Anwa ur newwit ara wayeḍ s yinzi? Anwa ur ten-nesseqdec ara di tudert-ines n yal ass mi ara yettmeslay d yimdanen? Ulac win yeẓran anwa ten-id-yeǧǧan ? d inzan d-yeqqimen deg yilsawen n lɣaci. Ǧǧan-ten-id imezwura, wwḍen-aɣ-id ass-a, xas ur nessin ara imawlan-nsen, nettawi-ten, qqimen-d di tgemmi n tsekla nneɣ, deg yidles-nneɣ.
Llant tebdar yesɛan imawlan. Amedya, anwa ur nessin ara tagi : Yir tagmat am kalitus, mi ɣezzif messus, mbeεid i yettak tili (Si Muḥend u Mḥend) neɣ Lbaṭel, cebbi-as kan deg udfel, mi ara yettdub s leεqel, alamma yefsi waḥd-es (Sliman Σazem). Awal ar wawal, ad d-nini akken s-yenna Si Muḥend u Mḥend, akken s-yenna dda Sliman… S udlis-agi n Neǧmeddin, nezmer ass-a ad nebder tibdar nnan at wass-a s yismawen-nsen…
Neǧmeddin yewwi-d amaynut deg udlis-agi-ines. Ad d-naf ifren-d tibdar i yuran kra n yimura iqbayliyen deg yidlisen-nsen, wid-n yeɣra, ama deg ungalen, tullisin, tamedyezt…. Ur d-yegmir ara inzan iqburen, neɣ wid d-ssuqlen, yeddem-d kan ayen d-snulfan nutni, d amaynut.
Igmer-d 500 n tebdar seg 73 n yidlisen. Yebḍa-ten ɣef 85 n yisentalen.
Igerrez udlis mliḥ, acku dayen ara igen tabɣset neɣ ara iwelhen i yimɣriyen akken ad gzun ayen yellan deg yidlisen-agi, akken ad ɣren idlisen-agi, dayen ara ten-ijebden akken ad issinen imura d yidlisen-nsen.
Neǧmeddin Mwayessi (Nedjmeddine Mouaissi), d yiwen n umaru, ilul-d deg useggas n 1999 deg At Wertilan, yesɛa agerdas n turagt deg taɣult n tsenilest d tesnalmudt n tmaziɣt i d-yewwi di Bgayet, Yettkemmil master-ines deg uɣerbaz unnig i yiselmaden n iɛeẓẓugen-igugamen di temdint n Lzzayer. Assufeɣ-is amenzu d ungal : Fehmet-iyi, ttxil-wat (2022) ar teẓrigin Ccix Muḥend Ulḥusin.
Ass-a rriɣ ad steqsiɣ ameskar akken ad negzu ugar fell-as :
-Amek i ak-d-tusa tekti n tira n udlis-agi ?
Tikti tusa-yi-d imi ɣriɣ aṭas n yidlisen. Mi ara qqareɣ adlis (ungal, tullist, tamedyezt…) ḥemmleɣ ad sxerbubbceɣ fell-as: sbanayeɣ-d ayen umi sriɣ; akka am tebdar. Mi ssawḍeɣ ɣriɣ ddeqs n yidlisen ufiɣ jemɛeɣ-d xilla n tebdar! Nnig n waya d tibdar d timaynutin, uran anagar s teqbaylit. S wakka tusa-yi-d tekti ad tent-sdukkleɣ deg udlis. Iswi n udlis-a, ad afen yimseqdac n teqbaylit s wacu ara cebbḥen, ara sǧehden inaw-nsen s tebdar d timaynutin.
-Tenniḍ-d belli mazal ad d-taruḍ adlis wayeḍ. Ihi ilaq ad teɣreḍ idlisen nniḍen, neɣ dayen theggaḍ yakan adlis?
Ih, nniɣ-d aya. Ad d-rnuɣ adlis-nniḍen? Adlis-a ad d-ilal am gma-s: ad rnuɣ ad ɣreɣ ddeqs n yidlisen. Dacu, adlis wis sin ad yemgarad ɣef umezwaru…
-Ma nniɣ-ak-d Muḥya, ur d-yessufeɣ ara idlisen maca aṭas n tebder i nezmer ad nekkes deg wayen yura? D acu ara d-tinid deg waya ?
Ad d-iniɣ: tebɣiḍ ad d-tiniḍ iwac ur d-seddaɣ ara tibdar n Muḥya? (hhhhh). D tidet, Muḥya yenna-d xilla, d amdan ttqadareɣ nezzeh. Ur d-seddaɣ ara tibdar n Muḥya, imi ferneɣ ad d-sedduɣ anagar ayen yuran. Ahat deg udlis wis sin ad d-sedduɣ ayen i d-yenna. Aya yeḍra daɣen d Mass Kamal Buεmara; yenna-d aṭas, dacu gar yidlisen-is i ɣriɣ ( wid i ɣriɣ yakan) ur ufiɣ ara kra n tebdar!
Si zik, awal ar wawal, ad d-nini akken s-yenna dda Sliman, akken syenna Maεtub, Lewnis… atg. Ahat yiwwas ad t-ternuḍ adlis n tebdar ɣef wayen d-nnan icennayen ?Ur cukkeɣ ara! Axaṭer, icennayen ttwassnen; ttwassnen ugar n yimura. Iswi-inu d adellel i tsekla yuran, ma nniɣ-d tasekla yuran, anamek-is wid yettarun s teqbaylit.
-Tettkemmileḍ master-inek deg uɣerbaz unnig i yiselmaden n iɛeẓẓugen-igugamen di temdint n Lzzayer. D acu i d iswi-inek ?
Iswi-inu: ad slemdeɣ tamaziɣt i yiɛeẓẓugen d yigugamen, daɣen, ad d-sekreɣ kra n yimagraden (ahat idlisen) s teqbaylit ɣef taɣult-a; ad skecmeɣ taqbaylit ɣer taɣult-a!
-Asteqsi aneggaru. Greɣ tamawt tugget n yimura ttarun ismawen-nsen ɣef yidlisen s tefransist. Ula d kečč akken, Wissen ayen ɛni?
Ad d-mmeslayeɣ fell-i, imi wiyaḍ ur ẓriɣ ara iwac. Nekk ttaruɣ-t s tlaṭinit, akken ad yishil unadi ɣef wayen i ttaruɣ.
Fahim MESƐUDEN
TIBDAR N YIMURA IQBAYLIYEN
500 N TEBDAR,
111 n yisebtaren
Ctember 2024
Tazwert : Ṭariq AṬINUC
Tiẓrigin Ccix Muḥend Ulḥusin, .
