Amacahu… ɣas mačči d tamacahut ara awen-in-ḥkuɣ. Lkanun-nni n zik yak yexsi, yegla s temɣart i tt-id-yessawalen…
Amacahu ɣef tmurt ihennan, deg-s ala ayen yelhan ; ayen n diri ur yelli, ur yesɛi isem ula deg umawal n tutlayt n yimezdaɣ-is.
Amacahu ɣef wasmi i yebḍa umezruy ɣef sin : tekka twaɣit gar-asen. Yiwen d zzman « n uqbel tawaɣit », wayeḍ d zzman i yellan segmi tedra twaɣit. Amenzu d tallit n talwit d lhu, d tallit ideg urɛad i d-iban umdan. Wis sin d tallit n jjiḥ d usexser, deg-s iraɛ… umdan.
Amacahu ɣef zik-nni, ɣef wasmi tamettant d taggara kan, d taneqqiḍt taneggarut s wayes tkeffu teɣzi n tudert ; yettmettat yiwen deg wusu ; d tafekka i yettawḍen ɣer tlisa n tezmert-is. Tamettant, zik-nni, seg wagens n tfekka i d-tettaɣ aẓar, ur yelli uqraḥ ; mačči d aselqef i tesselqaf teṛwiḥt, d taguni tameɣlalt (éternelle) i teggan, d aya kan.
Amacahu ɣef wasmi i tbeddel tmettant, asmi i tuɣal d timenɣiwt, asmi i yefsa uqraḥ, yerna iǧuǧǧeg uksan. Imir i d-nulfan waṭas n wawalen deg tutlayt n tgelda (مملكة ) ur nesɛi ayen n dir, d awalen inemgalen n wayen yelhan (am uksan d wammus i yessefsaxen tayri d tezdeg). Seg yimir, yekcem tudert di tkessart, tawacḍa tegla s wayen yelhan.
Annect-a mačči d nekk i t-id-yufan iman-iw (day zemreɣ nekk i tigi !!!) ; nekk rriɣ-t-id kan akka s yimeslayen-iw d cwiṭ n ugzul ; d taɣuri i t-ɣriɣ deg yiwen n udlis, d awraɣ, ɣef tɣellaft-is tugna n yisekla i yetthuzu waḍu, amzun d taɛeǧǧaǧt n yijdi yerɣan i umi yerna yiṭij aqesḥan taweqqda. Aḍris-agi d ungal n Brahim Sadi, isemma-as الآدميون (nezmer ad t-id-nerr ɣer teqbaylit s wawal Imdanen).
Ungal-agi ixulef ungalen imezwura n umaru-agi, xersum widen akken i as-ɣriɣ yakan, i yecban ”الأعظم” (ahat s teqbayli Ameqqran n yimeqqranen) neɣ ”بوح الرجل القادم من الظلام” (Bawḥ, argaz-nni i d-yusan seg temḍellas).
Ungal-agi, yettawi-d ɣef tmettant n Illam (إيلام), yufa-t Nazir Macahu (نازر ماشاهو) yettwanɣa deg yixerban deg yiwet n tama i yuɣalen d tamurt n tsusmi. Tamettant-agi, tuɣal d talast deg umezruy n tgelda ihennan (المأمونة). Seg yimir-nni, yettwawekkel Cin Ha’ (شين هاء) akken ad d-yaf tifrat i twaɣit-agi (yettwafren netta acku yezga yettaru ɣef teḥkayin n lǧens nniḍen, Imdanen, i izemren ad ilin zedɣen ula d nitni ameɣrad (l’univers)). Seg yimir-nni, yebda unadi. Deg unadi-ines, ur yessaweḍ ara kan ad iẓer anwa i yenɣan, iḍal diɣen ɣef waṭas n temsal (ama d tid i t-yerzan netta s timmad-is, ama d tid yeɛnan tudert di tmurt-is, Tagelda ihennan, ama d tid yeqqnen ɣer tudert deg umeɣrad).
Ungal-agi, yemxalaf ɣef sin-nni i t-id-yezwaren acku tadyizt-ines (sa poétique) tebded ɣef kra n tgejda ulac-itent deg wungalen imezwura. Wigi, qqnen, s wudem neɣ s wayeḍ, ɣer tira tasilawt (écriture réaliste). Yettban-d wannect-nni deg waṭas n temsal, ya rzant iwudam, ya d adeg d wakud, ya d taḥkayt s timmad-is. Sin n wungalen i d-yettwabedren yakan, yezmer umeɣri ad asen-d-yaf assaɣ d tilawt n umaru neɣ d tin n unermas. Mačči am wungal-agi الآدميون. Tadyizt n wagi, teqqen ɣer wayen i nezmer ad as-nsemmi « asilew aneflay» (réalisme magique) ideg texleḍ tilawt d umakun (merveilleux) d urgaman (fantastique). Timlilit-agi n tilawt d umakun d urgaman deg wungal-agi, tessa-d akken iwulem i usugen n tudert ideg teṭṭef tfelseft amkan meqqren, deg-s yesɣerbel umaru amezruy n talsa d tɣara n umdan. Am win ara ak-yinin : aṭṭan n ddunit d amdan, ḥellu seg waṭṭan-agi d amdan ; ula d imal n umeɣrad (univers), ɣer umdan i yeqqen.
Taggara n wawal : ungal-agi yelha ; wid d tid yeqqaren s teɛrabt ad asen-yelhu ; ma d wiyeḍ, asmi ara t-suqqlen ɣer tutlaytn tɣuri-nsen.
Muḥend Akli Salḥi
