… nteddu ad d-nefeɣ si Tezmalt, iban-aɣ-d yella wayen nettu. Maɛna ruḥ keč mmekti-t-d ! Neḥbes ar lpumpa n lisuns ad as-nɛemmer i tkerrust, nettraju nnuba-nneɣ deffir yiwen ufurgu. Mi nwala afurgu-nni i d-nemekta d acu i nettu. Di lemri-nni n deffir yura-d : Iɣil Ɛli – Sṭif. Acu d-yewwin afurgu yettawin seg Iɣil Ɛli ar Stif ɣer Tezmalt ? Ahat am nukni : d abrid kan. Lḥasun yesmekti-yaɣ-d de wayen nettu : Iɣil Ɛli. Nerra lisuns, nzgzem-itt di ṛṛay : d abrid ar Iɣil Ɛli.
Nuɣal ar deffir. Abrid s Allaɣen, At Rzine…Iɣil Ɛli.
Lḥamu-nni n uzal yeǧǧa nnuba i ubeḥri. Ṭlam ur ɛad iɣum tiɣalti n Biban. Nteddu s leɛqel kan, ula d abrid cwiya kan. Icewwiqen n Uleḥlu settun-aɣ deg yir liḥala n webrid ukerrus.
Tedheṛ-aɣ-d Iɣil Ɛli, neḥbes, nessens amutur ur, nunef-as i Uleḥlu ad yeččewiq, ners-d si tkerrust, nettqabal deg Iɣil Ɛli. Tasusmi akked ṭlam tedhen tiɣaltin n Lbiban. Uleḥlu yessusem. Amecwaṛ akka, yebbeɛzeq-d ucewwiq si tegnawt, tecarrew teksumt. D taɣect n Tawes Ɛemruc. Deg yiwet n dqiqa, yesettu-yaɣ ucewwiq n Marguerite di Bengrina d terbaɛt-is : d l’Eternel Jugurtha i d-yeddan deg ucewwiq. Iɣil Ɛli teṭṭes. Ahat, akken axir ulac dderz ara yesxerben tirga n Jean Lmuhub, argz-nni yeɣran tafransist, yettrun s teqvaylit, argaz-nni d-yeskeflen, s westilu, aẓar-nni bɣan ad snegren, argaz-nni yumnen bell « L’homme ne peut vivre s’il ne s’accepte tel qu’il, s’il ne se sent pas accepté par la société où il vit, s’il ne peut avouer son nom (Ur yezmir ara ad yidir umdan ma yella ur yeqbil ara iman-is akken yella, ma yella yeḥulfa belli urt-teqbil ara tmeti anda yedder, ma yella yeffer isem-is) ».
I d-tefka Iɣil Ɛli deg yirgazen akked tlawin : Lbacaɣa Lmuqrani, At Ɛmruc, Malek Ouary, Meriem Belmihoub, Ali Kichou, Ali Haroun, Abdelkrim Djaad… Ula d Mouloud Kacem akked Abdelmalek Sellal syin. Atan ihi, yenna-t-d umedyaz :
Ad k-awiɣ s anga nnḥas
Akked ddheb mmlalen,
A k-awiɣ s anga
Tirugza d lεib ttnalen
(…)
Ma yella tebɣiḍ ɣur-sen
I wakken ad tegmeḍ ilqiq
Ma yella tebɣiḍ ɣur-sen
I wakken ad tuzureḍ irqiq
Ma yella tebɣiḍ
Ad tεeddiḍ s tehri di ṭṭiq
Ad k-nɣen deg yiḍ
Ṣbbeḥ ad k-id-awin d-acewiq
Ad twaliḍ nnif
Wi akken ɣef i d ak-ḥkan
Ad twaliḍ lḥif
Yettruẓun irgazen ur knan
(…)
Ncax, nettu iman-nneɣ. Anef-as ihi. Seg les meules n Marguerite Taous Amrouche ɣer tsirt n Malek Ouary (Le grain dans la meule). Nqabelɣer tsirt d uɛeqqa yellan daxel-is, ffɣen-d isekkilen, ufhen acemma, uɣalen rsen d ilqaɛa : Yal tasuta am txelxalt(maillon) n uzrar ɣezzifen. Tixelxalin yexdem uḥeddad, uqbel tasuta-nneɣ, mazal-itent wenɛent. Ulac deg-sent rriḥa n sḍid (Chaque génération est comme le maillon d’une longue chaîne. Les anneaux qui ont été forgés avant nous sont demeurés sains et sans défaut. Pas la moindre tâche de rouille) ».
Amek-itt txelxalt n wass-a ? Amekara tili tin uzekka ?
Tahar Ould Amar
