Ma nmuqel, s tiṭ yettanin, amek i tettbeddil tsekla taqbaylit seg zik ar ass-a, ad naf deg-s kra n yineḍruyen d igejdanen ; d nitni i yesbedden amezruy-ines. Gar yineḍruyen-agi, llan tlala azal-nsen d ameqqran. Meqqer wazal-nsen, acku, tamezwarut n tmezwur, ḍulen deg wakud ; tin yernan ɣer-s : d ineḍriyen i d-yeglan s yibeddilen imeqqranen di tsekla.
Aneḍru agejdan amezwaru, yugaren akk wiyeḍ, d tawadfa n tira deg usnulfu d usiweḍ n uḍris aseklan deg yidles d tutlayt. Aneḍru-agi, yeṭṭef aṭas deg wakud ; yal takkayt (étape), tefka-as udem amaynut i tsekla, ama ɣer yimesnulfyen, ama ɣer yinermasen (récepteurs), ama deg yiḍrisen d tewsatin-nsen, ama deg tɣunba d tfulka (stylistique et esthétique).
Azal n twadfa n tira deg usnulfu aseklan, ur yeqqin ara kan ɣer tɣara n tilin n uḍris deg yidles. Annect-a, ɣur-s azal deg uḍris s timmad-is : deg yisental, deg talɣa d tɣessa, deg tuddsa n tmenna (énonciation), deg wassaɣ n umaru d uḍris-ines, deg wassaɣ n umaru d tudert, atg. Mi d-tudef tira, tbeddel-as i tsekla taqbaylit (tamaziɣt) udem, akken i as-twelleh iberdan nniḍen ; s tira tenǧer-as tikli tamaynut.
Ma yuna yiwen deg wayen i d-tegla tira i tsekla taqbaylit, ad ifiq amek i ibeddel usnulfu aseklan. Tamuɣli tamazrayt, ilaq-as ad as-teg azal i wannect-a, akken yessefk fell-as diɣen ad tnadi ɣef wudmawen n ubeddel-agi. S umata, nezmer ad nebḍu tamsalt-a ɣef tlata. Tamezwarut d aseskel (transcription) n yiḍrisen n tmawit. Tis snat d allus n usuddes n yiḍrisen n tmawit (recomposition des textes oraux). Tis tlata d asnulfu amaynut s tira ama n yiḍrisen ama n tewsatin-nsen.
Aneḍru agejdan wis sin d tawadfa n ṛṛadyu deg yidles n teqbaylit. Seg tlemmast n yiseggasen n 40 armi d iseggasen-a ideg nettidir, ayen yeḍran di taɣult n tsekla, ama d amezgun, ama d ccna, ama d isefra, ama d tisgilin ɣef tsekla, atg. mačči d izli. Akken tesɛa ṛṛadyu azal amazray deg usmeynet n tsekla (renouvellement littéraire) yeqqnen ɣer tewsatin tiseklanin i tesɛa azal nniḍen deg tiɣunba d tfulka. Tilawin-nni, am Lla Yamina d Lǧida tameqqrant, d Crifa d Ḥnifa d tiyeḍ, sufɣent taɣuct-nni taseklant yettwaḍerfen di teskla tamensayt ɣer medden akk. Uɣalent tlisa yellan gar tsekla n tlawin d tsekla n yirgazen, ttbeddilent udem cwiṭ cwiṭ. Yezmer yiwen akkya ad yini amgared-nni yellan gar tsekla yettwaḍerfen d tsekla i wumi tefka tmetti azal, yebda yettbeddil s wayen akk yeḍran di ṛṛadyu. Tin yernan ɣer wannect-a, d ṛṛadyu i as-yefkan i umezgun udem di tmetti. Ismawen n wid yesbedden tawsit-agi, bdan tura ttbinen-d : Muḥemmed Ḥilmi, Ɛli Ɛebdun, Uyeɛqub, Saɛid Zanun. Amezgun n Muḥend U Yeḥya d takkayt nniḍen deg umezruy n umezgun.
Aneḍru wis tlata d talalit n yigrawen, ama di tmurt ama di lɣerba, i yerran tasekla d aɣbel-nsen, s wudem neɣ s wayeḍ. Nezmer ad nebder gar yigrawen-agi : Imrabḍen irumiyen (1944-1976), Agraw n Lezzayer (1968-1977 : agraw-a, yella gar ṛṛadyu d temsrin n Lmulud At Mɛemmer, d uɣrem asdawan n Benɛeknun), Agraw n Vincennes di Lpari (1972-1982), Agraw Imedyazen (1980-1985), Agraw n Tezmalt (1986-1989), Agraw adelsan amaziɣ (1992-2000), atg. Tigawin n yigrawen-agi, aṭas ; assaɣen gar-asen diɣen ; anadi fell-asen d unadi deg-sen, yessefk ad yili. Akka kan ara nsebded amezruy n tsekla-nneɣ.
Muḥend Akli Salḥi
