Deg umur amezwaru n udlis-ines aneggaru Amyag n teqbaylit i imudd d tikci i yimeɣriyen (daɣ netta isemma, s unecraḥ, i teẓrigin i t-id-yessufɣen « Ur ittnuzu ur irehhen »!), Kamel Bouamara yewwi-d amaynut deg wayen yerzan asesmel n talɣiwin.
Taseftit n teqbaylit deg 4 (kan) n waggayen n umyag !
Send ara d-yefk asesmel-ines, ameskar n udlis-a yesmekta-d, deg tazwart, ayen yettwaxedmen yakan ɣef umyag di teqbaylit. Yebda-d s Dallet i yebḍan imyagen d taggayin (« verbes à voyelle zéro »,« verbes à voyelle pleine », « verbes à alternance vocalique pré-radicale », atg.). Dallet yebna tazrewt-ines ɣef « umḍan n tergalin, win n teɣra (ilem neɣ tiɣra yeččuren) akked temlellay n teɣra » (ẓr. sb. 7, K. Bouamara, « Amyag n teqbaylit », 2023).[1]
Mouloud Mammeri, si tama-ines, iga-d, di « Tajerrumt n tmaziɣt-Tantala taqbaylit » (1976) snat taggayin n umyag: wid yesɛan urmir d yizri ɛedlen d wid ideg mgaraden sin yisental-a. Mouloud Mammeri iger tamawt dakken d taggayt n yimyagen yesɛan talɣa R1R2eR3 (R: taRgalt) i yellan s waṭas.
Kamel Nait-Zerrad daɣen iṣukk taslaḍt-ines ɣef usesmel-a n Mouloud Mammeri imi yebḍa imyagen imugna ɣef sin yiḥricen : wid yesɛan urmir d yizri ɛedlen (imyagen ilugnanen, yiwet n taggayt i yellan deg-sen) d wid yimgaraden deg sin yisental-a (imyagen irluganen, 22 taggayin). Deg udlis-ines, « Manuel de conjugaison kabyle » (Awfus n tseftit taqbaylit), Nait-Zerrad yerna yebḍa imyagen ɣef sin waggayen: imyagen imugna d yimyagen n tɣara. Ay-a nezmer ad t-naf daɣen deg usmel n Internet « amyag.com ».
Tizrawin n Mammeri akked Nait-Zerrad bnant ɣef yimenzayen-a:
-Llan yimyagen yesɛan yiwen ufeggag deg yizri akked wurmir akken llan yimyagen i yesɛan ifeggagen yimgaraden deg yizri d wurmir;
-Tella temlellit n teɣra akked tussda n tergalin.
D acu kan, sin yimeskar-a rran lwelha-nnsen ɣer snat tmeẓra-ya kan (urmir d yizri). Xuḍi imesnilsen n teqbaylit mgadan dakken llan 4 yisental : urmir, urmir ussid, izri d yizri ibaw. Wa d yiwen gar wuguren umi i yeɛreḍ ad d-yaf tifrat Kamel Bouamara di tazrewt-is taneggarut ɣef umyag.
Rnu ɣer wanect-a, deg udlis-a ad naf amḍan n yimyagen d uɣefwinas-nnsen (%) n tal taggayt (R1R2eR3, R1eR2R2eR3, atg.), am wakken i t-id-yura yakan deg useggas n 2017 deg usegzawal-ines « Issin wis-sin ».
Tasnarrayt n udlis « Amyag n teqbaylit » tger asurif ɣer zdat deg uglam n unagraw n umyag imi Bouamara yessaweḍ yesdukkel imyagen deg 4 waggayen kan (G1, G2, G3 d G3). Syin akkin yal aggay llant deg-s taggayin (md. G1.1, G1.2, atg.).
Ad d-nerfed deg umedya taggayt tamezwarut n waggay wis-3 (G.3.1) ideg ara naf ɛedlent talɣiwin n yizri ilaw d wurmir, llant deg-s taggayin-a :
1/G3.1-1 : d taggayt n yimyagen iṣukken akka : R1R2eR3 (ugar n 480 yimyagen) akka am « drem », « qcer », « gzer », « gzem »…
Amedya: (ad) igzem (urmir) = igzem (izri ilaw), igezzem (urmir ussid), (ur) igzim.
2/G3.1-2: R1R1eR3 (ugar n 47 yimyagen) akka am: « ffer », « dder », « mmeɣ », « zzem », atg.
Amedya: (Ad) teffer (urmir) = teffer (izri), tetteffer, (ur) teffir.
I tal talɣa, Bouamara yefka-d tafelwit neɣ tifelwan ideg ara naf tugget n yimedyaten n yimyagen neɣ talɣiwin-nnsen tisuddimin (attwaɣ, amyaɣ, …) akked tsuddimin tuddisin (amyaɣ n uswaɣ). Llan ugar n 2800 yimyagen yettuseqdacen deg tutlayt n yal ass (ur d-isedda ara imyagen imaynuten neɣ iqburen).
Tal taggayt iga-yas angal-ines, ayen ara issisehlen aselmed n tseftit n teqbaylit, aladɣa i wid ur tt-nettmeslay ara imi ilaq daɣen ad nxemmem amek ara nesselmed tutlayt-nneɣ am tutlayt tajenṭaḍt.
S kuẓ yifeggagen-a neɣ isental-a (urmir, urmir ussid, izri d yizri ibaw), taseftit teshel maḍi imi ad asen-nernu kan imataren udmawanen (tewwi-d daɣen ad nissin ilugan n tira n « e »). Yernu nezmer sumata ad d-nemsel s yifeggagen-a isental-nniḍen: talɣiwin n wannaḍ d tid n umaɣun.
Di tegrayt, tasnarayt-a ad d-teglu s wayen yelhan deg usnalmud n tutlayt taqbaylit, aladɣa am tutlayt tijenṭadt. D acu kan, taseftit ur telli ara d tasnalɣa kan. Axeddim yecban wa nessaram ad d-yili daɣen di tesnamekt n umyag. Ahat d ayen iɣef ara d-yili wawal deg umur wis-sin n udlis-a.
Karim Kherbouche
[1]http://www.ayamun.com/JM_DALLET_LE_VERBE_KABYLE_FDB_1953.pdf
