Seg i yemɣunza igenni d lqaεa, ula d igefran gedlen tamurt; wamma ideflawen, ttun medden ccbaḥa-nsen amek i tga. Tekkaw ddunnit. Sked lǧamuεa ur ẓẓulen ṣalaṭ el istisqa’, ulac. Anda tt-rran, teqqur. D acu-t wassen, yeɣli-d d lḥedd irumyen, ata yedla-d usemmiḍ. Di teswiεt n teswiεin, tennefḍas tegnawt, tessegnew.
Ḥpiţ d Pti Sɣir, seg wasmi meẓẓiyit, mgadan am sin iḍudan ufus. Zgan ttemzuεlalen akken, ttembaḍanen… Ass-nni, tuɣ-iten di tejmaεt la ssehtutuyen, imi ḥala nutni i tuɣ din: “Iḥeqqa ay afremli aṭuṭaḥ, amek i tqebleḍ ad k-ssawalen “el mumerriḍu”? Σnid d amerreḍ i tettmerriḍeḍ lɣaci a winn?
– Infirmier, mačči amumerriḍ!
– Yiwen unamek-nsen! Am lḥaǧMusa d Musa lḥaǧ. Yiwen yettarra-ten d imerḍiden, wayeḍ il rend les gens infirmes.
– Wwah ula d kečč! Ka yellan, yessefk ad as-d-tessukkseḍ. Ma ur d as-tcuddeḍ ara tacrurt, ur ttellzeḍ ara.
– Mer mačči d tidet i d-nniɣ, ayɣer ad s-beddlen isem ihi?
– Anwiwi?
– Tarwa n Σisa.
– Arraw n Σisa? Σisa at Yidir?
– D taqfirt-ik! D tarwa n Jésus i d-qesdeɣ.
– I tiniḍ-d, irumyen! Anwa umi beddlen isem?
– I ufremli, tura qqaren-as “aide-soignant” i “l’infirmier”.
– Ini-d akka! Winna ẓriɣ-t. Aha tura, anef-anaɣ si tigi. Ini-yi-d?
– D acu a k-n-iniɣ?
– Anda tewweḍ ssaεa-nni?
– Mazal lḥal.
– Anda wi teẓriḍ?
– Ẓriɣ ih!
– Teẓriḍ acciwen! Tεuddeḍ-ak win yeddan ad yeqqel am Ufni. Xas yedderɣel, yeẓra anda yedda wass.
– Ini-iyi-d ziɣ a Pti.
– D acu a k-iniɣ daɣen a Grand?
– I wass-a wissen anta ad k-d-yeldin tawwurt?
– Anta tawwurt?
– Sneεmel din ur tegziḍ ara, mmh!
– Aha celleḥ-itt, melleḥ-itt! Sani tesseksayeḍ?
– Ad iniɣ d la ptit-nni-inek ara k-tt-id-yellin, yerna ad ak-d-teldi ula d iɣallen-is, imi ass-a ur teqqar ara; gerrfen di llisi. Ma d yemma-s, walaɣ-tt linna mi tεedda s usagem. Teggra-d di gma-s-nni amecṭuḥ umi ssawalen abelqeṭṭiḍ, werεad d-teffiɣ terbaεt-is si lakul.
– Ma nniɣ-ak! Ur d ak-yettensar wacemmek a taqabba n lem! Tugareḍ tiṭ uyamun, ka yellan, teẓra-t.
– Σni tettuḍ? Yak tenniḍ-iyi-d belli d kečč i s-yekkaten tissegnatin i dda Weεmi. Ihi mazal-ak azgen n ssaεa a Roméo…
– Susem ammar ad k-d-tsel.
– Anta?”
Pti Sɣir yessader i wallen-is, yelɣet.
Ḥpiţ yegza s anta i la d-iteddun. Yessaked akka d wakka. Iwala nna Σdi teqqel-d si tala. Teflali-d deffir teɣmert n tmezgida d-yezgan din kan, ger lḥara n dda Weεmi akk d tejmaε iɣef d-isenned lǧameε. Twala-ten-id kan, tluεa-ten-id d tamezwarut: « Aεelxir fell-awen ay ibaḥanen ».
– Lxir tafeḍ-t a nna Σdi.
– Ḥellabden-m.
– I dda Weεmi-nni, amek iga?
– Ass-a cwi-t, xir n yiḍelli. Matter i yufa ɣer tsegnatin-nni i d as-tewteḍ. Ahat sya simi ara tent-ifak ad yekker ɣef yiman-is, fiḥel ma sṭaxxren-t-id seg uxeddim.
– Awi-d ukan ma yufa ɣer-sent.
– I wass-a, yak ula anda a tejbuḍ?
– Ur tesεiḍ sani a rreɣ, aql-i da. Ussan-a ur xeddmeɣ ara. Sgunfaɣ cwiṭ. Tṣaḥ-iyi-d ddurt si livakuns d as-nettalaseɣ.
– Ad k-yeḥrez bab igenwan i d aɣ-k-id-yefkan, yeḥrez taεebbuṭ k-id-yurwen.
– Ula swayes a nna Σdi. War lemziyya-w. Ccafuεa-k a mmi! Tajmilt-ik d tameqqraḥant.”
Ccix Muḥuc, awi-d kan ad d-isel i tmeṭṭut s azniq. Ata yeffeɣ-d, ad iẓer anta akka. Tin twala-t kan, teɣseb asurif. “Erreẓ akin fell-i a yir qjun!” I s-tenna i uydi-s d-yuzzlen ɣur-s ad s-yesqizzeb mi tt-iwala tusa-d. Nettat tekcem s axxam. Ccix Muḥuc tewqeε deg-s tmellalt. Iga akka, yeqqel ansi d-yekka. Pti Sɣir d Ḥpiţ, ka din ɣef tiṭ-nsen. Myeɣmazen. Kkxekkxen d taḍsa. Wis d acu yekker ad s-t-yini Pti Sɣir i Ḥpiţ, Ḥpiţ iɣeẓẓa-yas iles, yerna-yas ccah Sufella. Pti Sɣir ibat:
“Iwumi tenniḍ ccah? Ma i ccix Muḥuc, ur cukkeɣ ara yesla-yak-d.
– I kečči!
– Aεεa? Seplik-twa ziɣ.
– Dayen, yusa-d uǧadarmi ara k-ibedden nnig uqerru-k! Adyu la ptit. Yerna wehmeɣ d acu i d-izaden deg-s almi tekkuliḍ fell-as.
– Stop din! Mer ad d-ternuḍ awal ɣef twaract-iw, d amcum-ik; nekk yid-k meεεac ad nemlaεi.
– La ttnecraḥeɣ kan yid-k a timint. Ẓriɣ temyeḥmalem am Juliette d Roméo.
– Ihi d tissmin-ik i d-yennan mmuh.
– Mer d yiwen nniḍen, mačči kan d tissmin ara yasmeɣ seg-s, d aqeṭṭi ara qeṭṭiɣ deg-s.
– Ayhuh!
– Yerna, limer ad waliɣ kra n walebεeḍ la itezzi fell-as am yizi ɣef yiɣi neɣ yetteḥnunuḍ ɣur-s, ad d-sfiɣ allen-is…
– Dayen, bru i wawal ttxil-k ay akriminal puṭansyal!”
Pti Sɣir ibeddel iger. Ḥpiţ niqal yessusem, yesmeḥsis-as kan s ṭṭerf n tiṭ. Amecwar-akka, yekker ad d-yenṭeq. Yexẓer-it Pti Sɣir. Yekres tawenza-s, am win ad s-yinin: “Ɣur-k i d-trennuḍ ɣef twaract-iw!” Ḥpiţ iεedda yeffeɣ-d si tejmaεt. “Ma teččḥeḍ fell-i, awer tt-tekkreḍ!” I d as-yesseḍfer Pti Sɣir. Netta Ḥpiţ ur d win a yeččḥen ɣef umeddakel-is yettεuzzu. D asqiqec kan i yesqaqec ɣer berra am win a yesfeqden kra. Yessendi tadakemt ufus ayeffus s igenni, yenna-yas: “Ula wi slilwen, la d-tesmiqi lehwa a nngeḥ-ik!” Yebda yettḥukku ifassen-is. Ula d netta yemmulla seg yiṭij n ccetwa.
Tujjaq tewwurt n tmezgida. Ata diɣ ccix Muḥuc yeffeɣ-d s uqendur d tbacmaqin. Tuffɣa uberriq seg uḥriq. Yesluffuy i učamar-is: “Waqila yesla-yaɣ-d uxellaq lεaḍim. Yedda-yaɣ di llza, ad aɣ-d-iɣit ass-a ncalleh imi neẓẓul sendiḍelli ṣalaat el istisqaa’.
– Yella ɣur-neɣ, emmh! Tebbipim-as, dɣa yerra-yawen-d. Ṭeb ṭeb! Mi teslam i yisalan n rradyu d tilivizyu nnan-d, la d-iteddu ugeffur ussan-a, dɣa ad tekkrem zeεemma ad teẓẓallem, iwakken ad tawim cciεa. Faqu!
– Ahaw kan, ar asmi a tawḍem s afus-is, ad twalim! Teffɣem i lemdaheb.
– Ḥebber i yiman-ik! Nekk ur ddiɣ yid-k, ur d-teffɣeɣ si txuba ur kcimeɣ.”
Ccix Muḥuc ihuz aqerru-s, εerqen-as imeslayen. Yuker aḍar ɣer deffir. Yedderbez d timendeffirt ɣer ṣṣran t-id-yessufɣen.
Ḥpiţ yebren-d s ameddakel-is. Yenna-yas Pti Sɣir: “ Ula d kečč s iεellfen awal i wihin, ziɣ tetthettheḍ. Yuqa yakk ukud a temmeslayeḍ?
– Anef ad tens deg-s tyita. Dadda-k ur ttkeεriren ara fell-as yir lenbar am wihin. Ssneɣ lexbuṭ-is…
Yegzem-as awal Pti Sɣir i Ḥpiţ:
– Ccct! Mačči d ameǧǧed umi sliɣ?
– Ahat d arrac i d-yeffɣen si lakul. Amεezza-nsen ad iẓẓifen amzun wwin imuras…
– Ahya a ssiεqa! Waqila d tawaract-nni-inu akk d nna Σdi i la yettiɣwisen?”
Ddḥeddḥen s axxam n dda Weεmi. Ula d ccix Muḥuc, ata yuzzel-d. Netta εad! Zeḍmen ɣef tewwurt n wefrag. Ssebrarḥen-tt la ccweṛ la ddweṛ. Afen-d iman-nsen di tlemmast n lḥara. Sawlen: “D acu akka εni yeḍran a nna Σdi?
– Accakut ay at leεraḍ! Ss acu yuɣen argaz.”
Rreḍwin s axxam. Afen-n dda Weεmi yebεuẓẓel di tlemmast n tzeqqa. Amimeḍ ulac. Udem-is yexsef, ffɣen-t idammen. Allen-is ɣerrbent. Pti Sɣir yedda fell-as. Isuma iẓuran n temgerṭ-is ma la ssebraqen. Ur iḥulfa i wacemma. Yewwi ameẓẓuɣ-is s idmaren-is ma yekkat wul-is. Ulac. Yessendi tameẓẓuɣt-is s anzaren n ugeswaḥ ma ur yeṭṭaqqef ara deg-s nnefs. Anda wa ara isel ula d kečč deg wannecten isuɣan?! Pti Sɣir yeεna dda Weεmi ɣer tlemmast n yedmaren. Yebda asiti s usendeq, le massage cardiaque, ah. Sya ɣer da, ad s-yergel tanzarin-is s sin iḍudan iwakken ad as-isuḍ s yimi-s s aqemmuc-is. Ad as-yuqem “bouche à bouche.”
Ccix Muḥuc, tɣeẓẓa-t-id; daɣnekk, iɣeẓẓa-t-id yimi-s. Ma ur d-yenṭiq sufella, ad d-yeggurreε ansi nniḍen. Akken i d netta. D acu a sen-yini: “Tigi d tiyitwin n lmut!”
Tawaract n Pti Sɣir, tesnerna i umeǧǧed; teccerɣet: “Annaɣ a vava wa ara nesεu?!
– Ur ttagad, aql-i da!”
I d as-yerra Pti Sɣir. Yeccarrwen mi s-yesla tsuɣ-d akken, dɣa yekkes-d imi-s seg yimi n dda Weεmer. Sakin yeqqel daɣen s asiti-nni.
Nna Σdi, mi s-tesla i wawal-nni aseṭṭaf n ccix, tekkat deg yimesruqen-is, tettεeggiḍ s ṭṭelq n taɣect-is: “Annaɣ a tarwa, wa a ken-irefden?!
– Ur ttagad, aql-aɣ da! Ad as-cehhdeɣ neɣ werεad?
I d as-yerra ccix Muḥuc. Ḥpiţ tuɣ-it yetteqliliḥ kan, ikerrec deg yiḍudan-is, yettawi lewhi s wallen. Simi s-yesla i ccix Muḥuc yenna-d akken, yedduqqes-d. Izellem-it yir azellem. Mer ur yuriz ara iman-is, tilfi ad s-yeṣṣeεṣeε s ubeqqa alamma mzennadent wallen-is. Temneε-it yir tegnit-nni ur nessulef i waya. Yuɣal iqerrec kan tuεlect. Yeṭṭef imi-s, ammar i d-yeqqar. Ccix Muḥuc, yugar rrḍi yesεulluḍen di nnfeε-is. Ileεεeb-itt nniyya f lehbal, ah. Yuɣal-d almi d awal-nni: “Nniɣ-awen tigi ur ssexlafent ara rric! Samit-as kan iqejjiren-is ma semmḍit?! Lmut seg yiḍarren i tbeddu bab-is ur εniɣ iman-iw. D lεulama i d-yennan belli akka i d-yenna wucbiḥ. Uḥeqq ka yennan alleh ar t-id-tɣufer m lḥeqq! Lḥasun, nekk ayen yellan fell-i, aql-i da. Ma d acehhed kan ad as-cehhdeɣ, ad kent-saεdeɣ di ssuma, meyyat alef kan. Ma tebɣamt ad ɣreɣ fell-as lfattiḥa akk d qelhu wellahu, mitin alef εument-iyi.”
Ḥpiţ, yuli-t-id lɣeṭṭ. Yettsi ugellar-is. Yexmamer fell-as: “Ayya εeffeṭ! Ffeɣ syagi, ur k-ttwalint ara wallen-iw ay isɣi bu lefrayes! Ttfuuh!”
Ccix Muḥuc, yebra i umeggaḥ-is. Yesseqεed tacacit-is, ad iɣum yis-s tacelqiεt-is taferḍast. Yekka tawwurt. Yeznuker s azniq am uydi yeččan tiɣrit neɣ awtul yewwin tiɣiɣit. Yaf-n nneɣlen-d lɣaci d-yeslan i wannecten umeǧǧed:
“D acu akka yeḍran a ccix? Ayen akka yeḥcer wudem-ik?
– Uḥeqq ka igan isem i yiman-is ma iεawed-asent!
– Anwa?
– Dadda-twen Weεmi. Yesdenden-itt s lwiski neɣ ur ḥsiɣ ara s wacu, almi yegla yis-s. Uqsimu bi llah lεali u lεaḍim, ma ẓẓulleɣ-tt fell-as ula d taẓallit n lǧanaza; imi akka i s-yehwa i Ḥpiţ, aha ah!”
Imir imir, yeččur-d wexxam. Mčuččin-d ɣef dda Weεmi. Zzin-as-d di tlemmast n ugens. Yal wa ɣer wacu i d-yestufa. Wa yebɣa ad iẓer amek ttmettaten medden. Wa yečča-t wul-is, tegzem tasa-s. Wa yessefk ad yesker kra xersum s wawal:
“Σni yessusem dda Weεmi-nni? Daɣnekk, εni yewweḍ s anda a naweḍ? Akka i ɣ-d-yenna ccix Muḥuc.
– Yella wi s-icehhden neɣ mazal?
– Az akka kečč, eǧǧ-aɣ ad nwali!
– Ad nsiwel i lambilans ad t-tawi ɣer sbiṭar meqqar?
– Ṭṭef imi-k. Ad d-asen ad sriḥen annect-a n larkul, ad siwlen i yiǧadarmiyen, ad t-ssalin di tqecwalt-nsen neɣ ad s-gen aprusi imi yeskeṛ.” I s-yenna yiwen seddaw tuɣmest. Wiyaḍ, wa yettezniniḥ mi yesla i wawal n teqcwalt iǧadarmiyen. Wa yesbecbuc s ameẓẓuɣ umeddakel-is… Wayeḍ ihedder s ifassen-is, ireffed iɣallen-is; tikkwal s igenni tikkwal ẓelmeḍ, tikkwal yeffes; yetteεraḍ ad yesseqεed lɣaci iwakken ad walin merra ɣef tikkelt neɣ s nnuba.
Kkiɣ-awen deg wawal. Mi d-tuɣal akken si tala nna Σdi, tekcem ɣer tzeqqa-nni ideg yeεna tasga umuḍin wergaz tuɣ almi tent-tuɣ ula d nettat, tessendeh yelli-s ad s-d-theggi ttawil i Pti Sɣir iwakken ad s-iwet tissegnit. Simi tedla ɣef dda Weεmi, tsuma anyir-is ma yesεa tawla, yerεaεec zdat-s. Ad s-tiniḍ tewwet-it-id trisiti. Yuɣal yesbeḍ din. Allen ldint, aɣesmar yeqqur. Dɣa tsuɣ. Yelli-s tefrawes. Tserreḥ-as i tqerrεet-nni n lalkul. Tennegdam, tenɣel. Daymi d-ufan akken axxam yeṭṭeεṭiε d l’alcool.
Awal yezreε ccix Muḥuc, dulaqrar ad yefk liraq. Daymi ɣillen yakk, widen akken d-yegren, d kra n tqerεet n lwiski i yesgerger dda Weεmi almi yeɣli menṭeq.
Ḥpiţ, yettdeggir-iten-id yiwen yiwen s afrag. Yezwar-d deg bu tecyaxt-nni i ten-yesseqεaden amzun deg umraḥ n ṭṭbel i ten-yuɣ lḥal. Win d-idemmer, ɣas wayeḍ. Yeqqar-asen:
“Aẓet akkin fell-as ah! Anfet-as i urgaz ad yemmet ṭrankil deg wexxam-is, ma fell-as ad yemmet!
– Ur t-teεnim! Dayen yuki-d, yeslek!
I d asen-d-yerra Pti Sɣir. Ḥpiţ yuzzel ad iwali ma d tidet. Ur yumin ara allen-is. Ziɣ yebbureεqa-d dda Weεmi, yeḥya-t-id umddakel-is. Iger-d nnehta.
– Uk! Twalaḍ i yelha umeǧǧed?!
– D tidet a Ḥpiţ, mer ur d-nesli ara i usuɣu, ad t-id-naf yeqqur.
– D acu i yi-yeǧǧan ḥemmleɣ-k, yerna ttekleɣ fell-ak!”
Wiyaḍ, yal wa yeqqel ansi d-yekka, am lehwa-nni d-yesmiqin linna, deqqal-nni twureb. Ula d asigna-nni, yefsi am wagu neɣ wis sani i t-yewwi waḍu d-yernan tiden-is, ad yeskew ka d-yeqqimen.
Nna Σdi tedda ɣef Pti Sɣir, temḥalleq-as. Tesluffuy-as, tesmaray-as aqeffu n wurawen; ddeεεa lxir n lxir, ah! Tawaract-is, ula d nettat tḥebbwa-t. Teẓmeḍ-it s idmaren-is. Tettru, tettaḍsa… Ssudunent deg-s rennunt, di snat.
Dda Weεmi, ɣas tsusef-it-id tmettant, sellaw yifer-is. Ula d tusut ur yezmir ad d-yusu ad bbuḥrunt turin-is akken iwata. Werεad d-yendekwal mliḥ. Nna Σdi tessendeh yelli-s: “Nniɣ-am awi-yas-d tissegnit-nni ad as-tt-iwet unejbar-nneɣ skud akka yella da, fiḥel ma nesqeṛqeṛ-it-id taswiεt.” Niqal tekker twaract ad as-tini kan, dayen a yi, kullec ihegga. Taf-d tafakult n tqerεet-nni tessenɣel, ulamma mazal kra deg-s. Tenna-yas:
“Ad d-nadiɣ qbel tayeḍnin. Tagi teswa-tt tɣerɣert.
– Yak mačči d nekk i iberzen ddwawi n baba-m, d kem i yeẓran anda-tt.
– Ẓriɣ! Ad as-d-tesseḥmuḍ tiqit uyefki, fiḥel ma yenzef daɣen, neɣ ad as-t-id-sseḥmuḥ nekk?
– Kemmi lti-d kan d ccɣel-im. Ihi simi ara d-tesweǧǧdeḍ ayen yakk yessefken, ad εeddiɣ ad d-skuffteɣ taṭawat uyefki. Ad swen ula d inebgawen-a. Ur d asen-ttakeɣ ara tisigar n ṣṣbeḥ.
Tezzi ɣer Pti Sɣir d Ḥpiţ, teggul-asen:
– Meεna s yixef n ubelqeṭṭiḍ-nni iɣef ččiɣ taga s yimi, ur tt-teffiɣem sya alamma tεerḍem xersum tiḥbulin-nteɣ!
– Lxir ur ifut a nna Σdi! Ar asmi a yeḥlu dda Weεmi, ad d-nuɣal ad nečč yid-s imensi; ad s-nestummnet meqqar akken. Ma d tura, ad iniɣ, yessefk ad t-nawi ɣer sbiṭar, ad ẓren ansi i s-d-yekka waya d ad walin d acu i s-ilaqen. Ula d tissegnit n wass-a, ttifxir ad nciwer qbel imejjayen.
Yezzi ɣer Ḥpiţ, yenna-yas:
– Azzel, siwel i li pumpyi! Ttif ad t-nawi di lambiluns-nsen wala di tkerrust.”
Racid n Tiɣilt
