Lemmer i la nceffu ɣef wayen iɛeddan fell-aɣ, lemmer i la nettcawar imussnawen-nneɣ, lemmer i la nsell i wayen i la aɣ-d-qqaren -ɣas llan wideni la yessusumen- lemmer i la netterra lwelha-nneɣ ɣerwawal n yimedyazen akked yinaẓuren, lemmer… lemmer… lemmer… yilli ur nettaweḍ ara ɣer liḥala yecban tagi ideg nella imir-a. Nezgel tafsut, nezgel targit, nezgel asirem, nezgel tilelli… nezgel kra yemmalen iberdan n tudert.Yal tikkelt mi ara d-yezzi wayen iɛeddan fell-aɣ yakan, ad as-tiniḍ nɛawed-d talalit,d asebter amellal ; ad d-nesnulfu ayen iɣef ara nnaḍeḥ, ad as-nales i yir tudert alamma tettwacelqef-aɣ !… maca ad yeqqim usebter-nni d amellal i lebda.
« Ur d-ǧǧin yimezwura ara d-inin yineggura » d tanfalit ɣef tarmit n yiseggasen (ahat n leqrun) n tudert n yimdanen i aɣ-yecban, iseg d-nefruri. Tewweḍ-aɣ-d tarmit-a deg yisefra, deg yinzan, deg temɛayin, deg tmucuha… maca d acu i nexdemyis-s ? Amek i tt-nqubel ? Ahat da i yella wugur !… Widen i d-iḍefren imir-a urcfin ara.
Tbeddel teswiɛt, d tallit-iḍen, zik-nni yiwet n tikkelt kan i tettɛeddi ɣef wuccen !…Ma d uccen n tura zgant ttɛeddint akken i d-ttasent ; ta deffir ta…
Uccen meskin, ggran-as-d yirussan !
Yenna-d Muḥend u Yeḥya deg usmuḥyet-ines asmi d-yessenṭeq Wejṭuṭi d Nna Faṭi, akken kan i kfanawal, teɣli-d teggrayt n Unaẓur am udrar fell-aɣ : « …Ttkemmilet akka alamma teɛyam… Ddawaret akka alamma teɛyam… » Lemmer i kemmlen adiwenni : « agem-d aman a Wejṭuṭi… Swayes ara d-agmeɣ aman a Nna Faṭi… » ur keffun ur ḥebbsen alamma sebken, yeffeɣ-itenrruḥ…
Lemmer ur d-yenni bab n wawal, tilli d-nenna ; imi i d-yenna, d acu ara d-nini « nekkni s cceɛb amekḥus, kra ara yeḍrun yid-neɣ drus ! »… « Nugi lekdeb akkedlbaṭel, nugi ammus, llan akk deg-neɣ merra »… « Ɣas nettaɣ-itent neggumma ad necfu !…
Di taggara, tatut d lmut, win yettun amzun yemmut.
Am wakken i nnumeɣ, ad d-iniɣihi aya d tikti kan !
Surfem kan, zik, lehlak n tkatut d tewser, tura yerna-d alẓaymer !
Ramdane Abdenbi
Amaru
