Di yal akud, di yal tamurt d tira i d-ineǧren abrid i tɣerma. S tira i tteg tɣerma aẓar deg wakal n tudert. Lemmer mačči d tira d awezɣi ad beddent tɣermwin am tin n yIferɛunen, neɣ n yIgrikiyen, neɣ n ruman…
Yal agdud i igan ccan i tira, yufa amek ara yerz isula akken ad yeffeɣ ɣer iberdan yettawin ɣef ugni n tusna akked tanfalit. Agdud ur neksib tira ad as-tezzi taɣlalt s waɛrur ! Idles-nneɣ taggara-agi yewwet s-ugerz akken ad irebbi ifaden s wacu ara ibedd . S wacu ara yeddu akken ad yaɣ amkan-is gar idelsan n leǧnas merra . Ayen akken nɣil d awezɣi zik-nni , ass-a yeḍḥad dayen umu iweɛa wallaɣ akked tidmi . Tutlayt-nneɣ deg iseggasen-agi ineggura tuɣ abrid ɣer tira, tega lemqud i wadlis . D imayaten n yedlisen di yal ṣṣenf (isefra- tullisin- ungalen- ticqufin n umezgun-tasuqulit n yedlisen alsawiyen) id yettnulfun wa deffir wa yal aseggas . Nnig waya, aṭas n warazen s demma i wadlis n tmaziɣtid yettilin ; Si tama nniḍen aṭas n yemyura s tmaziɣt bdan ad ttifriren, uɣalen ttwasnen . Aya merra dayen yesefraḥen ar ad yinni win yettmuqulen s annar s ufella neɣ si lebɛid …
Meɛna tilawt ur telli akka imi gar tasekla-nneɣ akked d leqrar ay ɣur-nneɣ ! ay ɣur-nneɣ….
I wumi tira tikci wid ara tt-yeɣren xas innid ulac ?
I wumi tira , ticki wid ara tt-yesneqden, ar ad yawwin awal fell- as, ara tt-yektilen xas ḥseb-iten ulac ? I wumi tira,ticki xas wid yettarun ur dellun ara ɣef wayen uran wiyaḍ ? I wumi tira ticki ayen yuran ur yewwid ara ɣer lɣerḍ-is. Ur iḥuz-ara wid yeɛna ?
I wumi tira ticki tira-nni teguma as tbeddel i lqum tikli ?
Ass-a ulama tekčem tasekla tamaziɣt reḥba n wadlis, ur ilaq ara amdan as yinni dayen neṣawaḍ, imi yella wacu yugaren adlis s timmad-is : d-amkan yesɛa wadlis di tmeti ! Azal-agi n udlis, skud mazal-it yettwanker, xas ini ay aḥbib : la neserwat berra n wannar !
Hamid Ait Slimane
