…Akken kan neffeɣ i Bgayet, iba yiṭij-nni, iɣum-it usigna. Iɛreq-aɣ Iḍ d wass. Ur iɛṭṭel ara usigna-nni, yerra akkin i lebḥer. Abrid yeččur d tikerwas. Nleḥḥu dac dac. Ur d-mazal ara aṭas ad naweḍ ɣur Sidi Ɛic. Wissen acimi akka ḥebsent tkerwas : ahat d abarajn yijadarmiyen neɣ, ahat, d laksida. Anef ihi ad ncaɣ di tizegzewt n tɣaltin. Ncax, ncax, n cax almi d-isuɣ umeddakel-iw :
- wali kan !
- d aci ara waliɣ ?
- Ademmaḍ-ina, muqel, d Saɛuc uZellemcir akked umeddakel-is Jriri i iteddun.
Lukan ur sineɣ ara ameddakel-iw ad as-niɣ d asebsi i d-ineṭqen.
Newweḍ ɣur Sidi Ɛic, nenna-yass ad nsew lqahwa. Nedda di tlemmast n temdint almi d abrid yettawin s Akfadu, neḥbes. Yemmuger-aɣ uqeehwaji s wecmumeḥ i d aɣ-yesettun deg webrid. Nesteɛfa cwiṭ, neffeɣ-d. Taman lqahwa , neɛqel axxam n tezrigin Azur i d-yellan d lmenda i Bururu. Axxam-nni, yuɣal tura yeznuzuy pizza d cwarma. Nuɣal ɣer tkerrus, neṭṭef iberdan yessawnen. Mebla cek, d tiɣaltin-nni ideg yurar Azeddine Meddour i igan irebbi i tlalit n « Adrar n Baya ».
D abrid ɣur temnaṭn Cemini d At Weɣlis. Nemlal d warrac n l’Agora du livre, naf-iten-in ttheyyin reḥba n 2024.
- Amek , tugadem ara lḥers-agi yellan ɣef yidles ? Yezmer ur d awen-d-ttaken ara ttriḥ, i niɣ i Nadir.
- Yezmer ur d aɣ-t-d-ttakken ara. Nukni ad t-nheyyi. Ayen i iweɛren d lukan ad nebru i ṭbel deg waman, ad aɣ-tuɣal d tannumi. D amennuɣ ay ameddakel. Yakk netturebba-d i cwal.
Yenna-yaɣ-d Nadir belli rreḥba n useggas-a ad as-tuɣal tejmilit i yiwen seg yinaẓuren n temnaṭ. Mazal ur tt-fran ara di ṛṛay d anwa-t unaẓur-a. D tidet, mačči d yiwen unaẓur neɣ d yiwen n tnaẓurt i d-fkan idurar n Wekfadu : Madjid Soula, Boudjemma Agraw, Louiz, Hadi Aouaghlis, Tilyuna Su, Hamid Tibouchi, Djamel Alem, Idir Akfadou, Rachid Ferhani, Amour Abdenour, Hcine Lasnami, Mohand Ouidir Bouaraba, MarcelMouloudji….Lḥasun mačči d yiwen d yiwen, mačči d yiwet i icebḥen idles. D Akfadu ucayellellah !
Nemmekta-d Massinissa Idir, ddeqs aya seg wasmi i t-teḥwes tmettant. Masinisa, tuɣ-t d aselmad n tmaziɣt di tesdawit. Gar isenfaren i d as-yellan deg wul, tazrewt ɣef yimaziɣen n watlas n Blida. Asenfar-a yewwi meṛṛa lweqt-is d texriṭ-is. Ur t-ifuk ara, yemmut meẓẓi uqbel ad yerwu tamaziɣ, uqbel ad t-terwu ula d nettat.
At weɣlis fkan-d i tmaziɣt yiwen n wergaz d lwiz : Haddadou Mouhand Akli. Ula d netta yewweḍ leɛfu Rebbi, ula d netta ur t-terwi ara tmaziɣt, ladɣa mi-d-yelha s uqɛed-is s tira d usenlfu n wayen ara tt-yerren ɣer lber n laman.
Ad asen-yewwɛṛ lxetyar i warraw n Agora du livre ! Negguma ad nettixer i Wat Weɣlis, jebbden am kir. Maɛna yettraju-yaɣ webrid. Mazal ad nɛeddi ɣer temnaṭ n Uzellagen, Akbu, Tazmalt… Akken nerkeb di tkkerust, tluɛa-ɣ-d taɣect : « Jamais, ad truḥem ur nemẓir ? ».
D Toufik i d aɣ-d-iluɛan. Mačči weḥdes i yella llan yides ixullaf-nni yettaken abeḥri i turet n tmaziɣt : Tayeb, Gaya, Yusten… Nemsalam, nemmyef ttiɛad i rreḥba d-iteddun. Syin ar din, neḍmeɛ di terbaɛt Iseflan ad aɣ d-snulfun ayen ara ɣ-yawin s Aẓar.
