Acu n tizitt i t-id-iqqsen ass-nni, aseggwas aya tura, mi yekcem ar tkeṛṛust d abrid ar wedrar-nni ansa d-kkan yimawlan-is? D acu t-iwwin ad yadef ar tbeṛwiḍt-is ɣas akken yeẓra ad iwwet wedfel, a tt-issiɣ i usawen? Imawlan-is, d aɣrum i ten-iwwin ar temdint. I netta, d acu t-iwwin ar wedrar? Ar wedrar bu tqucac. Bu ixenduqen. Ar wedrar bu tɣalltin. Ar wedrar bu tizza. Bu iɣezran. Bu iceṛfan. Bu yesɣan.
D isɣan i yuɣen ddewla
Lbaz yennejla
Si Muḥend
D adfel. Deg udrar. Yiwet n ṭṭumubil deg ubrid. Abrid iεelleq. S ya d akeddaṛ, s ya d iɣzer.
Nnig ubrid, nnig udrar, isɣi ittezzi.
Adfel ittezzi, isɣi ittezzi.
Insa umutur. Anehhaṛ, yuli-t-id lgaz. Iwwet ɣaf tẓayart s idikel, iqqwel ibren zelmeḍ, ibren yeffus, ɣas iẓra tiryacin ur d-ttemḥiḥident. Ildi tawwurt, iffeɣ. Iṭal akka d wakka, ulac. D adfel kan. D afessas. D timeččimin kan. Igr-ed nnehta, irfed s tmuɣli d asawen.
Deg yigenni, isɣi-nni. Ismeṛdeḥ tawwurt. Amer ad qqareɣ tura da? Adfel a yi-idel. Amer ad qqareɣ da tura? Yemmat yemma-s n wihinna i ittezzin i usawen, a d-iweṭṭi, a yi-d-iqleε allen-iw, a yi-igzer agwlim-iw. D nek ara yeqqaren naɣ d tafunast, d acu ara s-iṛuḥen i netta? D nek ara yeqqaren naɣ d izimer? Naɣ d aqjun? Naɣ d … D acu i t-id-icqan wihin i ittezzin nnig ubrid? Awi-d kan ad iwwet aqamum-is d yixabbazen-is. D acu i t-id-icqan, yisɣi? Yemmat yemma-s n umdan! D acu i yeḥseb iman-is? Aɣersiw i yenwan yif iɣersiwen nniḍen. Yenwan ad yerr agama ddaw n uḍar-is. Amdan! Taweṭṭuft yettcuffun aqendur i yiman-is. Amcic yettbuεburen ɣaf umaḍal. Ahya-k-id, a yiwen unaṛsis!
Netta s snat tqwejjarin-is yettergigin. Ïṭumubil-is ikerfen. Iwwet taryact s rrkel. Wwet-itt ad tekker! Taryact n deffir. Bbaf! Taryact n sdat. Bbaf! Kker, inεel lwaldin n baba-m!
Adfel ittezzi. Isɣi ittezzi. A d-iqleε allen-ik. Ad igzer aksum-ik.
Bbaf! Bbaf! S rrkel ar teryacin. S wukkim ɣaf ukapu. Bbaf! Bbaf! Ad tekkreḍ naɣ…?
Isɣi. Adfel. Adfel. Isɣi. Zzi, zzi.
Igr-ed nnehta, ildi-d tawwurt, ikcem, iqqim. Isres afus-is ɣaf tẓayart, isres aqerruy-is ɣaf ufus-is. Ger nnefs, ssufeɣ nnefs. Cciṭan ubgis, akken teqqar temɣart n yemma-s. Cciṭan, xzu-t. Xzu-t ihi din, xzu-t ɣaf yiman-ik. Cciṭan, Buda d yilluten n Lhend d tirni. Bṛahim Lxalil d wid akw i d-irnan deffir-es, yal wa s tmacahutt-is.
Ijbed-iten-id akken ma llan, ittneqniq. Aṛǧu, a laẓ, ad yeww lexrif. Aṛǧu kan din; a k-id-smenεen,ih. Irefd-ed aqerruy-is, iger azwu-issufeɣ azwu. Iger azwu-issufeɣ azwu. Isfillit ar wayen yelhan. Ad frunt, ad frunt, ad frunt. D yiwen naɣ d sin i iḥeṣlen, ikks-ed iman-is seg tnexxart?! Qqim kan deg ṭṭumubil, ger azwu-ssufeɣ azwu. Ad rekden yedmaren, ad yerked wul. Mmmmhhhh-uffff. Mmmmhhhh-Ufffff…
Ildi-d allen-is, idla ɣaf temrilt, yaf-itt teḥbes ula d nettat. Lxiḍ ncalleh! Rnu-d wayeḍ! Ïṭumubil tekref, tamrilt tekref. Γur-ek kan ul-ik d wallaɣ-ik ad kerfen…
D acu-tent teftilin-ihin? D ṭṭuṭu…? D ṭṭumu…? D ṭṭumumubi…? D ṭṭumumubibil? Iffeɣ mexluli, ibed deg tlemmast n ubrid, iṣnugguḥ: Aaaa! Ëbes, ḥbes! TΕedda-d sdat-es, tezzefzef. Ḍezz! Ayaaa, a jedd n baba-m, a jedd n baba-m! Ayaaaa! Ëbes, ḥbes! Iwwet s wukkim ɣaf yimesraq-is, ittkuffut. A jedd n baba-m, a jedd n baba-m!
D acu-t tura, wihin ? D acu i t-yuɣen ? Ad berneɣ ɣur-es naɣ ad dduɣ kan d ubrid-iw? I ma yewwi afrux-iw? A yi-yexneq naɣ a yi-yeftek, bqa εla xir, ay Aqbu! Adfel a yi-idel. Arma d asmi ara yefsi ara yi-d-afen. Ma ǧǧan-d deg-i kra yigerfiwen d yisɣan. Ha-t-an yiwen ittezzi i usawen. Iban kan ɣaf uqerruy-iw i ittezi. I wihinna tura i d-ikksen akka taɣwect-is? Ad berneɣ ɣur-es, ad yawi iziɣer-iw, ad yawi ṭṭumubil-iw?
Deɣya a s-tezmer tmeṭṭut i yilef am wihin? Ilef, ilef, a yelli-s n medden… I ma yella d tuffɣa kan i t-iffeɣ leεqel, netta d argaz n lεali? Nek, rriḥa n urgaz, wi yecfan aya! Seg wasmi yennejla uneggaru-nni, argaz ur d-isris afus-is ɣaf tegwlimt-iw. Ar medden, ur tufiḍ i yi-ixuṣṣen. Ttluseɣ, ttcebbiḥeɣ, tikli deg BMW. Tadrimt tella, d tamastant tameqwrant, mucaεeɣ ar medden. Tadrimt, ṭṭumubil ɣlayen, tamezduɣt deg temdint mucaεen… Tidett kan, a Lalla, i wacu-ten akw wi ma ur yelli win ara d-isersen afus-is ɣaf tεebbuḍt-iw? Ara d-isersen afus-is ɣaf yedmaren-iw?
Ittazzal. Ad yazzel a tt-yaweḍ send ad tefferfer, a s-d-tessegwri tabeḥritt. Aṛǧu, aṛǧu! D tameṭṭut ay din! Tameṭṭut, ḥnin wul-is, ur yi-tettɣullu ara, ur yi-tettaǧǧa ara ad qqareɣ da. Aṛǧu, aṛǧu!
Teffɣ-ed, tessawel. Qqim kan din, aql-iyi. Tuɣal ar ṭṭumubil, tebren timendeffirt.
Adfel ittezzi. Isɣi ittezzi. Sin tura. Sgellin illa yiwen kan, ha-tt-a terna-d tihin. Ad hemjeɣ, ad hemjen warraw-iw, ad hemjen wayetma. Adfel a ten-ikref, a yi-ten-id-yefk d tunṭict n wass-a…
Izzi-d useggwas. D iṭij. Irna ɣur-sen uqcic. Tamastant tameqwrant teǧǧa tamdint tameqwrant, terra-tt ar tkessawt. Taqeḍεit tameqwrant n yizamaren. Aqjun n tkessawt. D acebḥan, d ameqwran. Ma d netta, tikelt yid-es d ameksa deg udrar, tikelt deg temdint anda d-ilul, ar yemma-s. Illa d amyaru, iqqim kan d amyaru. D acu, zik-nni, ittaru ɣaf yemdanen d tlufa-nsen, ass-a yettaru ɣaf ugama. Tugett ɣaf yiɣersiwen. Ger yiɣersiwen, tugett ɣaf yegḍaḍ. Ger yegḍaḍ, tugett ɣaf yesɣan tineggura-ya.
Acu n tizitt i t-id-iqqsen ass-nni, aseggwas aya tura, mi yekcem ar tkeṛṛust d abrid ar wedrar-nni ansa d-kkan yimawlan-is? D acu t-iwwin ad yadef ar tbeṛwiḍt-is ɣas akken yeẓra ad iwwet wedfel, a tt-issiɣ i usawen? Imawlan-is, d aɣrum i ten-iwwin ar temdint. I netta, d acu t-iwwin ar wedrar? Ar wedrar bu tqucac. Bu ixenduqen. Ar wedrar bu tɣalltin. Ar wedrar bu tizza. Bu iɣezran. Bu iceṛfan. Bu yesɣan.
Amer Yidir
