Neggel (romancer) ay aneggal deg yisafen n uneggel; ssaki-d iwudam i ɣ-d-yesmektayen tatut-nneɣ. Ay nessaram d asirem yelhan i usirem-nneɣ. Yelha-yaɣ kan ma neẓra anda nteddu: itri yessen igenni-ines, imɣi yedda d wakal-is. Mi dɣa tenquqel ddunit… ibeddel umaḍal tikli, ula ara d-nernu ma tezxuxem tegnawt-nneɣ. Anda-k ay akud yefkan azal i wawal? Anda-k ay adeg yeččan akud-is? D acu ara d-nini: zzman, tuker-it tikli-ines, layas yerwel yettayes.
Yal wa amek yesselḥay iwudam n tsekla-s.Yal wa amek i s-d-tṣaḥ tudert-is di tmeddurt-is: ula d iwudam deg wungal, ffɣen bab-nsen, aneggal-nsen. Tikkwal d iwudam i d-yesnulfayen aneggal ɣas d netta i sen-yefkan talalit. Akken yettnaɣ uɣerṣiw d teẓgi-s i yettnaɣ uwudem d uneggal-is mi nɣil nesnulfa-d ayen ara d-yennulfun. Ccwi kan, amezruy i d-iteddun, ad t-tessiwel tsekla…
Nessaram ad tenfu lɣella leɣla akken ara teffeɣ cceḥḥa leεqel-is. Nessaram ad yili wawal d agellid n wid iɣilen ṛwan; nessaram ad d-mmektin wid yelluẓen ṛwan asmi akken lluẓen. Nessaram talwit deg tmiṭ n tilawt asmi teshetrif tigawt. Nessaram ad aɣ-ilin, mmi-s d baba-s, d ul n tegmat n temdukkelt. Nessaram tiram n temlel deg usigna yeffɣen tilas yessawalen i tillas…
Nessawel i lḥif n nnif… yiwen ur d-yerri awal. Nessawel-as i tidet n tilawt, nufa-d annar d lxali. Mačči d assemlel n tebrek yeffren i d ccbaḥa:
Nuɣ-d tudert i tilas
Yečča-tt usigna n tillas…
Terza-d tifrat d asirem
Awi-d kan ma yektal-aɣ uxemmem di teswiεin n tselbi n usirem-nneɣ! Ayen nniḍen nebna fell-as. D tafat kan ara d-yerzun asmi ara tt-nerr d asirem; tecfa fell-aɣ tessen-aɣ asmi nedderɣel… Seg wasmi i tɣab, yeɣli-d lweḥc deg taddart. Skud yettemɣuɣud usekkil n tmedyezt-iw, yessawal-iyi-d i temyigert igezmen tiɣaltin. Si zik-nni-nneɣ… i d iyi-yekcem weɣbel, ttutlayeɣ steqsayeɣ: nessaram iles d idles am wadif yeddem yiɣes…
Moh Laid Deflaoui
