Bachir IBRAHIMI, deg uṭṭun wis 41 n tesɣun « Elbassair » n 28 yunyu 1948, yura yiwen umgarad anida id-yessban-d lɣiṭ-is mi i yesla i wawalen n teqbaylit deg ṛadyu n Lezzayer ( tizlatin, isallen) d uṭerjem n wanawen-is ɣer teqbaylit deg Usqamu azzayri.
A-t-a wayen id-yenna:
“D acu i d taɣect-a yettseṛsiṛen deg yimeẓẓaɣ seg teswiεt ɣer tayeṭ, ur d-nettbin siwa deg tiyitiwin n stiεmaṛ?
D acu i d taɣect-a tameεfunt id-yulin iseggasen iεeddan seg Ṛadyu n Lzayer, asεeddi n tezlatin d yisallen s yiles aqbayli, umbeεd yuli-d wawal: ilaq aṭerjem ɣer teqbaylit i leqdic n Usqamu azayri, zzat usṭerjem ɣer taεrabt?
Annect-a akk d ccan i teqbaylit? D leqder i yimawlan-is? D asteεref s uzref-is deg tudert d wanda yedda uẓar-is deg tmurt?
Xaṭi, ta d tasertit taderwict ɣef yiwet lqum n ugdud-a, tiḥerci n wuccen n stiεmar ɣef lqum niṭi, d beṭṭu gar-asen, d aεekki fell-asen.
Snat tuɣac-ayi d tikli deg ubrid-nsent, d aseqrureε i tqeṭεiyin itteddun ur ẓrint anida, deg sḥari ur d-qeṭṭεen wallen.
Snat tuɣuc seg yiwet snitra i umi xeṛben yinzizen, iswi-ines yiwen: d tasusmi i taɣect niṭi id-neṭṭqen tidet id-qqaren: tamurt-a d taεrabt ; ilaq ad tili tutlayt-is d taεrabt d tunṣibt. Usant-d tuɣac-nni timeṭṭuyac ad tt-rwint akken ad ssimnen medden belli tamurt-a deg-s xilla leǧnas d tutlayin, yiwet ur tettufrar ɣef tayeṭ, yiwet ur tettali d tunṣibt.
Ulac Aqbayli i izedɣen deg temdint ur nfehhem ara tafransist. Ulac Aqbayli n taddart, siwa drus, i ifehhmen siwa taqbaylit, maca tuget ur sεin ara “radyu”, axaṭer ur sεin ara tafat (trisiti), akken ur asen-tettunefk ara uma tafat n tmusni. Annect-nni merra sɣur stiεmar.
D acu i d asderwec ɣef Leqbayel s tmeslayt-nsen?
Ulac Aqbayli deg Usqamu azayri ur nessin ara tafransist.
D acu i d lmeεna n usbeddi n ṭerjman s teqbaylit?
Nekni nefhem lmeεna-s. Ma d tidet: tamurt-a d taεrabt, Leqbayel d inselmen, d Aεraben, taktabt-nsen d leqran i qqaren s taεrabt, ur qebblen ad beddlen ddin-nsen d tutlayt-is.
Maca imcumen ur fehhmen ara.”
Seg sy-in ɣer da, mačči yiwet mačči snat tuɣac id-yennernan:
– Taɣect n useggas 1990: Tamaziɣt deg tesdawit
– Taɣect n useggas 1991: Aɣmis s tmaziɣt deg TV n Lezzayer
– Taɣect n useggas 1995: Tamaziɣt deg uɣerbaz.
– Taɣect n useggas 2002: Tamaziɣt d tutlayt taɣelnawt
– Taɣect n useggas 2009: tlul-d TV Tamaziɣt.
– Taɣect n wasmi yella Ouyahia d ameqqran n lḥukuma n Lezzayer: yesseqdac Taqbaylit deg wanawen-is.
-Taɣect n useggas 2016: Tamaziɣt d tutlayt tunṣibt
– Taɣect n was 23/11/2018 ɣef 18h30: sεeddan-d lfilm mmeslayen-d ɣef Ibrahim deg TV Tamaziɣt.
– Taɣect n tsuqqilt-a n umagrad-is yuran s taεrabt ɣef teqbaylit, yeqqel ɣer teqbaylit.
