Taɣuri : Iceqfan n Muḥend Arezqi Buɛam

 Tameddurt n umedyaz

Buɛam Muḥend Arezqi, d ilemẓẓi ilulen deg 27 furar 1993. Yefruri-d seg Mɛatqa n Lwilaya n Tizi Wezzu. Seg temẓi netta ittcebbiḥ awal, imessel tiktiwin, ibennu isefra. Muḥend Arezqi, d anelmad ifazzen, aka tura atan d asdawan deg ugezdu n tujjya deg tesdawit n Mulud Mɛemmri. Skud ittimɣur, tiṭ tḍal ɣer ddaqs n tlufa, allaɣ yettmiyiz ; dayen ibanen ad inerrni uswir aseklan-ines.

Yekki deg ddeqs n tfaskiwin n tmedyazt. Iḥella-d ddeqs n warrazen. Deg useggas 2017, iṣaḥ-it-id warraz amezwaru deg tfaska n Smaɛil Azikiw deg taddart n At Ziki. Aseggas mbeɛd yewwi krad n warrazen nniḍen : arraz amezwaru deg Tfaska Iɣil n Umedyaz deg uqbu daɣen yewwi-d arraz wis sin deg tfaska Adrar n Fad deg Wat Smaɛel. Rnu amḍiq wis sin deg temzizzelt n tmedyazt deg tesdawit n Tizi Wezzu.

Deg 2019 isizreg-d ammud n yisefra « iceqfan »

• Tussnakta n umedyaz Muḥend Arezqi Buɛam deg udlis « iceqfan »:

Amedyaz yeffeɣ d amnafeq, yerra lɛiwad di talsa, Iɣuc yir tikta i zerrɛen wat wallaɣ ilem. Bu leqder yeɣli i wungif bu uswir yemmuten iwumi i d-iṣaḥ wawal. Amedyaz d umussnaw knan, yeɣleḍ lǧib-nsen yeɣli-d fell-asen umehraz. At tsertit la tturaren yir urar, samsen timetti s yir tikta. Medden akk la ttcetkin, temmečč tidi-nsen akked tid n warraw-nsen. Aɣerbaz isganayen, deg-s tteẓẓun tikerkas, gezmen tirga i uqcic, ttmeslayen-as ɣef tikta n ubeckiḍ sḥermen-as tifenddwa tayri.

Rebrab, snulfan-d Ṛebbi. Mmlan-as lebɣi-nsen, uɣalen nnig-s ttarun. Ṛemmun di tidet rennunun. Sekra n win i ten-ixulfen ad as-zwin aqeṛṛu. Rran temeṭṭut gar wallen, fettun ɣef leḥmala, rran-tt d leḥram. Ma d taqbaylit-nni ɛewwlen ad tt-snegren ɣef yilsawen.

Tameṭṭut, ɣef wudem rran-as aɣumu menwala fell-as yettawi lemqal. Sɛan-tt d ccɣel. Amedyaz deg yisefra-s yewwet-d ɣef wid yerran iciddan ɣef tewtemt. Muḥ Ira ad as-d-tuɣal tlelli akked yizerfan-ines i tmeṭṭut.

Tayri yellan d lɛib di tmetti, yebɣa ad tt-yer ɛinani. Afus deg ufus ad ɛeddin zdat n lqahwa xas ulama ẓran ad ṭṭuqten yinnan. Ad ɛeddin zdat n leǧwameɛ xas ẓran ad ten-rren d azwel n lfetwa.

Tayri trennu afud i umdan, tettaṭaf afus akken ad iger isurifen ar zdat. D leḥmala ara yesggugmen ibeckiḍen, ara isensen ṭṭradat. Tayri tessibnin tudert, tettak afud d ussirem ula deg yisefra n tayri deg wammud « iceqfan » amedyaz yettak-d akk ayen yellan deg-s akken ad icebbeḥ asefru-s, yettinig deg tugniwin n umaḍal aseklan.

Awal yezmer d tament akken yezmer d qeḍran.  Yes-s yezmer ad tnerni tɣerma akken yes-s i tezmer ad tenger, ad ɣbun yiẓuran. Taqbaylit, yessuli ccan-is, yerra-tt nnig usigna. Tedda gar yimenzayen i as-imeslen iman. Yes-s yedder, yes-s yettargu. icreḍ-itt-id ula i lmut; aẓekka-s s teqbaylit.

• Tasleḍt taseklant n wammud « iceqfan » :

Tamedyazt n Muḥend Arezqi Buɛam ad tt-nessmel ɣer tmedyazt tatrart ama deg wayen icudden ɣer talɣa akked yisental ula deg umawal isemmras. D tamedyazt tatrart yeddan d zzman n tura, yella deg-s usnulfu ama deg yisental neɣ di talɣa.

• Isental akked umawal :

Seg tama n yisental akked tektiwin, ad t-naf d amesbaɣur. Amedyaz mačči d win ittezzin ɣef yisental neɣ yettɛawad tuffẓa i wayen yellan yakkan. Deg wammud-agi ur yefka ara azal i yisental iqdimen i yezgan ttuɣalen-d ɣer yimedyazen. Ulac acetki ɣef ṭṭbiɛa n yimdanen am lexdeɛ, laman, takerḍa, lekdeb, ṭṭmeɛ, lfiraq, leḥbab … Ur nettaf ara daɣen aṭas ɣef liḥala ideg ttidiren yimdanen am lḥif, lɣerba, lgira, berru, lmut … Tamuɣli n umedyaz deg udlis-agi tebɛed, leqqayet. D bab n tektiwin, isseḥsab yettmiyiz. Yekcem deg temsal n tussna n tmetti akked tsertit d tfelsafit d wayen nniḍen.

Ula deg umawal iban-d wudem atrar n tmedyazt. Muḥend Arezqi isexdam awalen ijdiden am : talsa, timetti, tasertit, urmir, aɣerbaz, tiniri, tilelli, yettales, asnumer, izerfan, tasekla, tumert, tameɣrut, afir, amezruy, idlisen, amezgun, timanit, asekkil, azwel, amulli …

• Talɣa :

Talɣa n yisefra n wammud « Iceqfan » d talɣa tamensayt acku amedyaz ittuhettem fell-as ad yeḍfer ilugan n tmedyazt i d-tewret tsekla seg yimedyazen n zik. Yurez ɣer lebni n usefru ɣef lsas n tmeɣrut akked tseddarin d uqaddar n lmizan n tkatit. Bla ma nettu lekyasa taseklant akked tugniwin n uɣanib.

• Ifyar :

Tuget n yifyar deg wammud « iceqfan » ruḥen akk d ifyar uddisen at sin neɣ krad n yifyar. Ur nettaf ara ifyar iḥerfiyen neɣ ilelliyen.

Afir uddis bu sin n yifyar	Afir uddis bu krad n yifyar
Taẓalit-iw d tilellit Talsa i as-giɣ isem   Tzaleɣ-tt s teqbaylit Xas winnat ad iḥerrem	Tasertit d yir azwel Nekk ttaruɣ ɣef uḥemmel Di tmetti n yiderɣalen

 

Yella wudem atrar deg wammud-agi deg wayen yeɛnan ifyar. Llan yifyar ideg ara naf amedyaz isemlal gar yifyar uddisen at sin yifyar akked yifyar uddisen at krad n yifyar. Deg umedya ad naf aya deg usefru « Asfel » deg usebtar wis 45

Lǧennet ɣur-m i d-teclex

Mdel allen-im tezdiḍ ifer

Ur yelli seg-i d akellex

Ddari wi illan yedder

Tayri-iw tesɛuggun ifrax

S nnhati i ten-tjegger

Kemm tuklaleḍ asuden

Nekk ccna-w d imeǧǧiden

Imeṭṭi fad ma ad t-yekkes.

** Asefru « mazal » i d-yeddan deg usebtar 36, ddan-d deg yifyar uddisen at ukuz (4) n yifyar . Talɣa-agi ur tugit ara aṭas deg yisefra n teqbaylit. Atan wagi d amedya :

Xas yis-m susmen wuḍan

Xas seg yimi-m kfant tsudan

Xas ur am-d-ttagmeɣ itran

Mazal ad kem-cabiɣ s aggur

• Beṭṭu n usefru d tiseddarin :

Amedyaz ur yurez ara iman-is ɣer yiwet n talɣa i lebni n tseddarin-ines xas ulama tuget n tseddarin bnant ɣef ukuz n yifyar uddisen.

Ayen yellan d atrar deg wammud-agi lant tseddarin yebnan ɣef ukuz (4) n yifyar uddisen. Krad seg-sen d at sin yifyar ma yella d aneggaru-nni yettas-d d bu krad n yifyar yerna yesɛa tameɣrut temgarad ɣef yifyar n ufella. Deg umedya iban-d waya deg usefru « kerheɣ leḥmala-m » deg usebtar 31. Akked usefru « Anef-iyi » deg usebtar 22.

Atan iban-d waya daɣen deg tseddart i d-ittwakksen seg usefru « Awi-d afus-im » Sb 62.

Gar leqhawi d leǧwameɛ

Afus-im deg ufus akken

Wa s wallen aɣ-yessebleɛ

Wiyiḍ di lfetwa ad aɣ-d-adren

Yecqa ur aɣ-tewqeɛ

S tlelli ad neẓḍ afriwen

Ur s tewriqin neɣ s yir awal

Iciddi ad aɣ-yennal

Ḥerzen wulawen iḥemmlen

• Tussnkyest (tugniwin n uɣanib) :

Gar yiferdisen akked tugniwin n tessnukyest i isemres umedyaz deg wammud-ines ad d-nebder kra.

• Tameɣrut :

• Deg wammud n yisefra « iceqfan », isefra iɣezfanen ur ɛdieln ara yimesliyen n tmeɣrut, seg tseddart ar tayeḍ ttbeddilen yimesliyen swaye-s ttfakan yifyar. Imesliyen n tmeɣrut ad ten-naf ɛedlen deg 4 n yisefra iwezlanen i d-yeddan deg yisebtaren ineggura n udlis.

Yella anda isexdam yiwen n usekkil i d imesli n tmeɣrut yella wanda d tagerruma n yisekkilen akken yella wanda isexdem awal s lekmal d tameɣrut

• Talɣa n tmeɣrut n yisefra deg wammud « iceqfan », tussa-d s talɣa [a,b] neɣ [a,a,b]. Ad naf daɣen talɣa [a,a,a,b] deg usefru « Mazal» Sb36.
  • Amssadaɣ :
• Amsadaɣ aɣe
• Mazal ad aruɣ fell-am

Mazal ad ruɣ fell-am

( ad aruɣ / ad ruɣ )

• Kemm d azekka n tefsut

Nekka d aẓekka d lmut

( Azekka / aẓekka )

• Amsaḍaɣ awezlan : amedya
• Ma d uẓum

ɣef uksum

ɣunzeɣ tufẓa n umdan

(uẓum / uksum)

• Takanit (aserwes)

Md : Tteṣwira-m am usebsi, ttkeyyifeɣ s wallen.

Takanit, tella s waṭas deg usefru « Tteswiram » sb 52

• Taseqlebt :

– Giɣ-am d dduḥ imi-iw / Di tyersi-w i d-tettlaleḍ.

– Tettlaleḍ-d si gar lecfar /D tugna-w ad kem-id-yemsel.

– Ssweɣ lebḥur / n lmiddad i yimru.

• Tasergelt : tuɣalin n yiwet n tergalt ddeqs n tikal deg wafir neɣ deg tseddart.

• Zegreɣ tiniri

Jeggreɣ tamara-w

(Tettuɣal-d tergalt « R »)

• Ufiɣ tasusmi tessusem

Yal tama ihemmej ucetki

Yal wa deg wa ad itezzem

(Tettuɣal-d tergalt « M »)

• Ay at lqid i tlawin

Anwa akka i ken-i-ismeɣren

A widak tayri ur ṛwin

D lɛib kan i ken-seɣren

Tennḍem yir tiktiwin …

(Tettuɣal-d tergalt « N »)

• Tasmiddant:Tukci n lewṣayef n umdan i wayen ur nelli d ṛuḥ.
• Acewwiq yezḍa yimi-iw
• Allaɣen ttrun
• Mi i d-tufrareḍ agu yekna.
• Tumnayt :
• Gar yisefra-w tzedɣeḍ, Alami teqleḍ d awal-iw
• Tteswiṛa-m d lǧennet.
• Izdig d aman n udfel.
  • Tangisemt :
• Iɛdawen n Rebbi fuden idammen.
• Yenṭeḍ uglim ɣef yiɣsan.

• Taggarayt 

Ammud n yisefra « iceqfan » n Muḥend Arezqi Buɛam, d tamedyazt ifuqqen, yuli deg-s uswir. D idlisen yecban wa s wayes ara tennerni tmedyazt d tsekla taqbaylit. D tamedyazt tatrart ama deg yisental neɣ di talɣa. Ameskar mačči anda akken yebra i yeqqen neɣ akken qqaren « ad ittezzi ḥanun zzanun » meɛna yesɛa aswir adelsan. Tamedyazt d tafellaḥt-is. D bab n tektiwin d tmuɣliwin yekkaten ar tidet akken ad yezwi takka i kra yefren. Ad yekkes asberber ɣef kra yefren d wayen i aɣ-yeǧǧan neggra.