Si zik ar ass-a, send afrag n tira asmi yella wawal agellid d imaw, ayen yeddem ibubb-it yiles d asusru, yuğew-it yimru d asekkil. Akka i d-kkrent akk tutlayin: Ulac tin ur nesεukkez s yidles n tmawit-ines, s tmeslayt i ttmeslayen warraw-is. Timawit d adrar d illel, deg-s i d-nuγ tamussni d tudert, iseg d-nelḥa yid-s amecwaṛ amsislan (Timsislit: Phonétique) almi newweḍ γer webrid asnaslan ( Tasnaslit: Phonologie) akken ad yekfu welwiwec d umhaz ur yesεin azal mi dγa tira-nneγ tumrist (usuelle) tuẓa γer zdat…γer tama n tira tussnant taseklant. Ihi aγbel yefra. Yettwakkes uzaglu i tyuga, tixṛet-aγ i wemttuttel!
Di tmura anda yeffeγ yimru deg uqerruy, maca yettawi -imru- ul-is deg yiles-is, ladγa γur-neγ di Tefriqt, ad d-naf tezga treṣṣa tsekla timawt tansayant deg tmeslayt n yal ass. U dγa deg yiswi n yixf-a ara nelḥu akken ad nesnerni tutlayt-a-nneγ n lejdud meskud jellunt, ttṛuḥunt tutlayin, lqiḍar n 200 deg useggas. Amger imegger; cwi aql-aγ d afus-is…
Seg ufras d uleqqem n yisekla γer uṭewwi n yinurar i neḥṣa s ugama-nneγ, yessen-aγ nḥemmel-it: Si zzman n zzman, seg wakud yeddmen gma-s, yal aqbayli icudd γer wakal-is, γer wawal-is, γer tegnawt n wansayen-is, γer twennaṭ-is. Deg yidles-a-nneγ imaw is i d-nṛebba tacriḥt taseklant tamedyazant akken ad as-nesseγzi tudert i tutlayt i γ-yefkan talalit. Mi sul llan wat yimawlan n tira d umeslay, mi nettutlay nessenfalay, ad yaf usirem asirem-is. D aya dγa i ssuturen akk yigujilen n yiles.
Lemmer ur yelli umeslay, ur yettuγal d asekkil yettwarun, nettaru tura dγa, ara ad naru azekka. Nekker-d akk deg lebḥeṛ-a n timawit -ameslay newwi-t d azrar seg tsuta γer tayeḍ- maca ad aγ-yelhu ma nweccem ayen akk yezrin fell-aγ d amezruy d uxemmem s tira iwakken ad afent iman-nsent tsutiwin i d-iteddun, ad mmyafent twaculin n twaculin-nneγ…
Ar tura, s wudem asnislan (regard linguistique), llant tutlayin ur nettwaru yara γas akken sεant tamussni lqayen maca qqiment kan akken deg tmeddurt-nsent timawt. A wi ẓran amek ara d-grunt war tira! Ugten yimnekcamen: Tadrimt asγan tasnekta zgan d tiselbi-nsen; ttarran tallest i umawal aḥṛur n tmetti, ttnuγen-as tikli-s tutlayant. Sejlawen -jlu, sejlu- ula d lğeṛṛa-s, d ales d imγi d aγerṣiw.
Tira d tudert, d iṭij, d tafat deffir usigna. D tira ara γ-yawin γer yiwet n tmeslayt. Cwi aṭas i yettarun, ḥṣan s waya, s yilugan n tira. D tumert-nneγ. Mačči d tameslayt n yal ass i d aγbel, d tisutiwin i d-iteddun ma ur d-ufint ismektiyen-nneγ i d aγbel wayeḍ. Nelḥa-d ussan d amezruy, d ayyuren d azermezruy; tal tutlayt azal d awal lemmer tira-ines d azref, ad ttaγ axxam d tangalt, arraw-is d ineggalen.
Moh Laid Deflaoui
