Tasekla tamaziɣt i yedduqsen acemma, taggara-agi, ad ternu mebla ccek aduqqes ugar s tlalit n warraz i ungal amaziɣ ara d-tesebded ussan-a Berbère-télévision.
Arraz Berbère-télévision n ungal Amaziɣ (akka i d isem-is) yaɛna meṛṛa tanfaliyin yettarun s usekkil alatini.
Γas neẓra acḥal d abrid i ttekkin s ttawil n sponsoring, tilibizyunat, rradyuwat neɣ iɣmisen, werǧin d-tella tilibizyu d lmendad (rnu, weḥdes kan) i tlalit n cɣel yecban arraz aseklan. D acu kan Berbère-télévision txulef tilibizyunat nniḍen s tgejdidt i textaṛ d abrid-is (ligne éditoriale), imi tefka azal i tmagit akked yidles amaziɣ.
Di temlilit d-yellan ddurt yezrin gar Miloud Lassal, yiwen seg imḍebren n Berbère-télévsion, akked iɛeggalen ara yekkin deg tseqqamut n warraz, yella-d wawal ɣef teflest (crédibilité) ara yesnernin di ccan n warraz. Γef waya i twehha, tessawel Berbère-télévision i yimdanen i yesɛan assaɣ akked yidles, ladɣa tasekla.
Di tseqqamut ara yekkin di temzizelt tamezwarut, ara d-yili, deg waggur n yunyu, ad naf : Hacène Halouane ( d anerdal n tedwilt taseklant, d asdawan), Allaoua Rabehi (d amedyaz, d asdawan), Mohand Akli Salhi (d amaru, d asdawan), Ramdane Achour (d asdawan) akked Tahar Ould Amar (d amaru, d aneɣmas). S tama niḍen, Takfarinas Nait Chabane (d anerdal n tedwilt taseklant, d asdawan) d amalal (commissaire) n wArraz.
Ungalen ara yekkin di temzizelt tamenzut d widen d-yefɣen deg useggas 2024.
Ugar n yisallen ad d-berreḥ yessen Berbère-télévision, ussan-a d-iteddun.
Tahar Ould Amar
