Nettmeslay d ddunit, nettarra-tt d taxsimt amzun ur nelli deg-s ; nettezzem-itt, nsemma-as « tamɣurrit », yal yiwen amek i as-yeqqar, wa : « a ddunit a mm-leɣrur », wa : « a ddunit, tɣurreḍ-iyi/tettɣurruḍ-iyi »; nesbabb-as ayen nexdmen deg yiman-nneɣ, yerna nessawal-as « a mm-sin n wudmawen ».Nettmeslay d lmektub, nettqabal-it am wudem yettqazamen aɛdaw. Tikkelt, nerra-t di twenza (deg unyir), yettban-aɣ-d d aḍellaɛ n lehna n temɣart tigellilt mi ara terzef ɣef yelli-s ; tikkelt, nekmes-it di zzher, nettaggad-it am tadist yeɣrin neɣ am uhicur yerɣan.
Nettmeslay d ddunit… Nettmeslay d lmektub… Nettmeslay d lmut… Nettmeslay d lḥif… Nettmeslay d waḍu… Nettmeslay d leḍyur, nekkni nḥemmel itbiren… Nettmeslay d ubrid… Nettmeslay d wakal…
Nettmeslay yid-sen, wissen ma sellen-aɣ-d ! Nettmeslay-iten, wissen amek-it wawal i aɣ-rran, ma rran-aɣ-d !
D ayen yessewhamen ! Nessen ad nmeslay d ddunit yerna ɣezziiiiiiiif umeslay ; nessen ad nmeslay d lmektub d zzher d twenza, deg-sen nettberri nrennu ; nessen ad nmeslay d lḥif, seg wakken i aɣ-yennum nerra-t yemṣada d nnif ; nessen ad nmeslay d lmut, abrid-nni ur nexli… Nessen akk ameslay d wigi, UR NESSIN ad nmeslay deg waygar-aneɣ, ur yessin ad imeslay baba-s d mmi-s, ur tessin ad tmeslay temɣart d teslit-is, ur yessin ad imeslay umdan d gma-s, ur yessin ad imeslay urgaz d weltma-s d tmeṭṭut-is, ur tessin teslit ad tmeslay d tnuḍin d tlewsatin, ur yessin ad imeslay yiwen d lǧar-is, ur yessin ad imeslay umeɣnas d umeddakkel-is d uxsim-is… D tisewham…
Neɣ d acu i tennam(-t) ?
Muḥand Akli Salḥi
