Le très-bas d adlis n Christian Bobin. D adlis yettaṭṭafen afus i wid d tid yebɣan ad ddun ɣer wadeg i ttunt ccfawat, i tettunt ccfawat ; d tinubga i unbac n tkatut akken ad twali deg wayen tenwa yezdeɣ yilem d wulac; ad twali amek i ẓẓadent tegnatin timecṭaḥ timsal timeqqrant. Tira n Christian Bobin, ama deg udlis-agi ama deg wiyeḍ, d tasarut itteldin tiwwura imedlen ɣef yiẓuran n ccbaḥa.
Di tɣuri n udlis-agi, Le très-bas, akken ara yaf umeɣri iman-is itezzer ɣer tegnit taddayt deg tudert n umdan i d-yettaflaw am uxeclaw seg tedfi i t-id-yessalayen. Mi ara as-yeṭṭef afus umsawal (narrateur), ad iserreḥ kan i yiman-is am win/tin yettɛumun gar lemwaǧi n tira N Bobin. Am udlis-agi am yidlisen nniḍen n Bobin. Aṭas deg-sen, gan d adrum uɣur ttmuqulen yiderman nniḍen ; cwiṭ d tismin, cwiṭ d asqizzeb amer azekka ad tili nnesba. Ccbaḥa, tezdeɣ-iten.
Ccbaḥa, ur telli d tasurift, ur tuḥwaǧ ilugan akken ad tili, mačči d « tikwal » i d tansa-s. Ccbaḥa d tayalast, tezdeɣ talliyin n wass akk, tezdeɣ imukan n wadeg akk. Tella deg uzrureg n tregwa, tella deg temduct ideg gellen waman ; tella deg tebbuct yulwan mi yezri fell-as dderz n wukmicen, tabbuct-nni i yessuṭḍen aleqqaq yerna tefka-as tadfi i ufus d yimi n baba-s n mmi-s, ahat d wayeḍ, yezmer ad yili diɣen d ameɛcuq i yessefran fell-as. Tella deg temẓi i tesgugum temɣer ; tella deg temɣer i iḍelqen ijufar-is akken ad teṭṭef deg-s temẓi. Tella deg wayen yettarra umdan deg wadda n tkatut-ines, yenwa dayen imečč, tečča-t tatut neɣ ur yuklal aẓenẓar n usmekti ; tella deg walluy n usmeki n wayen yejlan, yettali-d tikwal d anehhit n « limer ḥsiɣ akka ». Tella deg tili yetteṣren akken tella deg tafrara yemmalen ass amaynut. Tella deg yal amkan. Tella deg yal lawan. Awi-d kan tiṭ ad tt-tmuqqel. Tella ula deg ayen akken i tɣunza tmuɣli, tenwa-t yecmet, tella deg-s ccbaḥa, d tiṭ kan i tt-inekkṛen.
Mi ara iɣer umdan idlisen am wigi n Christian Bobin, ur yettɣimi d asemmaḍ ; ur as-yeqqar : « tella neɣ ulac-itt kifkif ». Γas yettu-tt, tira n Bobin d asmekti. Mačči kan d asmekti. Nnig akkin n usmekti. Idlisen n umaru-agi d tiɣri i tẓallit, di yal imir, di yal amkan, mebla luḍu, mebla agraw, mebla asekkir. D taẓallit ɣef wudem icebḥen n yal taɣawsa, n yal akal, n yal adeg, n yal afray (ula d win qerriḥen). D taẓallit n uferṭeṭṭu i umi teεreq tjeǧǧigt, wama mi ara ires fell-as iban. D taẓallit n nnεac n uḥbib i refden yiɣallen ur t-neṛwi. D taẓallit n yimeṭṭi n win/tin iḥemmlen, ur nessaweḍ ad as-d-yaker cwiṭ n tmuɣli i tiṭ n win / tin iḥemmel/tḥemmel. Tiẓilla, aṭas. Ccbaḥat aṭas. Iberdan yettawin ɣer-sent, ṭuqqten. Iberdan i d-yettarran syinna, diɣen. Fehmeɣ-d annect-a deg yidlisen n Christian Bobin. Le très-bas, d yiwen gar-asen.
Pr. Muḥend Akli Salḥi
