Ḍefreγ abrid γezzifen. Tugdi, ur ugadeγ ; akukru, ur kukraγ. Ur ugadeγ ara acku gliγ s uɛwin, d aɛwin azuran ara iyi-iqewten γas γezzif ubrid. Ad yeγzif akken i as-yehwa ; zemreγ-as skud llaẓ ur iḥuza tameddit. Ur kukraγ ara. Amek ara kukruγ ? Acimi ara kukruγ ? Am nekk am wiyeḍ.
Ḍefreγ abrid urǧin yexli, yezga uḍar deg-s, ḍefreγ imezwura di later-nsen. Yerna, amek ara kukruγ neγ ad agadeγ, γer yidisan-iw beddent-d tuyat. Γef uzelmaḍ d ṭṭayfa n warrac, wa yettaru, wa yeqqar, wa icennu… win ur nxeddem acemma, iteddu (am nekk) tiṭ γer yigli, tiṭ γer wanda ires uḍar. Γef leryuf, yal taγect la d-tessawal, meɛna ugiγ ad rreγ awal. Ugiγ ad rreγ awal acku ḍefreγ Ḥmed Leḥlu. Abrid abrid. Abrid abrid kan. Netta, werǧin yexḍa abrid.
Netta, yezwar, nekk ṭṭafareγ-t. Ttekleγ, cwiṭ d laman, umneγ-t (netta, yeggul, ur yeḥnit ara), d bab n wawal. Seg wasmi i yebda tikli, abrid abrid, werǧin yeffeγ abrid. Tin yernan γer-s, ur lliγ iman-iw (nniγ-awen-t-id yakan). Tamezwarut n tmezwura, yella Muḥdu s tezwart-is (acek-itt, tettekkes lxiq, twelleh, yerna d tamwanest am yiciwi n temγart n jidda). Tis snat, taγect n Ḥmed Leḥlu, γas tettel s ubeḥnuq n yisekkilen, teččuṛ-d timezzuγin-iw s « jmeɛliman » ur nḥennet :
Abrid abrid
Ma rebḥeγ ddunit ad ṛwuγ tilufa
Ma rebḥeγ iman-iw ad ṛwuγ lehna
Allaγ ara ixemmen akka d yimi ara d-yinin akka, ad ilin kan mṣadan. D amdan kan amussnaw ara d-yinin imeslayen am wigi, γas xeṣṣen 19 i 20…
Ddiγ kan. Susmeγ. Ttḥessiseγ i wantayen n leɛqel. Tzuzzun-iyi ccbaḥa n tmeγrutin. Nedda akken yedda unya n wawalen s lqis d lmizan, wa deffir wa, wa idis n wa ; ma d arrac, cennun :
Win yewwten deg-nneγ meɛlic
Yak yiwen ur aγ-yettɛeyyic
Anef ad ttun uguren-nsen
Ur neslufu ur nettxebbic
Ur nessudun ur nettkerric
Ur nerǧi win ara aγ-iḥemmlen.
Yesɛa lḥeq. D awal n uɛeqli, γas ma tikwal isseḥzan. Netta di tilawt, d tidet kan i d-yeqqar. Yak d aḥeqqani :
Cfiγ γef wayen akk bγiγ
Ayen nniḍen ttarraγ iman-iw ttuγ…
Ddiγ deffir-s, awal yeṭṭafar wayeḍ am uḍar yeṭṭafaren abrid… abrid n Ḥmed Leḥlu. Abrid-nni akken werǧin i t-yeffiγ. Seg usteqsi isenququlen ulawen γer usirem i ten-issefraḥen… seg uḥulfu n wulawen yugin kennu sdat n lmertat γer tmuγliwin issefsayen arquqen ireggmen… seg uslaf n tɛebbuḍt yelluẓen γer tawant n nnif, ddiγ… abrid abrid… ddiγ deg ubrid. Talemmast n ubrid, tencraḥ, ma d leryuf usmen.
Seg tazwara γer taggara, yezga yeqqar-as : abrid abrid… werǧin neffiγ i ubrid. Abrid abrid, γas zzelṭ d umerret… abrid abrid, γas llaẓ d uḍar innumen ḥafi… abrid abrid, γas aṭṭan d amwanes… abrid abrid, γas yettwakkes-as wawal i umedyaz, γas fkan-t i uḥezzaz… abrud abrid kan…
D wa i d Ḥmed Leḥlu. D taγuri kan n wammud-is : Werǧin neffiγ i ubrid (yeffeγ-d deg waggur aneggaru n 2019 γer tezrigin Imtidad, deg-s 134 d asebtar. Ma d awal, seg wakken ẓẓay lqay, ur as-yezmir wawal).
