Ttmaggareɣ tirawin, tivideotin anida id-mmalen imawlan-nsent belli Karl Marx yusa-d ɣer tmurt n Leqbayel asmi id-yerza ɣer Lezzayer gar 20 furar d 02 mayu aseggas 1882.Unageɣ cwiṭ akken ad awṭeɣ ɣer lexbeṛ iqerben ɣer tidet. Seg uzeṭṭa internet, ssuliɣ-d yiwet tvideot d udlis(taMARXit d Lezzayer) id-yemmeslayen ɣef tirza n Karl Marx. Adlis-a d imagraden i uran netta d Engels, akked tebratin i iceyyeε deg ussan i yesεedda deg Lezzayer i Engels yakan d yelli-s.
Seg tvideot-nni, sliɣ ; seg udlis-nni, ɣriɣ :
Karl Marx yuṭen aṭṭan n « ddiqa », nnan-as ṭebba-ines belli d tamurt n Lezzayer ad as-iwalmen, d tignewt-is ara yeffɣen fell-as i wakken ad yelhu. Deg lmersa n Lezzayer, yemmugger-it Albert Fermé, lǧuǧ n temdint n Lezzayer, d netta i as-yeqqlen deg lmendad. Tazwara yekra taxxamt deg usensu « Hôtel Orient » (zzat n Lbusta tammeqqrant, tura). Ur yeqqim ara xilla dinna (sin wuṭan), ibeddel tamezduɣt, yeqqel ɣer usensu « Pension Victoria » , azniq Bon Accueil (Mohammed wis xemsa, tura) deg Mestafa-Ufella.
Sy-in i iceyyeε tibratin i umeddakel-is Engels, i yelli-s Jenny Laura
Seg tebrat yura i umeddakel-is Engels ass amezwaru n meɣres 1982 seg usensu PensionVicroria deg Mestafa-Ufella, ad nefhem belli teεreq-as ma ad yeqqel ɣer Legniz neɣ ad yeṭṭef abrid ɣer Biskra, dinna i yezmer ad yejji seg lehlak-is ; i mi tignewt, ussan-nni deg i t-id-yufa lḥal deg Lezzayer, tettwaɣ, ur yufi ara iman-is. Maca Biskra, akken i as-mlan, tebεed, 6 neɣ 7 wussan d tikli ; abrid yuεer i win yellan d amaṭun am netta.
Yemmeslay-d ɣef temdint n Lezzayer ; ayen isekdent wallen-is, ayen i as-d-ibanen seg usensu Pension Victoria, anida yezdeɣ : lebher, lmersa, ixxamen wa nnig wa am tedrejtin deg tewririn. Yerna yemmeslay-d ɣef idurar i as-d-ibanen, idurar n tmurt n Leqbayel, tiqucac n Ǧerǧer yessan s udfel.
Karl Marx yemmeslay-d ɣef Leqbayel tmetti-nsen ; meḥsuf ɣef wassaɣ yellan gar Uqbayli d wakal-is. Ayen id-yura yekkes-t-id seg udlis n Vladimir Kovaloveski, mačči d netta id-yerzan ɣer tmurt n Leqbayel yura ayen sekden-t wallen-is. Kovalevski, seg tama-s, yessen tamurt n Leqbayel s wayen uran : Adolphe Hanoteau d Aristide Letourneux.
Tirza n Karl Marx ɣer tmurt n Leqbayel, ur d-mmuggreɣ ara later-is. Wissen amek alami yuzzel wawal fell-as ? Ma yella kra uɣbalu anida id-tennebdar tisin-is ɣer wakal-a, ilaq ad ibin.
Leǧnas gemmun s tidet mačči s zzux!
——————-
Iɣbula:
1 – المركسية و الجزائر(ماركس- أنجلز) . ترجمة جورج طرابيشي. بيروت 1978
2 – Tavideot: https://www.youtube.com/watch?v=McLOczcxUf4
