Adlis, d nnehta-nni n tudert ideg d-tteddun yiḥulfan akked yineẓman, tumert akked yiɣeblan. Adlis, d abeḥri-nni i ḥwaǧent turin, neṭṭafar-it am tili yeṭṭafaren bab-is… ammer ad nemmet. Adlis, d tiremt n wallaɣ yessedduyen tafekka-nni i d-yettarran nnhati n tudert.
Ɣas yeḥma lḥal, ɣas smenyafen medden lebḥer ɣef Tmesrit n udlis, ɣas « ur nzin ara yidlisen », ɣas ur terbiḥ ara Tiddukkla Timetti d yidles « AGRAW » idrimen, ɣas d leɛtab kan i tt-id-iṣaḥen, tewweḍ s iswi : tsemlal-d imura akked yimsiẓrigen deg teẓrigt-a tis 6 n Tmesrit « Agraw n udlis » n Uẓru n Cemmini deg at Weɣlis. D tajmilt i Unaẓur-Ameɣnas Boudjemâa Agraw. Seg 17 armi d 19 seg waggur-a n yulyu 2025, yella-d wawal ɣef tudert akked umennuɣ n unaẓur ɣef tmagit, tutlayt akked tugdut. D amecwar s wazal-is iɣef d-mmeslayen yimeddukkal-is ladɣa Madjid Soula (s yimeṭṭawen i la d-yettmeslay axaṭer yemmut mmi-s ussan-a yezrin, ad yesgunfu di talwit timezgit). S wannect-nni n leḥzen, ɣas mačči d lawan, ibedd unaẓur s idis n umeddakkel-is Boudjemâa.
D ahil izaden, akka i nennum nettaf timliliyin-a « ɣef yiri n udlis », d tagnit i tɣuri, i wawal akked uskasi. Irmad umḍinen, isefra, aẓawan, tinemsalin, amezgun akked yisaragen ussnanen yerzan timsal n tutlyat, n tira akked twennaḍt. Di taggara, yettunefk warraz « Mohand Akli Haddadou » i yiḍrisen i d-yufraren :
* D « Nnhati n usefru » n Mebarek Gamar i yewwin arraz n tmedyezt, ssarameɣ ad ikemmel « asefru-nni ur ɛad yuri ».
* Arraz n wungal, tikkelt-a, d ayla n yelli-s n Texliǧt n at Ɛettu, Zohra Aoudia, yettunefk i wungal-is « Yelli-s n uqettal ».
* Ma d arraz yerzan tullist, d ammud n Sid Ali Cherifi, « Abruy seg-sent » (kan), i wumi i d-iṣaḥ. Afud igerrzen i yimura-nneɣ, ssarameɣ ad yili warraz-a d asebɣes, d afud iǧehden axaṭer ad t-ḥwiǧen deg tikli-nsen taseklant, ad ddun deg ubrid-a n tektiwin, n wawal akked tira war tuɣalin ɣer deffir. Tanemmirt i teẓrigin « Talsa Editions » akked « Cheikh Mohand Oulhocine » i asen-yefkan tagnit iwakken ad d-ssuffɣen idlisen-nsen.
Ssarameɣ ad yiɣzif umecwar n Warraz-a.
Tanemmirt i yiɛeggalen n tesqamut n uktazal yeddan ddaw leɛnaya n umaru, aselmad Larbi Yahioun.
Afud i yimsuddsen n Tmesrit « Agraw n udlis » n Uẓru n Cemmini deg at Weɣlis, ladɣa Nadir Ouddak, ameddakkel-Ameɣnas ur nɛeggu.
Ar qabel di lehna.
Ramdane Abdenbi
Amaru
————————————————————————————————————————————————————————————
