Leḥḥuɣ deg umkan-nni n wis d acu-t, alarmi i sliɣ i « asmi nella d igurdan… ». Refdeɣ aqerruy-iw, argaz akked tmeṭṭutcaxen di cna. Netta yekkat amundul, nettat tetthuzzu aqerru-s. Qerbeɣ ɣur-sen, ɛeqleɣ Ccix Lḥesnawi akked Faḍma. Caxeɣ yis-sen ula d nekk. Mi ifuk agember, neṭṭqeɣ :
Tangalt : azul a Ccix !
Ccix Lḥesnawi :mmreḥba yes-m a Tangalt, mmreḥba s rriḥa n Tmurt.
Tangalt : iḥrez-ik. (ziɣ ɣer Faḍma) azul a nna Faḍma.
Faḍma : mmreḥba yes-m a yelli.
Tangalt : ɛeǧbent-kun waqila tezlatin-agi n Ali Amran
Ccix Lḥesnawi : tizlatin ?
Tangalt : tuɣac.
Faḍma : yesmekta-iyi-d deg ussan-nni, di Bu Tabani n twaɣit, yessendef acemma tasa-w. Ad t-yeḥrez weḥnin. Ini-yi-d a yelli, yezweǧ Ali Amran ?
Ccix Lḥesnawi : (yettnectaḥ) ɛni ur meččureɣ ara tiṭ a Faḍma ? Yak ḥala nekk i d ṭbib-im .
Faḍma : (tḥennec ɣer Ccix Lḥesnawi, tesluf-as afus) ih a leɛmer, ala keč i d ṭbib-iw yid-k i ḥelluɣ.
Tangalt : i keč a Ccix d acu tenniḍ ?
Ccix Lḥesnawi : D axlaf Ali Amran-agi. Acki-t wakken d-yeḥya tuɣac-iw
Tangalt : yaaah, nekk, nniɣ-as ur k-iɛeǧǧeb ara uɛiwed i ttɛawaden ilmeẓyen n tura i tuɣac n zik.
Ccix Lḥesnawi : D tidet, tikwal d asewwi i ttɛawaden i yiɣsan. Ulac ayen d-rennun . Daɣ netta ma yella ulac d acu d-terniḍ i taɣect taqdimt, yif-it fiḥel. Tikwal, neqqen ula d cwiṭ n ruḥ n taɣect. Maɛna cɣel-agi n Ali Amran i wenneɛ, yerna cbaḥa i tuɣac-iw. Akken ara tent-cnuɣ ula d nekk, lukan tella tmusni d ttawilat di tallit-iw.
Tangalt : ad yefreḥ dayen kan Ali Amran, mara isel i yimeslayen-a. Ini-d a ccix…
Cccix Lḥesnawi : anɛem a yelli !
Tangalt : bɣiɣ ad k-tseqsiɣ..wellah ar ssetḥaɣ…
Ccix Lḥesnawi : steqsi a yelli, ayen yellan deg ul-im, deg iɣef n yiles-im ini-t-d.
Tangalt : asmi d-fɣeḍ si Tmurt, aṭas i yeqqaren belli d ɛeggu i teɛyiḍ si leqbayel, seg leqwaleb n tmeti, si jmaɛliman…. Wiyaḍ qqaren d Faḍma i d sebba…
Ccix Lḥesnawi : cwiṭ yella, cwiṭ yerna. D tidet a yelli, leqbayel n imir-nni yuɣ-iten Bu Tabani, yebrek fell-asen , yesderɣel-ten ɣef wayen icebḥ, ɣef leḥmala… Ma d Faḍma… attan sdat-m steqsi-tt.
Tangalt : acu tenniḍ a nna Faḍma di temsalt-a ?
Faḍma : di tallit-nni ay yelli, nukuntu s tlawin nuɣ-itent mkemda. Ur d aɣ-d-ṣaḥ ara ad nerfed ula d allen-nneɣ. Awal-agi n « ḥemmleɣ-k », ad tekukruḍ ad t-id-iniḍ ula d deg ul-ik. Ɣas akken, nemmyeḥmal ɛinani nekk bu « frizi ». cah, yehwa-yaɣ !
Tangalt : amek i d awen-d-ban tmurt, ass-a
Ccix Lḥesnawi : mazal kamimi, Bu Tabani yesserwat. Imi mazal-it yekker uɣebbar ar La Maison Blanche, mazal-tt tmurt teqqers.
Faḍma : d kunwi i d asirem a yelli. Kem akked tmital-im ara ibedlen taswiɛt , ara d-yesnulfun « nuǧum al-lil » ula deg uzal qaylal.
