta di tilawt, neslusuy-as i wayen i d-nesnulfa talaba taseklant taqdimt, ɣas ma yella aḍris nsemma-t s tewsit tamaynut. Akka, imir-a, ɣur-neɣ ungalen, ɣur-neɣ tullisin, ɣur-neɣ amezgun. Tiwsatin-agi d timaynutin. Iḍrisen i ireffden ismawen-agi, simmal ttilin, simmal ttnernin, simmal ttaɣen aẓar deg yidles-nneɣ d tsekla-nneɣ. Dacu kan, ma nḥeṣṣen deg wayen yellan deg yiḍrisen n tewsatin-agi, ad ten-naf, deg waṭas deg-sen, meslen s tedyizt taqdimt (poétique ancienne) : tin n tneqqisin (récits) d tmucuha tiqburin.
Di kra n wungalen, tuget n yiwudam ttɣimin akken llan, ur ttbeddilen ara, akken llan di tazwara n teḥkayt i ttilin di taggara-s. Amzun akken, ayen akk yeḍran di-teḥkayt ur ten-yeεni ur ten-yerzi. S wakka, ttaken anzi ɣer yiwudam n tmacahut. Tin yernan ɣer-s, di kra wungalen nniḍen, ur d-yettbin ara deg-sen lebni n uwadem ; assaɣ n tilawt n (t)umaru(t) d usnulfu-ines, seg wakken iḥettem-d iman-is di tira, yettaǧǧa awadem imsengel (personnage romanesque) ad yeqqim akken i tettwali tmetti amdan yeṭṭfen aẓayer n uwadem-nni. Imedyaten ɣef wayagi, nezmer ad nwali deg yimudam yecban : taǧǧalt, agujil, amjaḥ, atg. Wigi, ttɣimin akken llan di tgensest tanmettit (représentation sociale), amzun akken awadem ur yelli d tawgida (individualité) i ibennu umaru ilmend n wayen yessarem ad t-id-yemmel yis-s.
Ula di tmedyazt, ama d ccna i tt-cennun ama d tira i tura, aṭas n wammuden d yisefra, ad yaf deg-s umeɣri ṭṭuqtent tenfaliyin d tugniwin, llant yakan ; seg wakken i tent-nennum, ttarrant-id inumak i nnumen yimdanen ; tin yernan ɣer-s, ur d-ttbanent ara d ayen i as-yettaken udem amiran, neɣ εad atrar, i wafir neɣ i tseddart neɣ i usefru ɣas ma yella bennunt aḍris akken iwata, yerna yettban-d yecbeḥ.
Wigi d kra kan n yimedyaten ɣef wassaɣ n umeskar amiran (auteur contemporain) d yizri aseklan. Deg yizri-agi, nettaf iman-nneɣ, iga d irebbi ideg nuɣ tannumi, deg-s tettekkes-aɣ tuggdi, yis-s nbeqqu ad neqqim akken i aɣ-yemsel unsay (tradition). Meεna, akken i nettaf iman-nneɣ deg-s (acku nga deg-s laman) i nettɣimi d iqdimen, nzeddeɣ izri ɣas nekkni d wat wass-a.
Moḥend Akli Salḥi
