I tikkelt tamezwarut deg umezruy n tfaskiwin d temzizliyin tiseklanin ara yella-d warraz i yimeɣriyen.
Nuɣ tanumi ttwamuddun warrazen i yidlisen akked yimeskaren-nsen. Amaynut, tikkelt-a, Tiddukla n Tmetti d Yidles Agraw, deg tfaska-s n udlis Agora deg Cemmini, n useggas-a, di teẓrigt-is tis 4 tesnulfa-d arraz n yimeɣriyen d tmeɣriyin.
Tizrigin yezrin xeddmen arraz Muhend Akli Ḥaddadu i udlis n tsekla yufraren, d ungalen neɣ d tullisin. Tikkelt-a temɣi-d tekti tamaynut, d tin yerran tamuɣli ɣer yimeɣriyen d tmeɣriyin, tlul-d temzzizzelt n tɣuri. Deg ubrid i usebɣes n tɣuri n yidlisen n tmaziɣt, d asnnerni n wamur n tmeɣriyin d yimeɣriyen.
Imekkiyen ɣer temzizzelt ɛeddan deg tnemselt seg wass n 13 yulyu, ɣran ɣef ṭiẓrawin d tarrayin n tesleḍt taseklant, lemden akk tiwsatin n tesleḍt d wamek i ttwaxdament. Yettunefk-asen uɣawas ara ḍefren i usewjed n tferket n tesleḍt ; rnu tettunefk-asen tullist ɣezzifen Tirgara n Kamel Buɛmara deg udlis-ines Nekkni d wiyaḍ. D tullist iɣef d-tella tasleḍt.
Ass 15 yulyu, deg yigemmaḍ n temzizzelt n tɣuri, ufraren-d krad seg-sen :
Arraz amezwaru: Kashi Ḥassan.
Arraz wis sin: Rmila Fayza.
Arraz wis tlata : Mwayssi Neǧmeddin.
Tizrigin i d-iteddun ad d-yettili umḥizwer-a n yimeɣriyen imi azal-is meqqer i tsekla akked tegnitt n udlis deg tmurt. Ma ulac imeɣri ur yettaẓ ara udlis s anda nebɣa, d nutni i yessidiren adlis d yimura.
Lyes Belaidi
