Ay telha ccbaḥa ma tufa axemmem-is; ar d aɣ-lhun yisekkilen ma tceṛcuren d aman n umazzer. Ur-ma nezmer-as i wawal-d tameɣrut (rime) i d tamedyezt neɣ d aẓawan i d asefru; tahuski tezga kan d ijifeṛ n tsekla. Tal tasekla s tira-s, tignewt mačči yiwet. Yal yiwen yezzuzur ayen ara t-yeğğen asmi ara t-id-mmektin wid ara t-yettun. D wid yessakayen tatut i d aɣbel wala wid yettun. Yal wa amek yessenfalay, amek yesmedyiz, ma dɣa yettaru tutlayt-is. A wi ẓran ma d imdukkal i d tagmat neɣ d atmaten i d timdukkelt? Tikkwal d timdukkelt i ibeṭṭun tagmat… i ibeṭṭun timdukkelt n watmaten.
Nnan-yi-d: tettaruḍ, yiwen ur k-yeɣɣar. La ttaruɣ war tilas; ttaruɣ i yiman n yiman-iw. Win yufan kra deg wayen ttaruɣ yufa-t, ma yekmen lḥal, ahat ad t-yaf deg usigna n usmekti. Yal aɣanib n tira d tasekla tayeḍ: syin akin, d axemmem ara ɣ-yawin ɣer tmuɣliwin tisnagrayin (tifelsafanin). Tikkwal nessaẓay asefru aseklan iwumi ur nezmir, yernu nessawal tirawt (écrit). Mi ara s-nekkes aẓawan i usefru, ad t-naf zun… d addebdeb, d ashetref.
Yal asekkil nettaru, yettawi-d tili-s. Tussna am wakud teddun, tamussni texmet deg tsusmi-ines. Tenna-d, yenna-d, i nekkni d acu ara d-nini? Snulfan-aɣ-d ″amaḍal″, la neṭṭafaṛ kan. Amezruy aseklan, mačči yiwen: wa yettaru, wa yessawal; ameɣbun, izgel-itent akk. Anda-t wawal i umeslay? Tutlayt d asiwel, d tira. Ur zmireɣ ad d-ssenfaliɣ akken nniḍen akin i teqbaylit-iw, i tmaziɣt-nneɣ. Ayen ara yaru yimru-w, d asekkil teğğa tira-s…
Tutlayt n tyemmat, d amezruy n tmagit-is, d tasekla-ines. Tudert n tutlayt d tira-ines. Aṭas i ɣ-yeddem umeslay n wawal; tura ahat d tallit n usekkil n yimru-nneɣ. Tutlayt n tyemmat d asirem n tafat i tekksen ṭṭlam i tafat-is, d aɣerṣiw yessnen imɣan n yigran-is, d ameslay yerran tiɣri i wawal-is. Tasekla d ul yettarran tiɣri i wallaɣ, d ixf n tussna n tmussni. Tasekla tamedyazant: d iṭij d aman, d tudert…
Moh Laid Deflaoui
