Llan yisental i d-mugreɣ kan deg wungal Murḍus am usentel n yibabaten itɛeddayen ɣef tarrwa i d-rebban i d-uwin seg uxxam n yigujilen (Asentel-agi n ubabat ituɛeddan ɣef yelli-s ad t-naf daɣen deg wungal « tadist Yettwaneɛlen » n Zuhra Awdiya. Ad naf daɣen asentel n Ḥirak i tikkelt tamezwarut i t-id-mugreɣ deg wungalen n teqbaylit. Ad naf daɣen asentel n yiberwaten (Gay), d aṭabut deg tmetti-nneɣ meɛna yedda-d deg wungal Murḍus. Asentel n wudayen yennuɣen deg tegrawla n 54 mgal Fransa.
Ungal Murḍus yeffeɣ-d ɣer tezrigin IMTIDAD deg useggas 2022. D adlis wis tlata i d-yessuffeɣ umaru Tahar Uld Aɛmar. Isuffeɣ-d yakkan sin n yidlisen-nniḍen : ungal Bururu, ur teqqim ur tengir Tiẓrigin Azur (2006) akked wamud n yimagraden: Tafunast i itteẓẓgen pétrole, (2016).
- D acu i d tasleḍt tasentalant :
Yal aḍris aseklan d ajlal n yisental. Imeɣri ad yeg assaɣ gar wawalen n tefyar akked ugbur n tikta n uḍris akken ad yegzu asentel agejdan akked yisental inaddayen i d-isekcem umaru deg usnulfu-ines. Anermas yezmer ad as-yiwɛir ufhamn yisental akken yezmer ad as-d-yass yeshel. Llan yisental ara d-yefriren wehd-nsen meḥsub wejden, isebgen-iten-id umeskar, llan yisental d uffiren.
Imeɣri ad yesrewes gar yisental i d-yettuɣalen deg uḍris-nni. Ad yakkez gar yisental imezgiyen d yisental imaynuten. Ad d-iban ma yella umaru yerẓa leqyud yewwi-d ɣef yisental-nni tɣunza tmetti, ad d-iban ma yella umeskar ur yesɛi ara tugdi n tmenna kra yellan neɣ yettkukru…
- Tasleḍt tasentalant i wungal Murḍus :
Mi kfiɣ taɣuri n wungal Murḍus, uffiɣ deg-s kra n yisental i yi-d-ijebden lwelha ad ten-id-bedreɣ wa deffir wayeḍ :
- Imjuhad mmuten uqbel 1962: Ḥmimi d amjahed ula d netta meɛna ur iḥemmel ara ad imeslay ɣef lemjahda-ines almi t-nwan kra d aḥerki. ɣer-s imjuhad kfan deg 1962 kra n win i d-yeggran ur ittusemma d amjahed. Hatan amek i as-yenna : « imjuhad mmuten a mmi. Widen i d-yeggran, akka am nekk, d arraw … ur mxileɣ ara. Widen d-yeggran ssusmen, qqnen allen-nsen ɣef lbaṭel. ṭṭaqa deg-sen lhan-d d udifili akked cciɛat… » (sb17)
- « Nekk »: asentel-agi d anwa i d « nekk » ! D tiyersi yeggman ad tefsi. Amdan ur yefrin ara amek ara yili ? Amek ara yettxemmim ? S wacu ara imeslay? Acu n ddin s wayes ara yamen? Itteddu akken ddan waman d wamek i t-yemsel lqaleb n tmetti i as-yemlan amek ara yili armi yewqeɛ « nekk » deg « nekkni »
« nekk d acu-iyi ? » tecɣeb-iyi dayen kan… ur d-luleɣ ara d « nekk », meqqreɣ-d « nekk », ad mteɣ d « nekk ». « nekk » sseččayen-t, snernayen-t, ttbeddilen-as udem… ayen iɛeddan iɛedda, awer d-yuɣal ! nnesreɣ-d i leqwaleb.
- Tamiḍrant n tjadit : sin n yiberdan i d-yuɣal usentel-agi n tjadit yurzen amdan. Tajadit ikeblen tilleliyin d usnulfu. Nnif, lḥerma, tajdit ; tigi akk i aɣ-yeǧǧan neggra nugi ad neddu d zzman imi neqqen iman-nneɣ ɣer ttexmam n lejdud mačči ɣer ttexmam n tudert n wass-a. ilaq ad neɛdel akk ttexmam, ad neɛdel akk lḥeṭṭa… neɣ mulac d yir amdan ara ak-semmin neɣ d lkafir.
Tella yiwet n tenfalit i d-isekcem Uld Aɛmara deg uḍris-ines : nsečč akk s yiwet n tɣenǧawt.
- Taɣuri n yidlisen: taɣuri n yidlisen tennfeɛ amdan akken daɣen tessawaḍ ad tbeddel ula d ṭṭbiɛa n umdan. Tettekkes-it-id seg temda ideg yezzer, tettekkes leɣmam i wallen akken ad yefreẓ mliḥ.
Aya-agi iban-d snat n tikkal deg wungal Murḍus : tamezwarut asmi Muḥ yebda taɣuri n yidlisen, ifaq s tkkerkas n ddin, yerra-tt i truẓi n leqyud akken ad yebnu iman-is s yiman-is d wamek ara iḥemmel wayeḍ xas ixulef-it…
Simmal qqareɣ, simmal sseɣraseɣ leqyud, asmi d-mlaleɣ tasekla i yegren aḍad i lbuxari wa lbuḥturi, i bdant la tteldint wallen-iw… sb 25
tis snat asmi i as-iselmed Muḥ i Dalila taɣuri n yidlisen n tsekla akked tfelsafit. Telmed tilleli d yizerfan armi i asen-d-tessukkes i yirgazen, teǧǧa ula d argaz-is Ḥmimi, teḍfer tiḍfi-ines imalen ɣer tlawin.
- Ababat iɛeddayen ɣef yelli-s : Bernadette tekker-d deg uxxamn yigujilen, uwin-tt sin n yimɣaren ad tt-rebbin. Rran-tt i leqdic n uxxam am tqeddact rnu amɣar-nni itɛedday fell-as s tuzzuft armi d asmi i tt-id-tsellek yiwet n tmeṭṭut seg yir imawlan-ines. Bernadette tbeddel tamurt mi meqqret meɛna tuffɣa d yirgazen tuɣal-as d tanumi rnu yes-sen i d-tsekcam aɣrum-is. armi d asmi tessen Ḥmimi, iqbel-itt akken tella, iga axxam yid-s.
Ad d-yegrireb umɣar, ad yer ɣer tmeṭreḥt n Bernadette, ad tt-yeḥnec, yettɛedday fell-as. Yal iḍ, d buberrak… sb68
- Aɣlan azzayri (la nation) : Asentel-agi n uɣalan azzayri yuɣal-d ddeqs n tikkal deg wungal Murḍus. Iwudam terḥa-ten tnekkit n Lezzayer, ɣer-sen Lezzayer d tazzayrit am wakken i tt-bɣan yimeɣnasen n umussu aɣelnaw azzayri deg yiseggasen n 40. Ur tettili d tamurt yebnan s ccetla d tutlayt neɣ ddin. Tamurt wessiɛet ad idiren akk deg-s warraw-is akken bɣun ilin.
- Tayri deg yirebbi n umadaɣ n tegrawla: Ǧamila akked Ḥmimi d imjuhad, ulin ɣer udrar yiwen s lfuci ma d nettat d tafremlit tettdawi imejraḥ. Isemalal-iten umennuɣ, tesddukkel-iten tmurt. Teqleb fell-asen asmi i asen-d-beddlen aɣella n terbaɛt-nsen, Lḥaǧ bu tesbiḥ yewwi-d lqanun amaynut rnu isḥerrem tayri. Seg wakken ur asen-yezmir ara ixleq-d taccmat gar sin imḥemmalen, ḥekmen fell-asen s lmut. Ǧamila deg yidmaren-is yenta lmus, tenfeḍ rrif n wasif ma d netta isellek. Yeggul ad d-yerr ttar, yenɣa lḥaǧ.
- Iqjan n tmurt: d taḥkayt n yiwen n uqjun iḥerqen lebḥer, yettcetkay ɣef liḥala n tmurt akked yir tamɛict ttɛicin yiqjan di tmurt. Ma ur mmuten ara seg laẓ d fad ad mmten s ṛṛsas n lmir n tɣiwant. Ula deg ugudu ur ttafen ara lqut imi ittezwir-iten bu sin n yiḍarren ɣer din. Sb 61
- Attekki n wudayen deg tegrawla n 54: ddeqs n wudayen i d-yekkren deg tmurt n Lezzayer. Fransa asmi i d-tekcem tufa-ten-id dagi. Levy akked Batiste, d imeddukkal n Ḥmimi llan akk deg unnar n tegrawla. Ula d nutni tecɣeb-iten temsalt n Lezzayer.
- Lḥirak : amussu aɣerfan i d-yekkren deg 2019 d netta i d aseḍru n teḥkayt-agi. D assirem-nni i d-yuɣalen i yimjuhad-agi ikemren deg Fransa. Ferḥen imi kkren-d yilmeẓẓyen ara irefden asafu n umennuɣ. Iwudam (imeddukkal) n wungal-agi mlalen-d akk deg uzniq la république deg Fransa akken ad ddun deg tmesbanit. (Ixef aneggaru).
- Gay Pride(iberwaten) : d amussu n yirgazen iḥemmlen irgazen neɣ tilawin iḥemmlen tilawin. Asntel-agi iban-d sin n yiberdan.
Tikkelt tamezwarut, deg tmesbanit-nni deg uzniq n La république kecmen-d yimdanen ittekkin ɣer umussu-agi n Gay Pride s tɛellamin-nsen ad lḥun deg lḥirak. anallas yenna-as lukan ẓriɣ ad ten-id-afeɣ dagi ur d-leḥḥuɣ ara ma d ǧmimi yenna-as anef ad lḥun ula d nutni ad d-inin. (sb 130)
Ma d tis snat, Ḥmimi iwala Dalila (tameṭṭut-nni i t-yeǧǧan) deg tmesbanit tessuden taqcic deg yimi.
- Tasemlilt :
Ddeqs n yisental i yellan deg wungal Murḍus i yura mass Tahar Uld Aɛmar. Isental i d-yeddan nezmer ad ten-nṣennef ɣef tlata n taggayin : llan yisental imezgiyen i d-yettuɣalen deg ddeqs n wungalen am tayri, lɣerba, tagrawla, rebrab…
Llan yisental i d-yennulfan taggara-agi deg tira n wungalen am usentel « nekk », d tamiḍrant tamaynut i d-ibanen taggara-agi ad tt-naf ula deg wungal tiṭ d yileḍ n Mass Muḥend Akli Salḥi. ad naf daɣen asentel n tjadit yurzen timetti akken ur tattaẓ ara ɣer zdat, llan yimura i la yesfiqiyen imdanen yerran tajadit-agi d tarkizt iɣef tebna tmagit-nneɣ ugin ad as-brun, ad naf aya deg wungal n Luni Ḥussin « asebbaɣ » daɣen deg wungal «tiṭ d yileḍ »
Llan yisental i d-mugreɣ kan deg wungal Murḍus am usentel n yibabaten itɛeddayen ɣef tarrwa i d-rebban i d-uwin seg uxxam n yigujilen (Asentel-agi n ubabat ituɛeddan ɣef yelli-s ad t-naf daɣen deg wungal « tadist Yettwaneɛlen » n Zuhra Awdiya. Ad naf daɣen asentel n Ḥirak i tikkelt tamezwarut i t-id-mugreɣ deg wungalen n teqbaylit. Ad naf daɣen asentel n yiberwaten (Gay), d aṭabut deg tmetti-nneɣ meɛna yedda-d deg wungal Murḍus. Asentel n wudayen yennuɣen deg tegrawla n 54 mgal Fransa.
Asentel-nni n yiqjan ittcetkin ɣef tudert deg tmurt d amaynut ladɣa mi d-yebder lemyur n tɣiwanin ineqqen iqjan ittmenṭṭaren deg yiberdan, deg tmura n yizerfan ay agi d leǧrima iɣef ara teḥkem teɣdemt. Daɣen asentel-agi n uqjun ad iɛawen imeɣri ad yegzu adlis, ad d-yeṭṭef ixef n wungal.
