Ur d-mazal ara aṭas i temcerret n udlis n Tiɣlt Useksut. Lecɣal ddan mliḥ ar zdat. Azɣal mazal-it yesfinzur azger. Ula d asismatizur yekkuli-t unaɣuṛ. Segmi yemlal d Maz, dda Militant yettansisti ad yinig di tmacint n zman. Dɣa ddan-as di lebɣi.
Lbacir, Rezqi Dezdeg, Belqa akked dda Militant rekben di tmacint, afen-d iman-nnsen di Tiɣilt Useksut 2085. D tanebdu. Taddart ibeddel akk widem-is, ur tettwaɛqal ara : d acu-ten, iberdan-nni, tezdeg-nni, ijeǧǧigen-nni…
Muqlen akka d wakka ma ad asen-d-iban webrid yettawin ɣer tejmaɛt. « Waqila d wa i d abrid ! », d asen-yenna Rezqi Dezdeg. Uɣen abrid sen-d-yemmla Dezdeg. Syin ar din ad d-mmlilen d wat taddart. Ttaqa deg-sen d ilmeẓyen. Atnan bannen-asen-d ilemẓid d tlemẓit , lleḥun, mmyuṭṭafen afus. Amecwar akka ḥebsen, mmesmuqalen, cmumḥen, mmsunaden, mmyiḥnacen.
– Rnu deg uzal qaylal. Ɛni af ifak leḥya di Tiɣilt Useksut n uzekka, yerrafa Dezdeg
– Tant mieux, vive tayri, s yerra dda Militant
– Vive yemma-k !
Kemmlen deg ubrid-nnsen almi wweḍen ɣer yiwen ubeṭeḥḍaḥ yeǧǧuǧeg mačči d kra. Ɛeqlen yiwen weblaḍ daxel n zjaj. Tama n weblaḍ ters tewriqt yura deg-s : « Wagi d ablaḍ aneggaru n tajmaɛt n 2023 ». Tama n weblaḍ, tazeqqa anect-ill-tt tebna s lluḥ.. ur tesɛi ara tiwwura. Kecmen, wehmen deg wayen ttwalin : taḥnact teččur d idlisen, ttaqa deg-sen uran s teqbaylit, sin yimɣren ttarun deg urdinatur, yiwen n yilemẓi tama n tmacint yettraju ad as-d-smir lqahwa, sin-niḍen tessen tabyirt yura fell-as Mecrek. Dɣa imiren i isuɣ Rezqi Dezdeg : « acu-t uxessar-agi ? ». s kara n win yellan di tzeqqa yerfed aqerru-s ad iwali anwa d-ineṭtɣen, uqbel ad suɣen ɣef tikkelt : « cccet ! »
Fɣen-d iminigen n 2023 si tzeqqa, ttnadin s wallen ma ad ɛeqlen amkan n « tejmaɛ-nnsen ».
Iban-asen-d. uulac iblaḍen, ulac aɣebbar, ulac izan… Ayen ttwalin yessewhem-iten daɣen : amkan—ni ideg ttnejmaɛen At Taddart n 2023 yuɣal de…colisée-nni n Rome.
« Ya ddin uqabac, d l’agora n yiɣriqeyyen i d-sebded taddart ! » i isuɣ dda Militan
