Ungal فيلا الفصول الأربعة n Brahim Sadi, i d-yeffɣen deg useggas n 2019, yettawi-d ɣef wayen yeḍran deg tedwirt i wumi semman « ukkuẓ n tsemhuyin » asmi i yerza ɣer dinna Lhadi akken ad iẓer Ḥmed Yaṭu, win yellan zik d aneɣlaf ; yerza ɣur-s, yenwa d tirza-ines taneggarut. Mi yuweḍ yufa-t yemmut, yerna iman-is i yella deg uxxam-is. Ḥmed Yaṭu, rẓen wafriwen-is segmi ur d-yeddi deg umuɣ (liste) n yineɣlafen n unabaḍ amaynut. Yessawel Lhadi i twacult n Ḥmed Yaṭu d wid i t-yessnen ; yiwen ur d-yusi iḍ-nni. Yeqqim Lhadi iman-is, iɛezzer ɣef lmeyyet armi d azekka-nni…
Deg yiḍ-nni, yeḍra wayen yeḍran : d astesqi ɣef wayen ur d-tettmagar tririt, d aɛebber ɣef win yemmuten, d tisin d tuɣalin gar yizri d yiḍ-nni, d alluy d usubbu deg tedwirt-nni (lvila-nni) d anadi ɣef lewṣaya, ahat yeǧǧa-tt-id Ḥmed Yaṭu. Deg unadi-ines, yufa Lhadi tikutay (mémoires) n win yemmuten akken yufa ayen nniḍen.
Ungal, s timmad-is, d tasiwelt n tudert n Ḥmed Yaṭu d tudert n Lhadi. Snat n tudertin-agi gant am tzarezt, ur tezmir yiwet ad tili mebla tayeḍ. Lhadi, yettuneḥsab d tili n Ḥmed Yaṭu, ayen i as-d-yenna ad t-yexdem, ur yezmir ad as-yini « zzant neɣ rɣant » ; iga am wakli-s.
D Lhadi i d amsawal deg wungal-agi. Yessawal-d ayen yeḍran amzun d asufeɣ i d-yessufuɣ ayen i t-iqerḥen seg wayen yedder deg wassaɣ-ines d Ḥmed Yaṭu. Yessawal-d taḥkayt-nsen/tiḥkayin-nsen s wayen akk yedder d Ḥmed Yaṭu d wayen akk ɣef yecfa seg wasmi yella meẓẓi, akken diɣen i d-yessawal s tɣuri n kra n yisebtar deg tkutay n Ḥmed Yaṭu.
Ungal-agi d ungal ideg tettemjadal tsekla d tfelsuft ; asentel n umjadel-agi d amdan. Tilin n umdan yeqqnen ɣer wayeḍ, yebɣa neɣ ur yebɣi, d tamsalt i wumi i yefka umaru, Brahim Sadi, azal d ameqqran. Iga-tt d udem gar wudmawen n wassaɣ gar tekriḍt (violence) d udabu n umdan ɣef wayeḍ.
S wungal-agi, yettban-d am wakken Brahim Sadi yebɣa/yessarem ad ikemmel deg tira tafelsafit n tsekla. Tamuɣli-agi, tella yakan di tira-s taseklant, d acu kan tettban-d mliḥ deg wungal-agi d win d-yezwaren wagi i wumi isemma الآدميون*.
Tutlayt n wungal-agi, akken i teshel i tjebbed, tuzzel deg yimi n umsawal, yis-s yekkes umaru tiderray i izemren ad qerɛent imeɣri ur ittadef ara deg umaḍal ideg tettwaɛrak tsekla d tfesuft.
Win/tin yufan ungal-agi, ma yeqqar s teεrabt, ɣas ad t-iɣer, ur yettendam ara…
*wali aḍris i d-yettawin ɣef wungal-agi الآدميون deg : https://tasghunt-taseklant.com/kab/blog/2023/08/28/ɣef-wungal-n-brahim-sadi- الآدميون
Muḥend Akli Salḥi
