Mulud Ferɛun, mmi-s n wakal, ibedd ɣer yidis n ugdud. Yemsel s leḥmala n tmurt. Isekkilen-is d tildduyin n ssmex irennun ṣṣut-nsent i ṣṣut n waɛbar deg yidurar, rennunt afud i wawal n yiɣella n tegrawala deg rreḥbat tigreɣlanin.
Tesker Tsaɛdit Yassin asarag wis sdis n tmesrin n udlis amaziɣ deg Wat Wasif ɣef wallus n tɣuri i tira n umaru Mulud Ferɛun. D tasleḍt n waraten yura, d anadi ɣef wayen yefren gar yisekkilen, d asekfel n lbaḍnat d lesrar ikemnen.
Mulud Ferɛun, di zman-is teḍra-as am twizet n lfeṭṭa yersen gar zzebra d ufḍis. Yal idis yeqqar-as ur yelli seg-nneɣ, yeqqwa-tt uḍad isewɛaden. Seg tama, tideɣɣar neɣ isertanen n Lezzayer qqaren-as yedda d uṛumi, yefka tayet i uɛdaw. Ma d aṛumi iwehha ɣer-s, isers-it-id gar wallen-is, yebɣa ad sgugmen isekkilen-is.
-
Tamuɣli n yisertanen n umussu aɣelnaw:
Ddeqs n yizzayriyen ladɣa tideɣɣar yeɣran neɣ isertanen n Tirni n Uslelli Aɣelnaw (FLN) i yettwalin Mulud Ferɛun yedda d udabu Afransis. Ɣer-sen ur asen-d-tban ara timuɣnest-is, ur ttwaqnɛen ara s wayen yettaru neɣ ayen ixeddem. Ur d-yewwit ara deg urumi ixeddmen lbaṭel i ugdud azzayri. Tarbaɛt-agi ssawḍen ula ad as-simsen, ad as-lesqen tafawet n uḥerki.
Ferɛun, axeddim-ines di tallit n temhersa yella d aselmad syin yuɣal d anemhal n uɣerbaz afransis yeldin deg wakal azzayri. Yettweṣṣi tarrwa ɣer ttrebga. Ittanddar-iten ad wexren i tijehli d umenṭar deg yiberdan. Iɛeggalen akked yimeɣnasen n FLN ay-agi walant s yir tamuɣli. Ɣer-sen Mulud Ferɛun la yessibɛid ilmeẓyen ɣef unar n tegrawla. Ittewwlih arrac akken ur ttalin ara ɣer umadaɣ.
ɣunzan ula d tira-s. imi ɣer-sen la yettbeddil axemmem d wansayen akked yimenzayen n tmetti. La yettawi axemmem n yirumyen. Llan kra n tlufa neɣ isental i d-ittebdar deg tira yeffɣen i leqwanen akked tuddsa n tmetti tamensayt, tineslemt. Am tmuɣli n Ferɛun yessawalen ɣer useɛdel d umgada gar urgaz d tmeṭṭut yuɣa lḥal timetti tazzayrit : tameṭṭut ddaw n urgaz. Imeɣnasen n umussu n FLN ijeggren Lezzayer n uzekka s ddin ineslem. Sukksen-as-d imi i d-imeslay ɣef yiqbayliyen imasiḥiyen deg tmeṭṭi yettamnen s tineslemt.
Mulud Ferɛun di tira-s yewwi-d ɣef tuddsa tamaynut akked tsertit deg tuddar. D tallit i bdant ttruẓunt tuddsiwin timensayen deg beṭṭu n tuddar ; zik taddart tbeṭṭu d lesfuf (ṣṣef n wadda, ṣṣef n ufella…) tura inulfa-d beṭṭu n medden alaḥsab n ukabar neɣ n umussu asertan uɣur ittekki. Izzayriyen ttwalin aya d taruzi n tuddsa n tjemmuyaɛ akked yiderma am wakken yebɣa ad yeṛṛez tadukli, ad yefreq gar ugdud s asekcem n tektiwin ibeṭṭun izzayriyen.
-
Tamuɣli n tedbelt akked udabu n umekcam Afransis :
Izzayriyen ɣunzan tira d tektiwin n Ferɛun ziɣ ula d irumyen ɣunzan-t limer ttafen ad yesbek lmiddad deg yimru n Ferɛun. Rran-t-id gar wallen-nsen imi faqen tira-s tesakkay agdud. Tira-s ad taweḍ igduden nniḍen ara yeslen s liḥala ideg yettidir ugdud azzayri. Ferɛun izakkan-d tigellelt n uɣref ; tigellelt ur d-neɣli ara seg yigenni meɛna d amekcam aṛumi i d ssebba-s.
Ferɛun ma yettweṣṣi tarrawa n yizzayriyen akken ad ɣren ad wexren i tijehli. Netta di tidet mačči d aɛzal i yebɣa ad yeɛzel ilmeẓẓyen ɣef ṭṭrad d unerfud n leslaḥ. Tamuɣli-ines tettak tili i lebɛid, yeẓra tagrawla ara tt-isuddsen neɣ ara tt-yessiwḍen ɣer yiswi-s d wid yeɣran. Mačči kan s uɛbar ara tefru meɛna s yiɣil n yisertanen iseftayen tiktiwin. ɣef waya Fransa tfaq belli amdan-agi la d-yettrebbi ccetla yukin ara yuɣalen d izerman i yiri-s.
Amezruy ad d-icehhed daɣen ɣef tebratin d yittafttaren d waraten yura Ferɛun i tedbelt n Fransa ideg i asen-d-yettcetkay ɣef liḥala n yibalmuden izzayriyen i d-yettassen deg yir ḥala ɣer uɣerbaz : amek ara iɣer ugrud ittidiren deg lxuf! Amek ara ithenni ugrud isellen i ṣṣut n ṛsas yal ass! Ittcetki-asen ula ɣef lmiḥyaf d umgired i d-yettilin gar yibalmuden irumyen akked yibalmuden izzayriyen yeqqaren deg yiwen n uɣerbaz limer d lebɣi aɣerbaz afransi alayiki (laïque) yebnan ɣef lsas n tugdut d tegmat d tlelli ur d-yettili ara lmiḥyaf.
Tadbelt n Fransa limer tettaf ad sḥebsen seg uselmed. Acḥal d abrid iɛerḍen ad t-seqḍen s uxeddim nniḍen, sawḍen ula d as-sutren ad yeṭṭef almus adelsan n Fransa deg New-Work di tmurt n Marikan. Ur yeqbil ara Ferɛun, yettaf-asen-d timental akken ad yeqqim deg uḥric-agi n uselmed (aselmad-anemhal-amaswaḍ)
Xas ma yella tira n Ferɛun ur d-teffiɣ ara ɛinani mgal tamhersa tafrsnist. Meɛna yal win ara yeɣren tira-s ad iẓer liḥala ideg yettidir uɣref azzayri. Ad iẓer tawaɣit d texnansin texdem Fransa deg Lezzayer.
Tira n Ferɛun tesfaqqay agdud yellan ddaw n temhersa. Temmal iberdan yessawaḍen ɣer tlelli. Tira-s tettekkes tikkerkas yuɣen aẓar deg tmetti. Tikkerkas, ttekksen-tent tektiwin timaynutin ara yawin agdud ɣer tatrarit akken ad iqazem teqseḥ n wussan akked waɛdaw yellan d ssebba n twaɣit-is.
S cwiṭ n umiyez amdan ad yeɛqel ṣṣef uɣur yemmal Mulud Ferɛun. D mmi-s n wakal yeddren d ugdud-is. Yemsel s leḥmala n tmurt. D amdan yeɣran yerna lefhama, ur iqebbel ddel d lbaṭel. Fransa tamhersant, teɛqel-it sani iteddu. Tebda-t s uḥqar, ur bɣin ad t-ḥesben seg yimura. Asmi wallan isekkilen-is d tildduyin n ssmex irennun ṣṣut-nsent i ṣṣut n waɛbar deg yidurar, rennunt afud i wawal n yiɣella n tegrawala deg rreḥbat tigreɣlanin. Fransa teṭṭef-as-d tiɣmert, yettwanɣa deg wass 15 meɣres 1962 kra wussan uqbel timunent, tɣul lezzayer tilellit ara yesɛun allaɣ yecban Mulmud Ferɛun.
Belɛidi Lyas
