Yebda yettizwiɣ wudem n Sadiya L’euro, teduqqes acemma, tleḥu ula tikli. Frḥen dayen kan inebgawen-is. « Dayen ifuk Rebbi lḥif a nna Sadiya. Deg wasmi tkecmeḍ usu i tgen taddart », d as-yenna Belqa. Tezzi ɣur-s, tečča-t s tmuɣli, terra-yas : « amek akka tgen taddart ? ». D Ḥmimi i d as-d-yerran, yemmesla-yas-d ɣef lbaṭel i iɛeddan ɣef taddart, seg wasmi akken i tuḍen :

  • Lbaṭaṭa tewweḍ 140 idinaren, aksum yessaweḍ ssuma n Maruti, FFCD yekkuli, TikTok d fisbuk sengeren tiseqqumay d tdukliwin, tamaziɣt tettefeɣ si lakul terra ɣer lalkul, Cix n lǧameɛ yerna tameṭṭut tis renbɛa, ddifandin fella-ɣ timeɣriwin. Fkan-d ttesriḥ ḥala i tid n yijeqḍuren, n yiḍebbalen, n temcerḍin..
  • Ad kun-yexdeɛ Rebbi ! I wacu i tellam kunwi ?

Susmen, ulac win s-d-yerran. Tmuqel-iten. Win iɣef ters  tiṭ-is, ad yebru i uqerru-s. Tessawel i Mina :

  • A mina yelli, ruḥ siwel-as i Dadda-m Militant ini-as ḥwajeɣ- tura.
  • Yerbeḥ a nanna !

Dezdeg, Belqa d Lbacir mazal-iten bran i wallen-nnsen. Atan inṭeq-d Dezdeg :

  • Lḥasun, tura imi teḥliḍ a nna Sadiya, ad d-nelhu s lecɣal n taddart.
  • Yah ! I lukan i mmuteɣ, ad temmet yid-i taddart ?
  • Cafuɛa-m a nna Sadiya, ad yemmet wemcum !

Atan ileḥq-d Ddda Militant s ukarṭab-is. Yuɣ aqerru n Sadiya, yenna-yas :

  • Nɛem a nna Sadiya ?
  • Mmmel-iyi-d a Miltant acu akka akk yeḍren, seg wasmi akken ṭṭfeɣ usu.
  • Mačči d yiwet a nna Sadiya.
  • Aha ttḥesiseɣ-ak !
  • Tebboune yuɣal dBerzidan i tikkelt tis snat.
  • Wagi ẓriɣ-t, uqbel lbuṭ. Rnu !
  • Rus yewwet Lukran, Hamas yekcemtamurt n wudayen,yexdem tawaɣit deg-sen. Israel tɛewwul ad ttenger Hamas d Hizbolah, tekcem Ɣeza d Lubnan, texdem deg-sen afernas. Qerbent-d tefranin di Marikan, waqila d Trump ara d-yuɣalen. Macron i ɛreq-as cḍeḥ…
  • Aya meṛṛa mačči d aɣbel-iw. Mmeslay-id ɣef wayen d-yellan di taddart.
  • Rabbaine ur yettekka ara di lbuṭ. Nnefṣ n FFCD yettekka, wayeḍ ala. Imeḥbas bdan ad d-tefɣen yiwen yiwen. JSK  mazal ur d-tuki ara, maɛna wicqa sṭad yecbeḥ dayen kan. KKsen-aɣ ṛṛeḥba n wudlis amaziɣ, maca ur nessusem ara : nerfa di fisbuk…
  • Susem, dayen, berkayi ! Aru ɣur-k : azekka tameddit adtenejmaɛ taddart di lakul. Win ur yettilin ara di ttiɛad, ddnub i yir-s.

Tahar Ould amar

 

Post Views: 32