Nezga neqqar : «timucuha-nneɣ d agerruj», nettzuxxu neqqar-as : «ula d iberraniyen, cexcen seg tmucuha-nneɣ». Acḥal d abrid i d-nettales i wayen i yura Ibn Xeldun : «Imaziɣen, ɣur-sen timucuha ayendin. Lemmer ad tent-arun, ad ččaren izmamen d yizmamen».
D acu i nura nekkni ? Acḥal i nura nekkni ? Acḥal i yuran wiyeḍ ? Acḥal i suqlen ɣer tutlayin-nsen ? I nekkni, acḥal ? Asteqsi yugaren wiyeḍ : acimi i tent-nessuqel ? Segmi i tent-nura, anida i tent-nerra ? Anwa-ten yidlisen i tent-irefden ? Idlisen-agi, anida-ten ? Acimi ur ten-nettaf ara ?
Timucuha-nneɣ, ass-a, amek ? Ad tent-neǧǧ akken llant ? Ad as-neqqar kan tigi d tigemmi-nneɣ, d iẓuran-nneɣ, malent-id izri-nneɣ ? Neɣ ad asent-nbeddel ? Ad tent-beddel ?
Iwudam n tmucuha-nneɣ, amek-iten ? Ad ten-neǧǧ kan akken llan ? D nutni kan ara yeqqimen ? Mqidec, Belεejjuḍ, Ɛmer neɣ Ɛli bu-tkercet, Silyuna, Slilwan, Lunǧa d wiyeḍ meṛṛa, ad qqimen kan di taddart-nsen d lexlawi i isuman tudrin-nsen ? Ṣṣlaten-nni, kra deg-sen nerra-ten d igelliden, ad ten-neǧǧ kan di ṣṣrayat-nsen ? Arrac-nni d tullas-nni, di taddart kan ara ttezzin, ad teqqim kan lexla-nni d adeg yessexlaεen ?
Twalaḍ, isteqsiyen, mačči yiwen. Llan wiyeḍ. Lemmer ad ten-id-nebder akken ma llan, ad nesseɣzef ameslay.
Meεna, win i as-yennan texla lexla, i yexlan d ṛṛay-is. Wali ɣer tama idergen, ad twaliḍ Belεid At Ɛli d Yamina At Sεid d Umeqqran At yeḥya d Belqasem At Mεemmer d wiyeḍ. Wali ɣer tama i tedhen tagut, ad ak-d-iban Salem Zeniya d Ɛli Maqur d Nadiya Belmuhub d Nadiya Ǧaber d Nasima yeḥyawi d Lwiza Kaneb d wiyeḍ d tiyeḍ meṛṛa. Ma ladɣa twalaḍ akkin i waman n Wagrakal, ad twaliḍ Akli Azwawi d Ziri At Mεemmer d Murad Irnaten d Nayt Ǧiǧi d wiyeḍ d tiyeḍ.
Ddeqs i asen-yeslan i yisteqsiyen-agi. Wigi d kra kan seg-sen. Tikkelt nniḍen ad d-nawi fell-asen d wayen i xedmen i tmucuha-nneɣ…
Muḥend Akli Salḥi
